السلام عليكم و رحمة الله ……
يا على بالي احط لكم اخر مجموعة ميك اب خذتها مادري يمكن لني متحمسه خخخخخخخخخ .. و بشرح لكم شو كل واحد يسوي .. و طبعا بالارقام ..
من اليسار فوق (مع الاسعار التقريبية)
1- بيس ميك اب فوريفر (110 درهم)
2- كريم اساس ريميل (60 درهم)
3- كريم اساس ميك اب فوريفر (150 درهم)
4- باليت اي شادو من ميك اب فوريفر (اللون ب 85 و الباليت ب 66)
5- باليت ارواج من بن ناي (100 درهم)
السطر الي تحته من اليسار لليمين:
6-اسفنجة من ميك اب فوريفر (35 درهم)
7- بيس شادو لؤلؤي(H12) من سيشيدو (120 درهم)
8- بيغمنت من ماك (Kitschmas) وردي ثلجي (80 درهم)
9- بيفمنت من ماك (Fuchsia) فوشيا (80 درهم)
10- باليت الكونسيلر من ميك اب فوريفر #5
السطر الاخير من اليمين :
11- قلم كحل من سمايلنج (اسود) اظني 20 درهم
12- قلم كحل ابيض من ميك اب فوريفر 14L سعره ( 90 درهم)
13- غلوس شفاف من ميك اب فوريفر 80 درهم تقريبا
14- كيك اي لاينر من ميك اب فوريفر #1 80 درهم تقريبا
15- ستار بادور من ميك اب فوريفر # 41 لون لؤلؤي 90 درهم تقريبا
أولا: البيس و كريم الأساس:
1-بيس من ميك اب فوريفر .. هذا رقم صفر ..
رقم صفر الي هو حق كل انواع البشرات ..و عندهم 6 الوان .. البنفسجي حق البشرة المصفرة .. الاخضر حق المحمرة .. الازرق فااااتح حق العادية و الابيض حق العادية و ممم في واحد بعد .. هيه شي ذهبي حق البشرة السمرا وايد .. طبعا هذا تحطينه قبل كل شي .. يعني عقب ما تنظفين بشرتج تحطين هذا و عقبها الكونسيلر و عقب كريم الاساس ..
3-**ميك اب فوريفر المائي .. رقم 1 .. طبعا لنه فاتح شوي ما ينفع الا للمناسبات … فأنا شو اسوي .. اخلطه بشوي من الثاني الي بحطه عقب شوي..
2-** ريميل .. برونزي .. 301 warm honey … اذا تبين ميك اب برونزي تحطينه بروحه .. بس لو تبين ناتشورال لوك تحطين من الفاتح و الغامج .. تخلطين على حسب بشرتج كيف .. انا قمحية .. و بشرتي جافة .. فاستخدم المائي ..
6-اسفنجة من ميك اب فوريفر .. هاي حلوة حق تخفيف كريم الاساس لو كان وايد زايد لنها تمتصه … و بعد انا استخدمها حق تنظيف بقايا الايشادو على الزوايا ..
ملاحظة: لا تخلطين كريمين اساس الا من نفس الفصيله .. يعني لازم يكونون مائيات او زيتيات و جي .. لنه لو خلطتي زيتي و مائي بتستوي عندج بلاوي زرقا .. خخخخخ
ثانيا: الكونسيلر و البودرة:
10-* باليت الكونسيلر من ميك اب فوريفر #5
هالباليت وايد مهمه و ضرورية لكل حرمة و بنت …….. مب قصدي هاي الي عندي .. في كمن نوعيه على حسب عيوب بشرتج .. يعني هاي الي عندي انا اخترتها لنه فيها البرتقالي الي استخدمه حق الهالات الغامجة + البنفسجي حق الاماكن المصفرة + الاخضر حق الاحمرار … و طبعا البيج و البيج الغامج هذا عقب ما احط الكريم اساس ارد احطه البيج تحت العيون او المكان الي حطيت فيه اخضر .. و عقبها البودره ..
ثالثا: الشادو و الكحل
7- بيس شادو من سيشيدو …. Thanks to Pumpkin
حلو جربته تحت الحواجب و على كامل الجفن و عقب بديت احط الشادو البودره و طلعت النتايج مرضية .. هو لمعه و وهو مثبت للشدو البودره .
8-9 – الوان وردي و فوشيا من ماك .. حلوات حق اللوك البنكش .. بس طبعا كلنا نعرف انه اي شي بودره لازم تحته سائل .. و العكس .. فعشان يثبت البيغمنت لازم نحط بيس شادو كريمي او اذا ما عندنا نحط كونسيلر على كامل العين و عقب نبدا نشتغل ..
11- قلم كحل اسود عادي بس حلو اذا تبين تسوين لوك سموكي تلونين الجفن المتحرك بهالقلم لنه كريمي و عقب تمدينه بصبعج او بالفرشاه و عقبها تبدين تحطين الالوان .
12- قلم ابيض لداخل العيون او مثلا اذا بتتفننين تحطين على زاوية العين الخارجية ..
14- كيك ايلاينر .. هذا حلو اذا بتستخدمين الفرشاة الرفيعة حق رسم العيون مع الماء اكيد .. و طبعا عيبه انه بسرعه يجف لكنه وااااااايد سهل اسهل من الايلانر العادي ..
15- ستار باودر لونه لؤلؤي فيه لمعه .. حلو حق تحت الحواجب و ممكن بعد اذا بتتفننين تحطين على عظمة الخدود كخطوة نهائية للإضاءة ..
رابعا: الشفاة
5- باليت الارواج .. الوانها حلوة و هادية .. و مات .. يبالها شوي غلوس ..
13- غلوس شفاف …. روعه و ينفخ الشفايف شوي .. شي منه كذا لون بس انا عندي هذا و الفوشي ..يجنن ..
[/IMG]
خامسا : الفراشي
من تحت لين فوق .. (كلهم ميك اب فوريفر الا الدبه الصغيره من بدي شوب)
8N – هذي حق توزيع الكريم اساس .. و تعتبر من الفراشي البلاستك مب شعر ..
6N – هاي عشان تحطين الكونسيلر …. و ممكن تستخدمينها حق الشادو الكريمي .. لنها بلاستك مب شعر ..
8S – هاي عشان تحطين الشادو على الاماكن الصغيرة
2S – هاي حق الايلانر …
18S- هاي تشبه الصبع … و تحطين بها الشادو في الاماكن الواسعه .. و ممكن تستخدمينها حق الكونتور .. (على الخدود و الجبهه و الذقن)
5SB – هاي انجل برش .. عشان تحطين الشادو تحت العين حلوة و مرتبه ..
14S – هاي بصراحه اهم وحده عندي .. للدمج رهيييييييييبه .. احسها تدمج بروحها 
و اخر وحده فوق ماعرف شو رقمها بس هي تي نفس البرش مال الحلاقة خخخخخخخخ استخدمها حق البلشر و حق توزيع البودرة ..
و بس .. اتمنى انكم استفدتو من الموضوع السريع