بسم الله الرحمن الرحيم و السلام عليكم و رحمة الله و بركاته
حبيت أشارككن وياي طريقتي للحمام المغربي بـ استخدام صابون الطاووس الملكي
أنا مرتين جربته و الحمد لله المره الثانيه ضبطت و النتايج كانت فعاااله ما شاء الله
فـ حبيت أشارككن عشان اللي حبت تستفيد .. ^^
و عشان نشجع أكثر العديدات إنهن يسون هالأمور فالبيت برووحهن .. السموحه منكن خواتي
لأني أبدا مش من مشجعات عمل الحمامات المغربيه فالصوالين و هالسوالف
و بالأخص للمتزوجات و السمووحه 
بسم الله
بنستخدم . . .
[ 1 ] .. صابون الطاووس الملكي
خذته من كارفور و سعره إذا ما خاب ظني 11 درهم أو 12 .. مناسب للجميع ان شاء الله
[ 2 ] .. قفازات
متوفرات بكثره حاليا
[ 3 ] .. ليفة الحمام المغربي
ماخذتنها من كارفور و سعرها كذلك فيي متناول الجميع ان شاء الله
أعتقد إنها ما طافت الـ 15 درهم
نبدأ ..
أول شي .. تنزلين تحت الشاور و تبطلين عالماي الساخن .. " مش اللي يحرقج عاااد 
" .. لأ
يعني الدرجه اللي تخلي الجلد مرن و جاهز لعملية التقشير .. الماي الدافي العادي ما أفضله
أفضل اللي أحر عنه بشويه ..
تمي عالماي شويه و يوم بتحسين إن جلدتج اكتفت و صارت جاهزه سكري الماي
البسي القفازات و ابدي مسحي الصابون على جسمج من رقبتج إلى أخمص القدمين مثل ما يقولون، طبعا اقترحت إنج تلبسين القفاز خلال عملية دهن الجسم بالصابون لأنه الصابون ثجيييل و مب وايد لين ..
فأنا يوم كنت أشل و أحط بيديني منه تووهقت صراحه، يوم بديت أدهن بالقفاز حسيت الوضع واايد أفضل
هنيه فالصوره يبين عندج شكل الصابون
عقب ما تخلصين داهنه جسمج بالصابون .. شلي القفازات و ابدي مسحي جسمج بيدينج، يعني مثل تدليك
بسيط للصابون عالجسم
بتلاحظين من البدايه الصابون يوم ينحط خفيف ما يعطي رغوه قويه .. رغوه خفيفه بيضا
و كثير من الأماكن ينشف فيها
مكتوب عالصابون عقب ما تتدهنين به اتريي دقيقه .. أنا اترييت عقب ما دلكت الصابون على جسمي بيديني مدة دقيقتين تقريبا
بعدين تبطلين الماي مره ثانيه .. و لكن أدفى عن قبل تكون درجة حرارته من الدافيه للعاديه
و تغسلين جسمج من الصابون
لا تتفركين وايد خلي الماي يشل الصابون بروحه و عقب سكري الماي
و ييبي الليفه المغربيه …
قبل ما تبدين تتفركين بها إغسليها و تأكدي من مرونتها لا تتفركين بها و هي جافه و لا مب مرنه وايد
عشان لا تجرح جلدج ..
و ابدي عااد تفركي بها .. على جزء جزء و بطريقة دائريه أو مثل ما تحبين بس تفريك عددل مش خطاافي و السلام و لا إنه بعد القوي اللي بيجرح بشرتج
يتلاحظين كيف الجلد قام يطلع جداامج بكميات و يتقشر زيين ما زين على قولة ربيعتي
" بتشكين إذا كنتي تسبحتي قبل في حياتج " ..
خلصتي .. شغلي الماي مره ثانيه و تغسلي عاد بصابون شاور جل عاادي و بدرجة ماي عااديه
انتبهي و انتبهي تتغسلين بماي سااخن عشان جلدج بيكون تووه طالع من عملية تقشير و يديد
و يباله ترطيب و حماايه مب شي قوووي عليه .. الماي الساخن بيصلخج
و جوفي كيف و انتي تتغسلين فهاللحظه كيف ان شاء الله بشرتج صارت نااعمه و نتاايج الحمام
كيف سوت فيها
و جيه نكون خلصنا الحمام المغربي .. و نعيماا ان شاء الله يا خواتي
بتلاحظوون الفرق و بقوووه ان شاء الله
أنا المره الأولى ما طبقته صح فما حسيت بأي نتيجه و ودرته و رديت من فتره أسويه و الحمدلله
التطبيق كان صحيح و النتايج كانت فعااااااله ما شاء الله
عقب الحمام يبالج ترطيب لبشرتج حاولي إنج تتدهنين بكريمات عالية الترطيب مب الخفيفه
عشان تحافظين عبشرتج و نعومتها ..
ان شاء الله تستفيدن للي يبن يجربن و مثل ما قلت الطريقه سهله وااايد و مافيها عباله
شخصيا مش ملتزمه بهالحمام أسبوعيا لأني استخدم كذا سكراب فـ أحاول أنوع
و أخلي بينهن فترات لأن حطن في بالكن التقشير للبشره دائما و بكثره بيأثر فيها عكسيا
يعني حاولن ترتبن جدول لهالأشيا بحيث ما تضغطن على بشرتكن واايد فتتهيج عقب ..
و الله يحفظكن و يرعاكن .. الموضوع جهد شخصي اللي حبت تنقله بالعافيه عليها
ماعندي أي مانع
تسلمين و الله يعطيج العــآفية ،
.
.
.