الوسواس والخوف والرهبة هم اساس تعاستي في الحياة 2024.

السلام عليكم ورحمة الله وبركاتة

انا انسانة وقعت فريسه الحالات النفسية والخوف والرهبة من كل شي
قبل كم سنة كنت انسانه عادية اروح اي مكان واركض واشيل واحط واضحك وازعل مثل كل البشر

الين ما صرت فريسه ومقيده بمفهوم الخوف والرهبة والوسواسية

بخبركم كيف لاني لاحظت كثير نفسي لكن محد يتكلم خوفا من نظرة الناس وحتى الاهل

الناس الي حوالي كانوا يمدحون ادبي وهدوئي والكل ينعجب في شخصيتي
الين ما صار موقف غير مجرى حياتي كله وهو ان زمليتي كانت مسويه عزيمة في بيتها وكانت يايبة اكل من بيت ربيعتها وتمينا ناكل ونسولف وعقب عرفت ان الي مسوية الاكل وحده ما اعرفها وصديقة زمليتي
ويوم شفتها سلمت عليها شكرتها وثاني يوم طلعت هالبنت صدفة وياي في رحلة لمدة 3 ايام وتمينا ربع وعقبها بيومين

البنت انقطعت اخبارها الي كانت طابخة الاكل وقالت لي ربيعتي ان هالبنت مريضة فقلت لها سلامات شو بلاها قالت لا هي من يومها مريضة وسايره الحين الفحص وهذا شي عادي

هني وقف قلبي وسالتها بنبرة حادة شوبلاها البنت من شو تشتكي فضحكت وقالت ما بلاها شي. تميت اوسوس عن حالة البنت وخفت من الاكل الي كلته ومن قعدتي وياها لاني تسلفت منها اشياء من اغراضها وهي نفس الشي وتميت افكر
وثاني يوم نفس الشي البنت ما عرفت عنها شي وتميت احن على ربيعتي تقولي شو مرض هالبنت فقالت لي ان فيها فايروس في الدم من يوم هي صغيره ويعدي عن طريق نقل الدم بس ولكن هي الحين تتعافى.

وانا هني خلالالالالالالالالالالالالالاص دارت فيني الدنيا وعصبت وقلت لها كيف يعني فيها فايروس في الدم قالت لي بلاج انتي ليش محتشره هذا شي عادي هالبنت مريضة لكن انسانة عادية وصاحية وتسير الفحص الدوري لا اكثر ولا اقل

وهنا بدأت ماساتي الحقيقة رجعت البيت سكرت على عمري باب الغرفة وتميت اصيح والافكار توديني وتردني واقول لا يكون انجرحت وهي تسوي الاكل ويمكن ..ويمكن … ويمكن او يمكن تعديني يوم سلمت عليها باليد او خذت شنطتها

وعفت والله العظيم الاكل صار اكلي قليل وايلس بين اهلي سرحانة مب وياهم وقلبي دقاته تزيد مب طبيعية . وحرمت عمري من كل شي وتميت حبسية الغرفة وفتحت الانترنت وتميت ادور عن اي مرض يشببها واشوف الاعراض
واتخيل عمري فيني هذه الاعراض واقعد اصيح بروحي في البيت واتخيل اني اموت واخلي اهلي.

عشت في هذه الحالة شهرين برووووحي بدون محد يعرف وفي يوم طلعت للصالة البيت ويوم شفت اهلي اغمى علي من التعب والتفكير واهلي خافوا علي وشلوني للمستشفي خايفين علي وطول الدرب يوم رد لي وعيي تميت اصيح واقولهم ما اعرف شو بلاني ودخلوني المستشفى وسوولي فحوصات والدكتور قال لاهلي بنتكم ما فيها شي غير الضغط النفسي . واهلي قالو يمكن من الشغل لاني ما قلت لهم شي.

وعقب ما ردت لي صحتي شوي وبديت امشي رحت للمستشفى وانا ادعي ان مافيني شي وطلبت منهم يسوون لي فحص شامل واهم شي فحص الدم
وسوولي كل شي وطلعت سليمة الحمدلله لكن للاسف كنت خلاص اصبحت انسانة خايفة وسواسية

ولكن كان الوقت ضاع معاي لاني اصبحت انسانه مريضة نفسيا
مثلا اذا اشتريت شي يديد افكر منو سوا هالشي ويمكن كان مريض وبينقلي المرض
فبديت اغسل كل شي اخذه حتى لو قلم. والله اكتب لكم والعبرة خانقتني على حالي

واذا سرت مكان فيه ناس وايد اكتم النفس لاني اخاف من الامراض ومستحيل اسير صوب الهنود والارضيات الي فيها ماي لاني قبل لا احط ريلي على الارض افكر في مليون شي واتردد

واذا اشتريت شي يديد امسكه اول شي بالكلينكس واقلبه واتاكل انه مافيه شي واذا شفت بقعه غريبة ارمية في الزبالة ولا افكر فيه واذا يبت شي مثل الكتاب او الاكسسوارات لازم امسحهم بالعطر عشان يتطهرون

عقبها تعبت من حالي بدت اتيني ضيقة من البيت ومن حالتي ومن كل شي حوالي مع اني انسانة اصلي واقرا الاذكار وامي شافت حالتي وودتني عند مطوع واول ما سرت له قال عليج بالقران والانسان هو طبيب نفسه

وتميت اقرا القران على فترات مب متقاربة لاني للاسف مب ملتزمة وايد في قراءة القرآن. لكن استمريت على الرقية الشرعية ولقيت مواقع للرقية ولكن للاسف ما اكمل درس الرقية واوقف من البداية وما ادري شو السبب

الحين يا بنات صحتي الحمدلله ردت لي لكن المشكلة الوسواس الي ذابحني
اي شي يطيح في ايدي لازم اسير اغسل ايدي او اني اغسله لدرجة اني الشنطة اذا اشتريتها لازم اغسلها من برع والطاولة اذا يديده لازم امسحها بديتول
والياهال ما اقدر احضنهم اخاف شايلين وياهم فايروس من اللعب مع الصغارية الثانيين
هذا غير ان دقات قلبي صارت سريعة حتى لو يالسه وما اسوي شي
واذا تعبت وزادت الدقات تشوفون جسمي كله ينبض من قوة دقات قلبي وتصيبني دوخة وخوف ورهبة ولكن يوم حد يسالني شو بلاج اقولهم دوخة بسيطه واسكت لاني اخاف او استحي اقول لحد لان محد بيفهمني وهالشي الحين صار له 3 سنوات

هالمرض ابعدني عن كل الناس بديت احسن اني غريبة من مجتمع اهلي
وعلى فكرة كل هذا الي يصير لي ومحد ملاحظ لاني امثل جدامهم باني عادية

لكن اذا يتني حمى افكر واصيح بيني وبين عمري وشو الي صار لي
واذا اختي زعلت مع خطيبها او اخوي زعل مع خطيبته اتيني حالة دخونه ودقات قلبي تزيد واتعب واهلي يستغربون مع ان الفحوصات تثبت باني سليمة
حتى في الدوام اذا حد صار فيه شي اتعب وما اقدر امشي من الدوخة ودقات قلبي تزيد

لدرجة ان الحين محد تقدم لي وما اعرف شو السبب مع اني حلوه وطيبه بشهادة الجميع ولكن الناس كلها تشوفني ولا كاني بنت حلوه او طيوبة
كل هالاشياء ترسخ في بالي وافكر فيها

مع اني الحين اسير النوادي واتمشى والعب واضحك لكن لين الحين الخوف والتفكير في بالي ما راحوا عني واخاف من المستشفيات وما اسير لحد من خوفي الا اذا كانو اهلي واذا سرت مستحيل ادخل الحمام مالهم لاني افكر في الف فكرة ويمكن الي كانت قبل هني مريضة وبتعديني

انا عايشة مع الوهم والوسواس 3 سنوات

3 سنوات من عمري راحو في خوف وبكاء وهم ووسواس

دائما ادعي ربي اني اكون انسانة عادية لكن ما ادري شو بلاني
ورب العبادة رحمته واسعه وان شاء الله يعافيني ويفك همي وكربتي
اتمنى تدعولي ان الله يفك كربتي ويرزقني بالشخص الي يقدر وضعي النفسي

وخاطري ارجع مثل اول انسانة عادية

لا حول ولاقوة الا بالله … وعليج بالرقية .. واللي ايخليج اتكملين الرقية هذي وساوس شياطين .. خليج اتنتي اقوى منها .. لانه هذا الحل .. وحاولي اتصارحين هلج بموضوعج .. انا ما اشوف فيها شي اذا صارحتيهم .. بالعكس بيهتمون فيج .. وبيحاولون يتأكدون من الفحوصات عسب يطمنونج .. لأنهم يبون مصلحتج

اختي الوسواس من الشيطان الرجيم

لا تستسلمي له وتخليه يضيعج

استعيذي بالله من الشيطان واستغفري ربج وكثري من قراءة القرآن والصلاة وقيام الليل

صدقيني نفسيتج بترتاح

والله يبعدعنج الشر والاذى

وصدقيني حتى هالبنت لو فعلا انجرحت وانتقلت العدوى لو الله مب رايد انج تمرضين ما بيصير فيج شي

والعكس حتى لو كانت تعقم كل شي او اي حد تتعاملي معه وهو مريض والله رايد ينتقل لج المرض بينتقل باية طريقة ومن غير ما تحسي

يعني باختصار كل شي بأمر الله تعالى

واذا الله مب رايد شي ما بيصير لو وساوس الدنيا والاخرة في راسج

ديري بالج على نفسج واهتمي بصحتج وربي يبعد عنج الشر والاذى

هلا قلبي الله يشفيج عيوني انا انصحج انج اتسيري دكتور نفسي بيعطيج علاج للوسااوس وبيخووذ ان شاالله عنج وربي يفرجهاا عليج الغاليه

حبيبتي انا بعد كان فيني مرض نفسي ،، بس مب شراتج ،، كان فيني نوبات الهلع او الذعر،، كله قلبي يدق واخاف اموت ،، وما كنت اطلع وجي

المهم اللي خلاني اتعالج هو اني دخلت موقع اسلامي وهو فيه اطباء نفسيين بيعلمونج كيف تتغلبين على هاي الحاله،، بدون محدي يدري وبكل سريه

الموقع هو www.islamweb.net

اكتبيلهم مشكلتج وهو بيساعدونج اكيد ،، واذا ما تعرفين كيف خبريني ،، او اذا تبين انا بطرشلهم موضوعج ؟؟ انتي آمري ،،،

وحااااالتج من ابسط ما يكون،،

يزاج الله كل خير
الموقع ما يشتغل