الرجاء من الأخوات التاجرات يساعدوني 2024.

والله ما عندي فكره وانشاء الله البنات افيدونج وبالتوفيق

مثلا انا بطلب منج اشيا اي شي من اللي تبيعينه

وبطرش لج عالخاص اسمي ورقمي ومنطقتي مثلا دبا الفجيرة

وانتي من صوبج تتصلين الشركة وتخبرينهم ان عندج طلبية تبين اطرشينها لمنطقة دبا الفجيرة

بقولولج بنخطف عليج الصبح باجر مثلا او بعضهم بيكون مقرهم جريب منكم فبيقولون لج تعالي انتي وسلمينا الغرض

احينه وصلني الغرض يا وقت الدفع

في عدة طرق منها ان ادخلهم بحسابج بالبنك او اطرشهم بالانصاري

الثانية اني اعطيها لمندوب الشركة اللي ياب لي الغرض

عاد بعضهم يطلبون مثلا 70 درهم على هالشغلانة لانه بيقولج 35 درهم للروحة و35 درهم لترجيع الفلوس

وهذا اللي كره بعض التاجرات بالتجارة ما يسوى علينا ينهبونا غصبن عنا هالشركات

احينه البنات يسوون ويا مندوبين خاصين يعني مثلا اخت مواز عندها مندوب ونحن عادي بعد نطرش ويا وما ياخذ مثل الشركات بالعكس يودي وييب الفلوس على 25 درهم تقريبا

طبعا السعر على حسب المناطق والحجم

وبالتوفيق

هلا الغاليه..

عندج شركة امبوست.. توصل الطلبيات بس يعني عندها سلم بدون استلم
واذا بتتعاملين معاها لازم الزبونه تحول لج المبلغ على الحساب البنكي أو الأنصاري..
وهم شركه زينه للتوصيل..تاخذ 20 درهم على التوصيل بس اذا بتوصلين لمناطق بعيده
يزيد السعر وتقريباً هي الشركه الوحيده اللي توصل المناطق البعيده شرات غياثي

وعندج شركة بروفيشينال هذي الشركه عندهم سلم واستلم
ياخذون البضاعة ويردون لج الفلوس وياخذون 30 درهم على التوصيل..
اللي مب حلو فيهم ان المندوب مرات ما يطيع ايي البيت ويقول تعالوا انتوا بنتلاقى في مكان
ويتأخر بعد..

شركة ايلايت هذي الشركه لوعة جبد انا بالمره ما ادانيها وفيه كثير من التاجرات يشتكن منها.

شركه ارامكس اسعارها غاليه في التوصيل من جيه البنات اللي يطرشون من خلالها يطلبون
من الزبونات تحويل البيزات على الصراف وانا صراحه مره طلبت طلبية والاخت طرشتها
على هالشركه بس بصراحه كلهم هنود ويقولون بنتلاقى في مكان ما بني البيت..

هذي هي الشركات وان شاء الله البنات يفيدونج اكثر

شوفي الغاليه انا بكتب تجربتي ..

انا توني بديت بالتجارة والحمدلله رب العالمين توفقت فيها ..

اللي لاحظته .. اكثر الزباين يفضلون طريقه سلم واستلم ..

و واايد نصحوني استخدم شركة ارامكس ,, الارامكس هي زينه لكن تكلف ,, حرام اكلف على الزبونه ..

لكن لو هي الزبونه تبغي مب مشكله اهم شي تكون مرتاحه معايه ..

.

.

استخدمت شركه ايلايت .. عمولتهم بسيطه بالنسبه للشركات الثانيه ..

ياخذون 25 درهم للتوصيل في كل الامارات ماعدا المنطقة الغربيه 30 درهم ( بس اللي يوصلون له هي بدع زايد )

وعقبها ييون عندي البيت مره ثانيه ويسلمون لي المبلغ شخصياً ..

لي وايد زباين الحمدلله من المنطقه الغربيه من غياثي والرويس فصرت اطرشلهن عن طريق الامبوست ..

واطلب منهم يحولون لي المبلغ ع الحساب .. ياخذون 50 درهم ع التوصيله ..

نصحوني بالبريد الممتاز المحلي للمناطق الغربيه ,, بس الصراحه حرام وايد غالي ..

ماكنا متوقعين انه ممكن يوصل الشحن فوق الميه درهم !!

و ع فكرة ..

خذيت رقم مندوب ايلايت اللي ييي منطقتنا وصرت كل ما اسوي اودر اتصل عليه وييني البيت ..

تقريبا اييني شبه يومي ..

يمكن بكون انا الوحيده اللي بتنصحج بشركة ايلايت .. على رغم من كثر الشكاوي اللي اسمعها ..

لكن الحمدلله انا شخصياً وزبايني مرتاحين معاهم ,, اتوقع حسب كل منطقه والمندوبين اللي فيها ,,

إن شاء الله استفدتي من تجربتي ..

ادعيلي ,,

والله ما عندي فكره وانشاء الله البنات افيدونج وبالتوفيق