ذكريات الولادة الاولى مخوفتني 2024.

هلا بنات ها ثاني حمل لي و استغفر الله ما كنت ابا احمل الحين لان ولدي بعده صغير بس قضاء و قدر و الحمدلله ع كل حال.. بس نفسيتي مب اوكي و كله اتذكر الولادة الاولى و البهدلة و العوار و ويع الطلق الصناعي،، و اخااف وايد والله،، منو مرت بنفس الموقف؟؟ و شو لازم اسوي؟. مابا اعيد تجربة الطلق الصناعي لانه ذبحني،، حتى يالسة افكر اتفق مع الدكتورة انهم يسوون لي عملية قيصرية،، لا عوار ولا شي ، افتح عيوني واشوف البيبي وياي،،

لازم فديتج ثاني ولادة تكونين خايفه قبلها لانج جربتي قبل وتعرفين شو يستوي غير عن البجر الي على عماها ماتعرف شو بيسوولها .. بس مب شرط يتكرر نفس الي استوالج قبل .. خاصه انج تقولين ولدج بعده صغير واللي اعرفه ان يوم ما تباعدين بين كل حمل والي عقبه الولادة تكون سهله .. ويمكن المرة الاولى استعيلتي ع الولادة وعطوج طلق صناعي .. هالمرة اصبري ولا تاخذين على كلام الدكاترة اذا كان كل شي طبيعي تريي لين يحمى الويع وتربين بدون طلق صناعي ..

ولا تفكرين بالعملية اذا ما كنتي محتاجتنها .. حزتها ما بتحسين بويع بس عقب الولادة بتتعبين اكثر وهذا كلام الي مجربين الاثنين .. كلهم قالوا الطبيعي اهون بواايد من العملية ..

الله يسهل عليج لا تفكرين بشي وان شاء الله ربج بيسهل عليج .. انا نفسج هذا ثاني حمل لي وفي اشيا احاتيها استوتلي فولادتي الاولى بس متوكله على رب العالمين ..

مشكورة غلاي عالرد و ربي يسهل عليج ان شاء الله

هلا أختي انا الحمل الأول ما تعبت وايد بس الحمل الثاني تعبت وتبهذلت

والحين حامل بالثالث ونفسج خايفه أحس أني تعقدت من الحمل الثاني بس افكررر أسوي

إبرة الظهررر ٩٠ بالميه بما أني اول مره بسويهاااا فما اقدر أنصحج لأني ماعرف عنها شئ

بس بسويهاااا خوفاااا من اللم بس العملية ما أنصحج تفكرين فيهااااا وايد اتعب

انا نفسج وايد احاتي وخيفانة لدرجة اني اتوتر واتنافض يوم اذكر بس اشوف الحريم ما شاء الله عليهم يسهلون الامور وكلها ساعة وتنتهي السالفة فالخوف الي فينا مسوي لنا ازمة يارب يقويني ويسهل علي لاني حملت عقب ماكنت موقفة فترة طويلة

عموما كل ولادة تختلف عن الثانية وعن تجربتي في ولدي الاول كانت متعبة اما الثاني مقبولة اما الثالث الحمدللة الويع كان ورا بعض ما طولت وربيت

ادعي ربج يسهلها وان شاء الله بتسهل وبتهون

مثل تفكيري خايفين ونبا كل شيء سهل!شونسوي متوكلين على ربنا والله يسهل علينا

الاوكسجين وايد يهون الويع وانا احب اروح المستشفى عشان اخذ الاوكسجين
ووالله بيهونها واستغفري وايد يفتح لج باب الرحمة يارب