بنات العين فزعتكم . طلبتكم ممكن تساعدوني في اختيار الصالون المناسب 2024.

مرحبا الغاليات

حبيت اسئلكم عن احسن الصوالين النسائية في العين … و يعنني كل صالون و شو اللي يميزه.. مع اسعار الخدمات … لأني حاسة الصوالين عندنا في العين .. يتميزون بشغلة معينة مثل الحنه… و باقي الخدامات مب ذاك الزود

و بعدين انا ما عندي خبرة وااايد بالصالونات … و ربيعاتي نفس الشيء … يعني نادرا ما يسيرون .. و يجيبون وحدة البيت علشان يمكيجونها :22 (3):

و الاحسن اني لازم ابينلكم الصورة عن نفسي :1 (19): و المشاكل اللي عندي … يمكن تساعدوني بشكل افضل

يعني اذا ما عليكم امر تخبروني شو احسن الصوالين في الصبغ و القص( قص صبغ الشعر و الهايلايت شرات اللبنانيات) و انا افضل الصالونات اللي تتعامل بصبغات ماركة ويللا او كادوس او لوريال .. لأني سرت صالون بشارع الجوازات .. و حرقوا شعري بصبغة اسمها اندولا أو اندومي هههه .. … و خاطري اسوي حمام مغربي سنع … لأن لون جسمي غير موحد .. و ظهري مبقع باثار حب الشباب من ايام المراهقة…… وحدة قالتلي ان الحمامات المغربية هني مب بذاك الزود .. يعني حيالله شغل … و ابا اعرف كيف يسوون الحمام المغربي … شو المواد اللي تضيفه الصوالين اللي انتوا تتعاملون معها … و يكون شغلهم فيه نتيجة.. او ما يجيب اي نتيجة …… و تنظيف البشرة … انا ويهي فيه مشاكل واااايدة .. مثل الرؤوس السودا .. و اثار الحبوب الشباب صار لونها بني و بني غامق … و الالوان الغير متجانسة في الوجه… يعني ويهي مبقع ..

و شو احسن الصوالين اللي تحني غير صالون العروس " بس حناها حلو و مميز و في حركات.. و اسعاره بنفس الوقت معقولة" … و الصوالين اللي تسوي المانيكير و الباديكير عدل … لأني سرت صالون **** .. ما شفت فيها شيء .. بس الفلبينية قصت الظفور و عدلت شكلهم و نظفته بماي و صابوون.. نفس الشيء حق ريولي و فوق هذا خذت 60 درهم مني… لو دريت جان سويته الحركة بالبيت هههه .. انا اشوف بالتلفزيون يسووين اشياء ثانية .. يعني مستحضرات و كريمات و حركات

و بشكل عام احسن الصالونات اللي تسوي حف الحيات (حواجب).. و تسوي حلاوة للجسم او حتى الشمع .. سشوار و حمام زيت

و ياليت يا بنات تساعدوني و تدلوني على صوالين زينة … و الله وايد يهمني ان يكون ويهي و جسمي نظيف و مرتب و لونه موحد :22 (25):

و لا تنسووون الاسعار لكل خدمة

و يزاكم الله الف خير …

مرحبا حبوبه
انا حابه اخدمج في اسماء الصوالين السنعه بس المشكله ماقدر احدد الاسعار
عندج صالون عبله لحف الحواجب مووووت واااايد حلو والحرمه صينية اسمها (سو) وتسوي بعد حمام مغربي يمدحونه
وعندج صالون سنو وايد للحمامات المغربية بعد وايد حلو… حبوبه … المشكله ان توحيد لون الجسم عن طريق الحمامات المغربية مايبين من اول جلسه
يعني يبالج فتره …و انصحج تسويين لعمرج دلكه يعني سنفره عباره عن شوفان مطحون مع حليب … وتفركين بها جسمج كل اسبوع
وشوفي شو يصير لونج !!!
اما الميش والصبغه يمدحون صالون برامافيرا … بس انا ماجربت الصبغه … احب اقص شعري عندهم
والبدكير والمناكير اكيد اكيد اكيد في نيل فاشن في مجمع الامارات
واعتذرلج في النهاية اني ماعرف الاسعار بالضبط
تحياتي

السلام عليكم ورحمة الله وبركاته

:1 (26):

مرحبا أختي رووح ^_^ وحياج يالغاليه

بالنسبة لمدينة العين والله ما بمدح لج صوالينها يعني بصراحة كثرة بس على الفاضي :1 (25):

بس وللأمانة بالنسبة لقص الشعر والصبغ والهايلات عندج صالون (( بريمافيرا )) اللي خلف تيب توب ومحلات السلام قديما بصراحة عندهم وحدة اسمها (( ريم )) :1 (32): خبرة ماشاء الله بالقص والصبغه يعني ماعليها كلام وأحسن وحده بالعين و مكياجها روووووعة للعرايس…أما العاملات الباقيات صراحه ما امدحهن لج يعني لا تغامرين وايد . :1 (22):

بالنسبة للمكياج بعد يمدحون مركز الأفراح عند مدام أنصاف بعد مكياجها حلو والمناكيير والبداكيير عندهم وحده فلبينية اسمها ( لين ) تسوي حلو وشغل مرتب وماتحط صابون وديتول ههههههههههههههه

بالنسبة للحنه أمممم صراحه أنا ما قد شفت في الصوالين حنا حلو مثل حنا صالون العروسه ، بس أنا أتعامل أكثر شي مع وحده اتييني للبيت صراحه حنا ما في مثله بس مشكلتها انها دايما ( فل بوكيت ) يعني اذا تبينها لازم تحجزينها بفترة
بس خذيها مني حناها ( نمبر ون ) واسمها ( نورة )

بالنسبة للحمام المغربي فما أنصحج يالغاليه فيه وايد وخاصه بالصوالين عملاً بقول الحبيب صلى الله عليه وسلم :" أيما امرأة وضعت ثيابها في غير بيت زوجها فقد هتكت ستر ما بينها وبين الله عز وجل " . يعني خذيها مني كأخت لج لا تبيعين دينج بعرض من عرض الدنيا ترى الأمر ما يستاهل وتقدرين تسوينه يالغاليه في البيت ترى الامر مب صعب وبإذن الله بحط لج في موضوع ثاني طرق الحمام المغربي في البيت ، وترى يالغاليه نفس الشي ينطبق على الحلاوة وأي شي يخليج تضعين ثيابج في غير بيتج …وياليت نحط هالسالفه في اعتبارنا

عندج صالون عبله لحف الحواجب مووووت واااايد حلو والحرمه صينية اسمها (سو)

اللي باللون أحمر اقتباس من رد أختنا العزيزة ( أول الفجر ) حبيت بس أنبه لنقطه تغفل عنها كثير من اخواتنا الحبيبات
واللي هي تساهلهن في سالفة ( حف الحواجب ) يا أخواتي هناك حديث صحيح ينذر من تحف حواجبها بأنها ( ملعونة ) والعياذ بالله واللعن يا غاليات هو الطرد من رحمة الله …يعني بصراحة نحن ندور رحمة الله سبحانه وتعالى في كل أمر وندعوووه انه ياااارب ارحمنا برحمتك يعني نحن محتاجين لهالرحمة في كل وقت ..في همنا وغمنا وضيقتنا محتاجينها لأننا بدون رحمة ربنا الغالي ما نقدر نمشي في حياتنا …وكل وحده منا عندها حاجة وعندها ضيق وهم في هالدنيا …وإذا فجأة طحنا في مصيبة رفعنا ايدينا الضعيفة جذيه وبدون ما نحس لرب العالمين نرجوووووه انه يرفع عنا الهم ويفرج عنا الكرب ..والله العظيم يا غاليات مهما بلغت ذنوب الواحدة منا ومهما بلغت غفلتنا الا اننا في ساعة ضيقتنا اول شي نسويه اننا نطلق كلمة يااااارب من قلوبنا بكل صدق بإن الله يسهل علينا … فكيف بعد هذا يا غاليات نعرض أنفسنا للطرد من رحمة رب العالمين ونحن أشد المحتاجين لها ….. نعم يالغالية ننطرد ونصير من اللي غضب الله عليهم وحبيبنا صلى الله عليه وسلم يقول : لعن الله الواشمات والمستوشمات، والنامصات و المتنمصات، و المتفلجات للحسن المغيرات لخلق الله .
والنامصات هن اللي يحفن حواجبهن ….فما أدري يعني ..هل الامر يستاهل بحيث اننا نغامر ونعرض أنفسنا للعن والطرد من رحمة رب العالمين في سبيل ان الحواجب تكون على الموضه أو على ديزاين هذيج الممثله أو المغنية
ياليت انه تفكيرنا يكون أوسع من جذيه وأرقى من جذيه واننا اذا قلنا بأفواهنا اننا نحب الله ، نثبت بالفعل هذا القول ، ولا نجعله مجرد كلمة تلفظ بها اللسان ووقفت عند بابه.

وياليت نتذكر كلنا قول حبيبنا صلى الله عليه وسلم أن " من ترك شيئاً لله عوضه الله خيراً منه "

آسفه غالياتي يمكن طولت بالرد ولكن وربي ما قلت هالكلام الا من محبة صادقة الكن

وان شاء الله أكووون أفدتج (( روووح )) ولو بشي بسيط من استفسارج ^_^

والسمووحه

أختكم

night candles

ماشالله ما قصرن بنات العين ..

هلا عزيزتي….

والله بغيت أفيدج… بس البنات ماقصرن ماشاء الله عليهم…

بس بغيت أنبهج لمسألة (( حف الجواجب))… تراها حـــــــــــــــــــرام… وماقصرت الأخت نايت كاندلز في بيان الحديث الصحيح.

والسموحه الغاليه ع المداخله.

اول الفجر

تسلمين الغالية على مساعدتج و معلوماتج … و يزاج الله الف خير … و ان شاء الله عن قريب بسير للصوالين اللي ذكرتيها

night candles
مشكورة حبوبة على المداخلة و الشرح و التعليق … الصراحة خجلتيني … وبتريا موضوعج عن الحمامات المغربية اللي بتكون بالبيت

designer stylish
صدقج و الله يالغالية … ما قصرن الاخوات معاي .. و تسلمين حبيبتي على التفاعل و المرور

ميرة دبي
مسموحة جبيبتي على المداخلة … و يزاج الله الف خير

هلا حبيبتي

ما بزيد شي على البنات بسالفة الحف لانها حرام شرعا

بس بالنسبه للحناء .. فأنصحج بصالون ( الحياة ) انا متحنيه هناك يوم عرسي .. وطلبي حياة نفسها اتحنيج وحناها للعروس الايد كامله بــ (( 300 )) درهم … بس يمدحون حنا (( العروس )) يعني ييبي الحنا من العروس وخلي الحياه اتحنيج

وبالنسبه للصالونات الا تقدرين اتسيرين لها بالعين

.. صالون كنز لبنان ..
.. صالون حنان شقير ..
.. صالون برامافيرا ..
.. بتافيا ..
.. الأفراح ..

وأتمنى اني أفدتج

.. أختكم في الله ..