اذا اخت ريلج جي شو بيكون رد فعلج () 2024.

ما بطول عليكم

بس يا ريت اللي تدش اتقول لي شو رايها

انا زوجي مطلق بنت عمه قبل لا يتزوجني

و الحين صار لي معاه 10 سنين (ما شاء الله)

وانا ما استوي لهم (غريبة عنهم)

فدييييييييييت زوجي ما يقصر وياي و يحبني و انا امووووووووووت فيه

المهم اخت زوجي هاي ربيعة طليقته (اللي تستوي بنت عمه)

المهم من بداية زواجنا وهي كارهتني اتحسسني اني فيني داء معدي يعني اي مكان اكون انا و عيالي موجودين فيه تتفادى هي الوجود فيه

و خلال هالعشر سنوات زواج ولا مرة زارت بيتي ولا يت باركت لي على ولا واحد من عيالي (لي ولدين و بنتين فديتهم)

غير هذا تتكلم علي عند كل حد اتحاول باسلوبها المريض اتخوف الناس مني و تقطع علاقتي باي احد خلتني انزوي بروحي انا وعيالي حسبي الله عليهم

المهم زوجي له اولاد من طليقته ويوم يسير عسب ييبهم مرات اسير وياه فتقوم اخته ونحن فزيارة لبيت اهله ما اعرف كيف اوصف لكم الموقف بس كل وحدة منكم تتخيل

دشت من باب الصالة ونحن كلنا يلوس اهل زوجي كلهم وكان فيه ضيوف بعد (غرب عنا) وتزاعق باعلى صوتها وتقول له ((( هاااااااااااااااااي ليش اتوديها وياك ….امسويتنك خاتم بايدها …..استحي اقول لكم كل اللي استوى حسبي الله عليها )))

اتلمح ان انا ساحرتنه حسبي الله عليها

ومن فترة قامت تعزم طليقته و خواتها فالبيت يوم تعرف ان احنا بنكون موجودين وما تعلمنا

يعني نكون يالسين و نتفاجا بطليقته داشة من الباب بكامل كشختها

هذا غير ان من فترة تقريبا الشهرين دقت حق زوجي و مرة وحدة تفتن عليه اتقول له ((انت ليييييييييييييش ما تكلم فلانة بالتلفون تقصد طليقته ولا خايف من الساحرة —تقصني انا—حسبي الله عليها))

هو رد عليها وقال لها ما اخاف من حد غير رب العالمين و هاي استوت غريبة شراتها شرات اي وحدة ثانية واذا عيالها يبغون شي تراهم يدقون ما حد منعهم

حسبي الله ونعم الوكيل

بلييييييييييييييز ردو علي و قولو لي شو اسوي احس اني بموت من القهر ليش اتسوي معاي جي

وانا عمري ما غلطت عليها بالعكس خدمتها اهي و اهلها بكل اللي اروم عليه

يزاكم الله خير و يعله فميزان حسناتكم