ادري طفرتكم بسوالفي بس هالمره حبيت افضفض شوي و استشيركم
بغيت أسأل.. البنت المالجه تمشي على شور ريلها و لا على شور ابوها لانها بعدها في بيت ابوها ؟؟؟
انا ابوي الحمد الله الحمد الله يثق فيني ، و ارد البيت متأخره احيانا .. مب متأخرر وايد بس فالويك اند ارجع عال 11 لين 11 و نص … فالأيام العاديه اكون تعبانه من الدوام اصلا 9 المسا تلقوني فالبيت
و ريلي كل يوم يطلع لي بطلعه .. مره يقولي ماباج تسوقين فالليل روحج ! و مره لا تطلعين ويا ربيعاتج !! و امسات محتشرر عليي يقولي انتي وايد تتأخرين برع !! ,, يعني طول هالسنين و توه اكتشف سبحان الله !!
ملاحظه // شي وايد تصرفات مني كانت تعجبه قبل الملجه يوم كنا حبايب .. و عقب الملجه اشوف كل شي انقلب ضدي !! يعني طلعاات الليل كان وايد يحن عليهااا !! اكون ويا ربيعاتي و يحشررني الا يبا ييلس معاي شوي !! الحين استوت طلعااتي ما تعبجه !! عجييب والله !!
هو يعرف انه ابوي يدري عن طلعااتي و عمره ما اعترض …لكنه يوم يدق شي في راسه بدون سابق انذار يتأمر عليي و يصدر أحكاامه !! و يبغي كلامه يمشي غصب طيب ..عاد انا البارحه طلعت و تمشيت و ما رديت على تلفوناتي .. كلمته اليوم و قالي انا تعبت منج ما اعرف شو اسوي وياج ؟!!
انا توقعت بيعصب و بيحتشر كالعاده بس الحمد الله ما احتشر ..لكن مادري انتوا شو رايكم فالموضوع ؟
انا ما احس اني غلطت .. و ما أبغي الغي حياتي كلها عشان أمشي على هواه ..
في انتظار رايكم حبيبااتي .و لا تنسووني من دعواتكم
بدون بدون بدون زعل
100% انتي غلطانه والله .. اولا الحرمه غير الريال .. المفروض ماتتاخر لا ويكند ولا غيره
والشي الثاني يا اختي زوجج اذا تغير ع قولتج .. هذا شي طبيعي مليون بالمئه لانج احينه مرته يعني جزء منه قطعه منه يعني
انتي سمعته وشرفه وعرضه …
ومن الطبيعي انه يغار عليج ويحرص عليج ويمنعج تتاخرين او حتى تطلعين
والحرمه السنعه تكون مطيعه لزوجها ويكون اول اهتمامتها وماتناظر الامور الثانيه ..
وادعي الله ان يجمعكم ع خير وتتوفقين في حياتج
والسموحه
بـس من رآيي ان الريـآل بطبيعـتـه قيـآدي يعنـي هو اللي يمـسـك زمـآم الامور خصـوصـآً إذا كـآنت متعلقـة فالبيت والحرمة والعيـآل … امممم مـآااقدر احكم عليـج بس من كلامج فهمت ان عادي عندكم البنية تطلع ويآ ربيعـآتهـآ وتتأخر .. عكسنـآ تمـآماً ,, بـس مـآعليـه اختي ليـش مـآتآخذين هالشي بمنظور ايجابي مثلاً انه يغار عليج ويحبج ويخآف عليج .. صدقيني حآولي انج مآتخلينه يلقى عليج شي وانه لو شو مادور مابيلقى وحتى لو لقى بتتصلح ..
انتي بيدج تخلين حياتكم سعيده وتبدينها بدون مشاكل ومحبه وبيدج تخربيهـآ ..
اللــه يوفقـج ويسـعـدج ..
سوي لج جدول حلووو مرتب دامج مالجة
سيري نادي رياضي – صالون – ربيعاتج – ريلج
يعني حاولي تنوعين ف طلعاتج
خفي شوي من طلعاتج حبيبتي ما في ريال يرضى ان حرمته تظهر لين الساعه 11 او 12 مع ربيعاتها
اطلعي مب مشكلة دامج متعودة ما بتحس فيج الا اللي شراتج
انا شراتج ترى اظهر و اروح و ارد بس مخففة طلعاتي ها الايام
وحاولي اتيمعين كل مشاويرج للسوق وجي ف يوم واحد عسب ما تظهرين كل يوم
يمكن الريال يريد يعودج ع الوضع اليديد يبا تسمعين شوره ما بيصر بج شي لو سمعتي كلامه بلعكس راح تكبرين بعينه
يوم قال لج انا تعبت منج ما ادري شو اسوي وياج ؟ يعني انتي يمكن ما تسمعين كلامه
حبيبتي طيعي ريلج دام انتي ف بيت ابوج
ربي يوفقج
اتمنى منج ما تزعلين ن كلامي
والسموحة
مافيها شي لو الحرمة تسمع كلام ريلها
لو كل حرمة وريال يسمعون ويتفاهمون و بينهم احترام لبعضهم بعض كان ما شفنا نسبة الطلاق مرتفعة فالبلاد..
الله المستعان ..
هذا ريـــــــــّـال ومقياس حبه لج هو الغيره…… والحمدلله انه يغار عليج موووت
والبنت من تملج شورها يكون فإيد ريلها مش ابوها…. خلاص بينكم عقد زواج الحين
ونصيحة لله والله يا اختي…. طاوعي شور ريلج عن يرد عنج ويقول هالحرمة ما تطيعني….
والكلمة اللي يقولها هي اللي المفروض تمشي…
اذا مايبيج تطلعين لا تطلعين
يباج ترجعين بوقت معين ترجعين …
والمفروض تردين على جميع مكالماته ما تطنشينه….. صدقيني الريال يوصل لمرحلة وبعدين ينفجر…
هالشي مش في صالحج ابد…… بعد الزواج مشـّي كلمتج عليه بس مش الحين…
غلط غلط غلط
الله يوفقج