خسرت صديقتي الوحيده وللابد وانا ندمانه على كل مافات 2024.

السلام عليكم

بخبركم يا بنات سالفتي ولاني مب اول مره اكتب مشاكلي ف هالقسم

من دخلت الجامعه تعرفت عليه بنت .. على اسا انها معجبه فيني وخذت رقمي من اربيعتي الثانيه ورمستها اول مره ومن رمستها قالت لي انها تحبني .. وانا استحيت وقلت لها انا بعد احبج ؟ لانها بنفس تخصصي بس اهي فهمت الموضوع غلط ..

المهم .. اهي ف السنه الاولانيه كان تفكيرها غلط يعني يوم ابي اروح البيت تقول تعالي حمام الجامعه ويوم اروح ابي اعدل شيلتي او شي .. تحضني من وراا وتم ماسكتني وتلمس جسمي وانا استحتي واخوز عنها

مرت الايام واهي ع هالحال قلت لها انا اباج ابا صداقتج بس هالاشياء ماباها وانا الصراحه من نوع المزاجيه وساعات عصبيه ..

المهم البت طيبه واااايد .. يوم ورا يوم يو شافتني اعصب واخوزها ودرت انها تلمسني وهالسوالف
وحافظت ع حبها لي وصداقتها بدون حركات ..

والله العظيم يا بنات لو شفتو شكلها بتقولون مايخصها بهالسوالف واهي بنت شاطره ف الجامعه الاولى ع دفعتنا .. ومب مال ميكب عكسي يعني ..

هالبنت غيرت حياتي وااايد وتقريبا صارت صديقتي الوحيده .. بس كنت دايما اعصب عليها واصارخ عليها ومرات احرجها صوب البنات بس والله موب قصدي كانت تستحمل وكل شي وانا اعترف بهالاشياء اني ف البدايه ماكنت وياها اوكيه

مرت سنتين معاها تقريبا دايما مشاكل بيني وبينها بس مانتفرق .. وانا عاد من صوبي يعجبني هالشي ومنو مابيعجبه وحده تحبها وتراقبني ف الجامعه وتسويلي بحوثي ويوم نزل معدلي كانت واقفه وياي وكل شي .. جزاها الله الف خير

بعدين وهالسنه تحديدا .. صارت وايد قاسيه وانا مالومها اكيد بس الحين عاد ب الهفتره صرت اباها

احسها عقلت وتفكر ك صداقه يعني مب شرات قبل حبتني عشان شكلي ؟
الحين احسها اقرب لي .. بس شو اهي الحين ماتباني صارت قاسيه وانا بعدي اصيح عالاطلال واذكرها بالماضي

البارح الخميس حاولت اكلمها ويات الجامعه رغم ان ماعليها كلاسات .. قعدت وايها ابا اقول لها خلاص زعل وانسي اللي صار .. وخلينا نرجع ربع .. وكنت كاتبه كتاب عن يومياتي معاها يوم نتفارق وكل شي يبته عشان تقرا اني مب عادي عنجي فراقها . عكس ماكنت اهي تتصور

بس تفاجات انها غير وع طول تقول انتي غير عني وانا مابا بس .. قلت لها انا اعرف اني قسيت معاج بس بنفس الوقت في اشياء كنتي تسوينها غلط . وماحبيت اسكت عنها بس انتي الاقرب لي وتعرفنيني ونعرفين تصرفاتي ..

ومب راضيه ابدا .. ماكان الا خليتها قاعده ومشيت وانا اصيح وخليت الكتاب عندها . وتغيرت قاعده تصارخ عليه يعني مول مب اربيعتي اللي اعرفها ..

وليله البارح مارقدت اطرش لها مسجات واهي ابد ماترد تقول انها ماتباني ومادري شو
بنات لا تقولين اني قسيت معاها وهذي جزاتي بس كل مشكله كانت اهي طرفها وانا والحين انا ندمانه واباها واهي ماتباني والله العظيم من كثر الصياح زجمت وحرارتي مرتفعه .. ومالي نفس اكل

وهذي سالفتي والسموحه لاني طولت .. وفي اشياء وايد بينا ماكتبتها للوقت يعني ..

انا الحين اباها واهي ماتباني وتاسفت وكل شي ,, وماعندي غيرها وانا مب اجتماعيه .. وماعندي صديقات شسوي بها وشو الحل ..

فديتج من البدايه علاقتج فيها غلط
حتى لو فيه ايجابيات ونصيحه لاتعقين عمرج لا عليها ولا على حد
البنات وايد وتقدرين ترابعين بنات تفكيرهن نظيف
والسموحه منج

رايي من رايها

ربي يوفقج و يكتبلج لي فيه الخير

حبها لج للمصلحه تبي تكونين وياها احباب
وهي يوم شافت ماشي امل منج
بانج تحبينها حب تغيرت قالت ماشي فايدة هي ماتحبج كصديقه
وهي بذاك الوقت كانت تحاول فيج والحين تغيرت قالت ماشي فايده
اختي انتي تعتبرينها صديقه لكن هي شي ثاني تحبج حب يعني ياتبادلينها يا الفراق هاي سوالفهم
ونتي ماقصرتي فهمتيها ان تفكير غلط لكن هي مب طايعه
حاولي تتعرفين ع بنات وكوني صداقات بدون ماتتعلقين

مافيه انسان يتم مثل ماهو كل حد يتغير
وبعدين علاقتج فيها كانت غلط

تصرفك كان صح معها وأنك وقفتيها عند حدها 00000 لكن الأن أنت اللي غلط الشيطان لا يترك الأنسان بحاله

أختي أنت تعلقتي بأهتمامها بك وعشقها لك رغم جفافك لها الحين هي أنصرفت عنك لأنها كانت علي أمل تطوعيها

علي ما ترغب بس ما لقت فايدة فنصرفت 0000 جاء دور الشيطان يوسوس لك أنك سوف تفقدي هذا الأحساس

الحميم بقولك توجهي لله بصلاة ركعتين وأنت ساجدة أطلبي من الله يهديك لما يحب ويرضا وأكثري من الأستغفار

ونصرفي عن تلك الصديقة وهتمي بمستقبلك وحافظي علي أستقامتك وسوف يبدل الله لك بألف صديقة تكون

صديقة صح بدون سوالف لا ترضي الله 00000 قاومي هذا الشعور فلا يصح الأ الصحيح

ماعرف شقول

احس اني الحين صرت متمسكه بها ..

واهي ماتباني .. مشكورين ع المرور خواتي