التقويم والام الظرس 2024.

السلام عليكم بنوتات

انا ابا احط تقويم في ظروسي بس خايفة من الالم وسمعت اللي يحطون تقويم مايقدرون ياكلون شي نفس قبل ويخسرون وزنهم مادري شو اسوي وهل التقويم يأثر على الصحة وهل له اثار عالصحة؟؟ وانا سمعت انه لازم يجلعون الاسنان اللي ورا قبل ما احط تقويم صح؟؟؟؟ وكم المدة اللي لازم احط تقويم؟ الصراحة انا ماقدر اتحمل اكثر عن سنة . وكم سعر التقويم؟؟ وهل التقويم يفيد اذا حطيته وظروسي بتتعدل او مابييب نتيجة؟ مادري شوووو اسوي البنات اللي حاطين تقويم خبروني

هاااااا وينكم ؟؟

عصبت انا

حطي وتوكلي على الله …
ومن ناحيه الالم ماياخذ وقت مابين 3 او 4 ايام …
وبعدين بتتعودين عليه حبوبه …
واهم شي تهتمين بنظافه الاسنان عشان تعقينه بسرعه…والاسعار اوكيه تتروح مابين 5 او 6 الالاف ع حسب اسنانج..

وبالتوفيج ^_^

شوفي حبيبتي من ناحية الألم لازم في بداية تركيبج للتقويم بيعورج وما تقدرين تاكلين يعني كل ما إتصكين أسنانج على بعضها إتحسينهم جنة يشوطون ولثتج إتحسينها تآكلج…..وخسارة الوزن يعني ما يكون وايد يعني يمكن في البداية بتنزلين بالكثير 5 كيلو مو أكثر بس بعدين بتتعوين عليه وبترجعين مثل ما إنت….الجلع على حسب أسنانج إذا ما عندج فراغات بين أسنانج وإتحسين إن أسنانج طالعة برع وايد لازم يشيلون كم من سن مب لازم الضروس يعني ممكن إيشيلون الأنياب مثل حالتي؟؟؟؟؟؟؟؟والمدة على حسب ما يقرره الدكتور وعلى حسب مواعيد الشد يعني أنا قال لي الدكتور سنة أو سنة ونص أما بنت إخت ريلي حطت بعدي وشلتة قبلي لنه مواعيدها قريبة يعني كل أسبوع في البداية بعدين صاروا كل إسبوعين أما أنا مواعيد الشد كل 4اسابيع……….والسعر يختلف من مركز لمركز………أكيد يييب نتيجة ونتيجة حلوة ومرضية بعد…….. أنا لين ألحين ما شليتة وكل ما حد شافني قال إن اسناني تعدلت وايد معنها ما كانت متخربطة وايد..وإذا عندج أي إستفسار حبيبتي …..أسألي إحنا حاضرين للطيبين …موفقة……..نصيحتي ركبي وما راح تندمين …
ومثل ما يقولون إللي يبي الدح ما يقول أح…….ولا شو رايج حبوبة؟؟؟؟؟؟

الصراحة اول اسبوع للتقويم بتتالمين وايد وبتحسين بصعوبه بالاكل وعقب بتتعودين !وبخصوص خلع الضرس الدكتور هو اللى يقرر كم ضرس يخلع فى ناس اربع ضروس وفي ناس ولا ضرس !والمدة على حسب تقبل الضروس للعلاج!وقيمة التقويم على حسب كل عيادة وسعرها الخاص فيها ,انا سمعت ان من خمس الاف وطالع.
وبالسلامة

كيف يعني اهتم بنظافة الاسنان عشان اعقه بسرعة؟ نظافة الاسنان لها علاقة اني اعق التقويم بسرعة؟ ثااانكيووو عالرد