رؤيا ظهور الشمس من مغربها 2024.

شحالكن بنات عساكن بخير وسهاله…

وشخبار رمضان وياكن ان شاء الله الامور طيبه…

بصراحه عندي موضوع صارلي فتره متردده اقوله والا لا

وتبون الصراحه من صارلي هالشي ماقلت حق حد نهائيا ماعرف كنت خايفه

بسم الله الرحمن الرحين

بإختصار

انا حلمت او تقدرون تقولون اني شفت رؤيا

وهي

ظهور الشمس من مغربها

اكيد انصدمتوا وياتكم قشعريره ورهبه

عيل انا شو اقول,,,,

انا بقولكم باللي شفته بالحلم بالضبط والله يعيني .. وحبيت اسمع منكم بعد وافيدكم وانبهكم بنفس الوقت

(ان الذكرى تنفع المؤمنين)

الحلم هو الله يسلمكن

.. ــــــــــــــــــ ..

حلمت اني كنت يالسه في غرفه يمكن كانت غرفتي الله اعلم المهم كنت يالسه ارتب الملابس واحطهن في الكبت

وكانت حزة قريب الفير وشوي الا اسمع الاذان عقبها قلت بتريا شوي خمس دقايق عقب بنش اصلي

وفجأه

اسمع صريخ …. صيااااح … نواح … وناس يكبرون … وناس يستغفورن

انا نقزت من مكاني وقلت بسم الله شو صار اكيد شي جااايد ومب هين والا الناس ما بيصرخون بهالطريقه

والدنيا كانت ظلمه مووووووووووووووووول

رفعت راسي اشوف الدريشه والا اشوف لكم السما سووووووووووووووووووووووووووووووووده

نشيت من مكاني وتقربت من الدريشه اكثر

لكن في شي ثاني

هيه نعم هذي هي الشمس

شمس كبيره وقريبه ولونها بين الاحمر والبرتقالي الصارخ

من وين ظاهره …..؟

مستحيل ظاهره من جهة المغيب

شو الي يالس يصير

لا اكيد في شي … وهالشي ماله غير تفسير واحد ………..

ركضت وطلعت من الغرفه وانا اصيح واصرخ ادور على امي لقيتها في الصاله مع اخوي الي اصغر عني

من كثر الصياح والمشاهق ما قدرت ارمس

كنت احاول امطها من ملابسها عسب اراويها الي انا شفته

وهي تسألني شوفيج شوفيج

وانا بالغصب يالسه اتنفس

وبصوت مبحوح ونفس مقطوع

رمست …. لكن كل الي قدرت اقوله

شمس ……….. قيامه … .. شمس …… الله

مسكتني من جتوفي واطالعتني بنظهر (خلاص ارضي بالامر الواقع)

هنه ماقدرت اتحمل

وعيوني بدت تخر من الدموع

وقلت لها : امي لا .. امي انا بعدني … بعدني ماسويت شي .. امي انا مقصره .. امي صلاتي .. . امي دخيلج .

قالت لي : شفتوا… شفتواا.. انا ياما كنت اقولكم قوموا صلوا.. قموا صلوا… وانتوا تقولولي انزين الحين بنش ولا تنشون .. الحينه .. الحينه شو الفايده ..؟ لي فات الفوت ماينفع الصوت.

اخويه الي كان واقف حذال امي ………………………………… ( مابي اقولكم هالجزئيه الي متعلقه في اخويه وشو قال…… بس كل الي بقدر اقوله انه ما اهتم نهائيا)

رديت على امي وقلت لها :: والحين …الحينه شووو …؟

قالت لي : انتي صليتي الفير ..؟

قلت لها توني كنت بصلي بس كلما اقول بصلي ايني وسواس واقول لالا عقب عشر دقايق بنش لالا عقب خمس دقايق بنش وعلى هالحال لين ما اطوفني الصلاه

قالت لي:: روحي الحينه تلاحقي وصلي هالركعتين لأن خلاص ماشي وقت … اعمالنا وصحفنا راح نترفع فوق بأي لحظة

ركضت ورديت غرفتي وانا اتراجف فرشت سيادتي ولبست شيلة الصلاه ..

وفجأه سمعت امي تزقرني

ركضت صوبها وسالتها شو السالفه

قالت لي روحي فوق السطح ووايجي على الشمس مابتصدقين عيونج

سرنا انا وهي فوق السطح يوم شفنا الشمس

تخيلوا …..

شفت شي يطلع من الشمس كأنها تتجزأ وطلعت وراها شمس صغيرونه والشمس العوده عدت السما وغابت عند المشرق خلال 10 دقايق بس كأنها 10 ثواني

والشمس الصغيره قاعده تتبعها شوي شوي

عقبها سمعت امي تقولي شفتي…؟
قلت لها امي شو صار مافهمت..

قالت لي الشمس فرخت وهالشمس الصغيره بنتها .. ياامي روحي صلي وتلاحقي على عمرج ترا خلاص كل شي انتهى وانتي روحج شفتي بعينج….

عقبها نشيت من رقادي وانا ميته من الروعه وعرقااااانه تقولون حد صاب عليه جريكن ماي

.. ــــــــــــــــــ ..

بنات انا نقلت لكم الي شفته بالحلم بالضبط بدون اي زياده ولا نقصان

والحلم تراوالي قبل رمضان وعلى حزة قريب الفير بعد

بنات ماعرف شو اقولكم والا شو اوصف لكم والا شو اعلق

لكن كل الي اقدر اقوله اني بحاول التزم اكثر وبالذات صلاتي احاول اني ما اتهاون عنها

لأن حزت الحزه مابينفع لا صياح ولا نواح ولا امي ارحميني ولا شي ……..

( اليوم الموعود قرررررررررررررررررررررريب يابنات شوفوا حال الدنيا وشوفوا علامات الساعه الكبرى الي يالسه تظهر وتدبروا وبتعرفون .. صح ان يوم القيامه محد يعلم به غير رب العالمين.. لكن ربنا ورسوله عطونا دلالالت وعلامات وهالامور بدت تظهر ……… نحن في أخر الزمان … نحن في آخر الزمان)

الحينه بترك لكم حريه التعليق واللي عندها افتاء والا اضافه والا تحليل والا اي شي اتمنى انها تضيفها عسب كلنا نستفيد

محد كامل في هالدنيا وكلنا مقصرين بحق ربنا … لكن ان شاء الله مابنوقف عند هالحد بنحاول قد مانقدر اننا نوفي حق ربنا علينا

وما نتغاضى لا عن صلاه ولا صدقه ولا غيره واهم شي…………………. ما نأخر هالفورض

وسامحوني طولت عليكم

وربي يهدينا ويهديكم ويهدي جميع المسلمين