القرية العالمية 2024-2024 بعدسة ^الدماني^ – الجزء الأول 2024.

ودارت الدنيا …
وفتحت القرية

ما أقول الا …..

قاصد جداكم حافي يا حلوين المشم
ولكم ضميري صافي ولغيركم ما يظم

(كلمات بابا زايد الله يرحمه)

قبل لا ندخل حبيت أبشّر اللي بيوقفون السيايير مكان بعيد وريولهم بتطيح من المشي
انه عند كل موقف في ركشات توصلكم لين باب القرية أو العكس (لين قريب سياييركم)
لاحظوا الهندي اللي محتفل بوشاح العيد الوطني

يالا نبتدي التقرير !

*** القرية الإسبانية ***

آآآآه يا زمان الوصل بالاندلس

اسميه هالقرية ردت لي ذكريات سفرتي الأولى الى اسبانيا قبل 26 سنة

مثل هالبوسترات …

اذا حقج … فبيطبعون اسمج على هذا البوستر الجاهز
امممممم .. مثلا :

راقصة الفلامنكو الشهيرة : ^الدماني^

واذا حق ريلج …. بيطبعون :

مصارع الثيران الشهير : بعلولها (مثلا يعني )

أكثر شي أثار أشجاني انه لافتات المحلات كأنها مكتوبة بطريقة البلاط الاسباني الشهير

عندهم AIR BRUSH TATOO

وهذا المحل …

متخصص في الأحذية الاسبانية اليدوية الصنع اللي تشتهر بها اسبانيا

وهذا المحل اللي يبيع ماركة Ria الأسبانية

للأطفال …

الأسعار تبتدي من 120 درهم

شوفوا هذا شقايل كيوت

وللكبار …..(الأسعار تبتدي من 200 – 400 درهم حسب الشغل)

هذا من وحي البيئة الإماراتية : …. طيطار متخفي في الرمله

أما هذا المحل اللي يبيع منتجات فريق برشلونة …

…. حبّوه الفريخات

"بُـطـُـلْ" عصير عنب خالي من السكر ومن الكحول ..
شكل الغرشه "يسطّل" بدون شي

محل تحف برونزية وكريستالات شغل اسبانيا

ملابس …

أكثر ستايلها غجري

سلاسل واكسسوارات من الكروشيه

شنط مطرزة

وفي منتجات غذائية اسبانية وايدة ..مثل التين المجفف

والبابريكا المدخّن

والغورميه فود مثل المخللات والساردين المعلّب والتونه …

وزيت الزيتون الأصلي

هذا المحل عليه اقبال …

يبيع مفارش وشالات تقليدية مطرزة يدويا (اسعارها من 500 درهم وطالع حسب نوعية الشغل)

ستاند للفرق الاسبانية الشعبية

والرقصات الإسبانية …. لاحظوا راقصة الفلامنكو بالزي التقليدي
(والشعر الغجري المجنون يسافر في كل الدنيا) مع الاعتذار لنزار قباني !

أحلى ما في القرية اللوحات اللي تصورون وياها

وهذا فنان يرسمكم بصورة كاريكاتيرية

وهذا واحد يكتب الأسماء على الأساور …
شوفوا هالإسم اللي يضحك : قرقوري !!!!!!!
أظني قصده اسم GREGORY يعني

أما هذا المحل ….

رووووعة ! يبيع زي الفلامنكو للبنوتات من كل القياسات (150 درهم)

العقود والأساور والحلق المكملين للزي …
(العقد 20 درهم ، الاسوارة 20 درهم ، الحلق 6 دراهم)

مشوط لتسريحة شعر راقصة الفلامنكو … (6 دراهم)

الشوز اللي تخبلت عليه

وطبعا ما يحلى الفلامنكو الا بالـ …….."صاجات" الاسبانية !
(الكبار 30 درهم ، الصغار 14 درهم)

ليكتمل الزي ويصبح هكذا

عندهم أشيا تذكارية ثانية مثل …

جربة ماي مصنوعة من جلد الثور (ذكرتني بأفلام الكاوبوي )

مريلة المطبخ

بتّه !
هيييييه يا بنات ! من يوم ما يانا السوليتير والفريسل ،
نسينا تماما وكليّة والبـَـتــَّـهْ …..

لعب البـَـتــَّـهْ !

منشفة (اتخيلي تتنشفين بثور !! )

بس اتحملي تلبسين أحمر عن ينطحج ! )

عروسة راقصة فلامنكو

وهذا شكلها وهي مبطّلة … "بو تيله" منوّر القرية !

أما السوفينير الرابح معانا الليلة فهو …..

^
^
^
^
^
^
^
^
^
^
^
^
^
^
^
^
^
^
^
^
^
^
^
^
^
^

فوطة الثور وحرمه !

ذكروني بقصيدة جديمة لفتاة العرب اسمها "ما ينام الليل" كنا نسمعها في السبعينات ، تقول فيها :

آه يا من بات مشغول الفكر *** ساهي لاهي ولا عنده شعور

"يوم خالين الفكر مثل البقر *** أنا في ليلي أجاوب للطيور"

أكثر شي ضحكني عند مدخل القرية هي هذي الورقة اللي حاطينها للتنبيه !!

الظاهر انه أكثر من حد حصّل له فـَـلـْـعـِـهْ بفعل فاعل وهو هالديكور

بقية التقرير في الصفحة التالية