خواتي مهددات بالانحراف والسبب تصرفات أبوي ساعدوني اوقف هالعاده الشينه اللي عنده 2024.

أنا الحمدالله ( متزوجه ) ، قبل ما أتزوج اتعرفون البنت من تخلص الثانويه يقوم سوقها هالفتره ^^" كل يوم والثاني يتصلون ناس يبون يخطبوني لولدهم .. وأمي طبعاً اتكلم أبوي وتقوله فلانه أم فلان اتصلت تبغي بنتنا حق ولدهم ،،، أبوي وبرد فعل غريب جداً يعصب على أمي ويقولها قوليلهم ماعندنا بنات للزواج ( للعلم احنا 5 بنات ) !! وغير هذا يتم في حاله مايلعلم بها إلا الله .. يسهر الليالي يفكر ويتعب نفسياً ويوسوس كيف أزوج بناتي هذيل يهال لو وصلت أعمارهم فوق الـ 30 سنه … كيف أزوج بنتي اللي عمرها الحين 20 سنه وعندنا بنات في العايله فوق الـ 25 وبعدهم ماياهم نصيب !! شو بيقولون الناس عني ،، بيقولون فلان ماصدق يفتك من بناته وبيقولون بنات فلا صغار وميتات ع العرس !!

طبعاً سكتنا عن هالموضوع وأنا روحي كنت أرد أي حد يتقدم لي عشان اتجنب هالمواقف من البدايه أحسس أبوي إني مب مستعيله على عمري ولا إني ميته ع العرس ..

وداومت الحمدالله وصار عمري 21 سنه ويا اليوم اللي خطبني فيه ( واحد يقرب لي ) ،، بصراحه هالإنسان كنت اتمناه زوج من زمان وخفت أبوي يرده .. ( لأنه مثل ما قلت لكم وسواسي مايرتاح لأي حد ) ريال أخلاق ودين وطيب وايد وبار بوالدينه ،، مع ذلك أبوي عاش فتره صعبه عليه مب مقتنع يزوجني أبد والله يا خواتي قالها بلسانه لو أمه مب غاليه علي جان ماوافقت .. أنا وافقت عشان ماتصير مشاكل بين الأهل .. وفوق هذا عرقل موضوع الزواج وايد وتلعوز ريلي وايد بس كان متحمل لأن كان شاريني .. أبوي كان يحسسه إنه مب قد ثقه انه يسعدني ودوم يحسسه انه مب مرغوب ويعامله على أساس هو ياهل مب ريال قد المسؤوليه ..
والحمدالله الحين متزوجه ومرتاحه فحياتي ..
والله يابنات ريلي كل همه رضاي ورضا أهلي رغم اللي سووه فيه وعيشوه في هم بس عمره مايعارني في أبوي ومعاملته له ..
وحتى عقب عرسي وايد حريم كلمو امي عشان اختي وابوي شل البيت على راسه هاك اليوم وتم يقول انا ليش زوجت وحده وفتحت المجال للباقيات .. ياربي انا شو سويت في حياتي ليش بناتي انا بالذات ماشي بنات في الدنيا الا بناتي << غريبه صح لأن كل أبو يتمنى الستر لبنته وبالذات في هالزمن يقولك اخطب لبنتك قبل ولدك صح والا لا

خلصت أنا الحمدالله وافتكيت من هالمشوار الصعب ههههه

والحين دور اختي اللي عقبي .. أختي متقدم لها واحد ( أخو ربيعتها ) ريال طيب وخلوق وصفحته بيضه ماعليه شي الحمدالله والكل يشهد بأخلاقه .. وهو ربيع ريلي من سنين وهو يشهد بأخلاقه ودوم يقول لاتفرطون فيه والله انه شهم ويستاهل كل خير ..

( للعلم بنات هو يبغيها من 5 سنوات بس كان يترياها تكمل تعليمها وهو يكون نفسه طول هالفتره ،، وهي تبغيه وهو يبغيها على سنة الله ورسوله )

واختي مب صغيره عدت الـ 20 سنه يعني في سن زواج ..

أبوي بالبدايه لما شاف اختي مقتنعه فيه وافق وتمت الخطبه على خير ولبسوها ذهب على أساس انها محجوزه له ،، بس مره وحده وبين يوم وليله أبوي غير رايه لييييييييش !!!! لأنه طجول هالفتره كان في حاله صعبه ونفسيته تعبانه << شو بيقولون الناس عني

هو أمه هنديه ( والنعم فيها والله على راسي من فوق ) ما اختلف أنا في هالشي بس أهلي أثرت فيهم وايد ومن البدايه أمي قالت حق أختي تراني بلعت هالسالفه عشان خاطرج بس انا مب داخل مب مقتنعه فيهم هم مب بس امه هنديه هم كوكتيل

امه هنديه واهلها كلهم في الهند وابوه أصوله من عمان ووحيد أمه وأبوه ماعنده أهل (( يعني هم أهلهم بيتهم بس )) ماعندهم وايد أهل ومع ذلك سمعتهم طيبه وناس طيبين ..

(( انا ماعندي مشكله في هالنقطه بالعكس بالاخير هم مواطنين في البلاد وماعندي عنصريه في هالموضوع ))

وأبوي لما سأل عن الريال ما كان يسأل عن أخلاقه والله بنات أي حد يسألهم عنه يقولون له طيب وزين محترم وأبوي يقولونهم ترا أمه هنديه يقولون له دام أمه هنديه خله يولي ليش تزوجه بنتك شو تبا به !!!!!

عاد أبوي كله ولا الناس يتكلمون عليه … نفسيته اتدمرت قال خلاص مانبغيه أنا مو موافق شو بيقولون الناس عني يفر بنته على أي حد … لا مستحيل أوافق وعقب الناس تتكلم عني ..
وعقب وصلتنا معلومه ان يدته أم أبوه (( الله يرحمها )) كانت شيعيه << مع احترامي لكل المذاهب

قامت القيامه عند أمي دشت على أختي مصدومه ومعصبه قالت لها شو المصيبه اللي عقيتينا فيها ،، اتعرفين ان يدته شيعيه أنا مستحيل أوافق هالشي بيأثر على تربيه عيالج <<< للعلم اليده متوفيه من سنين الله يرحمها ومالهم صله في هالمذهب هم سنه ..

واختي انهارت << طبيعي من الخوف يعني اللي يسمع أمي داشه عليها تقولها صدمتيني يبتي لنا واحد يسكر !! والا راعي سوابق !! الريال ياناس مافيه شي ،،،، اختي تمت في ضيييجه وقهر الحين كيف اهلي يفصخون الخطبه عشان أمه اللي مب مرتاحين لأصلها ( مع انها اخلاق ) ولا يدته المرحومه لانها كانت شيعيه !!! أختي مب عارفه وين اتدق براسها

أمي اتصلت فيهم قبل أسبوع وكلمت أخته العوده وقالت لها خلاص الظاهر ماشي نصيب انتو كوكتيل والذهب بنرده لكم ان شا ءالله .. ( الحين أهلي مسافرين وقالو لما انرد من السفر بنرجعه )

أخته كانت حامل وارتفع عندها السكر ورقدوها في المستشفى والل ستر الجنين ماستوابه شي << انصدمت مسكينه خافت على أخوها

وأبوه ريال كبير في السن مسكين تعب وايد والريال في حال مايعلم به الا الله ..
والله انه يكلم ريلي والدمعه في عينه يقوله أنا ماعلي شي والله لو يسأل عني سنه كامله ما بيحصل علي شي وهذيل أمي وأبوي ماقدر أبيعهم عشان أعرس ويترجى ريلي يقوله الله يخليك أرجوك قولهم لا يردون الذهب أنا مابغيه شو بسويه فيه انا أبغي اتزوج على سنة الله ورسوله بس ،، انا لز ابغي ألعب جان لعبت بس انا مابغيت الا الحلال وانا ابغيها وشاريها ومابغي اسوي شي غلط

الريال مستعد يسكنها في بيت بروحها ومدبر أموره .. والله احس انه انظلم << يعني مب ناقصنه شي

الحين خواتي قولولي شو أسوي ،،، والله أحس اني بنفجر أبغي اتصرف أبغي اكلم أمي وأبوي أبغي أسوي شي بس ماعرف كيف …. أختي محطمه لأنها تبغيه وأمي تقوله بييج اللي أحسن عنه انسيه

وانا اذا سكتت هالمره اختي بتضيع وعندي خوات غيرها في الثانويه يعني كبار وبيتكرر هالموضوع معاهم وعقب منو المسؤول اذا غلطوا وساروا في طريج الغلط دام الحلال مرفوض !!

والله ماعرف شو أقولكم والله اني مقهوووره ما اتمنى أمه أبوي يكونون جي وهم اللي خايفين الله وعارفين ان مافي فرق بين العربي والعجمي الا بالتقوى ،، ويعرفون ان احنا روحنا عندنا وايد نسايب من كل مكان (( يعني احنا بعد كوكتيل )) فـ ليش الظلم !!! ليش هالتعصب لهالموضوع والله حرام العيال مالهم ذنب … دامه ريال خلوق هو ماله ذنب ان امه وافده صح والا لا ؟؟ ترا امه اللي مب عايبتنهم هي اللي ربت ريال والنعم فيه سيرته طيبه بين الرياييل ..

تراني انا عندي اخو طيب وحبوب ومرح بس عيبه انه يلعب وايد يرمس بنات ويدوخ وهو عمره 19 سنه بس ،، مافكروا امي وابوي ان بيي اليوم اللي بيخطبون لولدهم وبالذات أبوي اذا حد رده في شي ينهار ويتعب !! وأمي اللي هذا ولدها الوحيد المدلل !! ماحطو نفسهم مكان أهل الخطيب وكأن الدنيا بخير عندهم والناس مجروحه واتعاني ..

شو الحل بنات … الريال مستعد يرجع يكلم أبوي مره ومرتين وعشر ويترجاه ويقول مستعد أبوس ريله بعد << والله غمضني

شو أسوي
الحين اهلي كل همهم الناس بتعايرهم والريال ترا ماعيبه شي ..

كيف اقنعهم عل وعسى يفكرون بمنطق أكثر ترا الناس ومب لعبه هو وافقوا عليهم وبين يوم وليله يفصخون الخطه بدون عذر مقنع وهالشي مب بإيد الريال تراه هو ماله ذنب فيه ،، ويردون بكلامهم والله الناس مب لعبه

قولولي خواتي عل وعسى أحصل حل لهالموضوع وأنهي هالعاده الشينه اللي في أبوي ..