شحآلكم بنآت عسآكم بخير ,,
هذي أول مره أطرح فيها مشكلتي للمنتدى وان شاء الله ألقى الحلول الطيبه عندكم ,,
واللي شجعني أكثر شفت تعليقآتكم لبعض المشآكل حسيتكم شرآت الخوات وأكثر ,,
مشكلتي يآبنآت هي البلاك بيري ..
وأظني سمعتوا وآآآيد عن مشآكل هالجهاز .. ><
أحس إني متوتره ومب عآرفة وين أبدي ,, انا متزوجة من سنة وعندي يآهل كآنت حيآتنآ حلوه
وأمورنآ كلها طيبه بس من يوم ماشرى ريلي البلاك بيري تغير فجآه ,, بقول لكم كييف
مثلا ونحن بالطريج يمسك البي بي ويقعد يدق يدق فيه وانا كم مره أوجهه وأنصحه وأقول له اللي تسويه غلط يآبو فلان ,, بس لاحيآة لمن تنآدي ,,
في البيت ونحن نشوف فيلم أو مسلسل ,, ما يندمج ع التلفزيون كثر ما يندمج على البلاك بيري ,,
وأنآ حآلي كحآل الحريم بدى فيني الوسوآس وأقول بخآطري شو الشي اللي يخليه يتعلق بالبلاك بيري هالكثر ,, أكيد في سررر
وآجهته طبعآ وقلت له يآحبيبي ترآني حيل مشتاقة لك ولسوآلفك بس الله يسآمح البلاك بيري خذآك عني
خيير بس ليش ,,, قآل آسف بس انا قآعد أسولف ويآ الربع ,, ومن هالكلام ,, طبعآ انا ماصدقته بس طوفته بمزاجي ,, قلت ماعلي بمل مع الاياااااام وبرد لي
موقف ثاني
مره كنآ سآيرين دبي مول ,, فتعبنا من المشي وقررنا نقعد في كوفي قريب نشرب عصير وكوفي ,, وانا يآلسه أسولف معاه ,,إلا الحبيب مندمج بالبي بي ,, صدق صدق انقهرت وقتها ,, جان اطنشه وشربت كووفييي ويلست أطالع بالناس الرآيحه واليآيه ,, والله أشكآلنا غلط وهو مسوي لي طاف ,, وتميت سآكته جي مال سآعه وهو انتبه وأخيرآ وقال آسف حبيبتي والله الشبآب يسولفون معاي ومادري شو
قلت له حبيبي انا شو قلت لك عسب تعتذر وتبرر موقفك ,, ليش انا نطقت
قال لا بس أشوفج سآكته
قلت له طبيعي اسكت ماعندي احد اسولف معاه ,, بس خلها ع الله ,,
وبعد مره كنت يآلسه أرتب غرفتي وهو كآن ناوي يتسبح ,, قال لي جهزي لي ملابسي وانا رايح اسبح
قلت له نعيما مقدما ,, وهو رآيح جآن اشوف شي لونه اسود طالع من طرف الفوطه ,, عرفت انه هذا مبآيله البلاك بيري ,, بنات يعني بالذمة شو يسوي التلفون بالحمام ,, انا مب لهدرجة غبيه ><
هالأمور عارفينها من زمان بس شو نقول الله يصبرنا ,,
ومثل هاليوم كان يشتكي من بطنه كل شوي يروح الحمام وانتوا بكرآمه ,, ما يكمل خمس دقايق إلا يقول بسير الحمام بطني يعورني ,, وانا قلت له بعطيك دوى يخفف عنك هذا بس عاند وقال لا مابي
وانا اعرف اصلا ليش يبي يروح الحمام ,,
تصدقون بنات فووق كل هذا كنت قد ما اقدر احاول اطنش ,, لانه ماعندي دليييل قوي يثبت انه يكلم بنات
وبخبركم مره كنت سايره بيت اهله ونحن متعودين كل ويكند نرقد بيت اهله ,, المهم اهو دوم بعد الغدى
يآخذ قيلولة , كنت اخليه يروح الغرفة بروحة واقعد انا اتقهوى ويا عمتي ,, بس بعد اللي شفته منه
قررت ادش الغرفة ع طول ع اساس اني مستعيله ,, وسويتها ودخلت الغرفة وشفته نايم بس كان يتكلم بالفون ,, اخترع ومن كثر ما انصدم قعد يصرخ علي ويقول لي شو هالدفاشه دقي الباب ,, قلت له ليش تراها غرفتي مثل ماهي غرفتك وانا مستعيله وآسفه وآخر مره ,, ومن بعدها تصدقون بنات موول ما اخليه يآخذ قيلولة العصر إلا وانا رازه عمري وانام معاه ما اخليه بروحه بالغرفه خخخ ,,~
وبخبركم متى صدق عرفت انه يكلم بنات ,, مره كنا قاعدين انا وعمتي وريلي بالصالة وهو كالعادة
يدق دق ع تلفونه ,, وتم يضحك بصوت عالي ,, قلت له شو السالفة حبيبي ضحكنا معاك ,, قال لا لا ولاشي ,, عاد عمتي فضولية إلا تعرف شو السالفة وقالت له شو اللي ضحكك ابي اعرف جان يرد عليها ويقول مطرشين لي صووور تضحك وبس ,, وعمتي بتموت إلا تشوف الصور وجان يرآويها
وانا نغزته وقلت افااا يعني الكل يشوف وانا الفقيره محد يرآويني شي ولا مستخسر علي الضحك معاكم
جان يرد علي ويقول لا انتي الغاليه مانردج وقام يراويني الصوور وفجأه تحت المحادثة طلع كلام مكتوب فيه برب حبيبي خذ راحتك ,, @_@
هني صدق عرفت انه يرمس وحده وبدال الضحكه انقلبت دموووووع وضيجه ,, حسيت الدنيا تدور علي استأذنت ورحت غرفتي على طووول ,, سرت الحمام وغسلت ويهي بماي بآرد ,, اقول بخاطري معقولة حد غيري يقول لريلي حبيييبي ,, >< ,, وانا ,,وانا شو خانتي عيل
ريلي حس فيني وياني الغرفة يتطمن علي ,, بنات والله ما اجذب عليكم نظراتي تغيرت له وحسيت اني كرهته ومابيه >< ,,~
هوو يحاول يمين وانا شمال ماشي فايده ,, طبعا ماواجهته بس بينت له اني معصبه وهو بيموت ويعرف ليش معصبه ومزاجي متعكر ,, سكتت وماخبرته ليش ,, وقلت له بنام شوي وتعبانه ,, وطبعا ماياني النوم ,, هديت شوي وسميت بالرحمن وقلت لا مايصير اعامله جي لاااااااااازم الحينه افكر الف مره وأتأكد من الموضوع اكثر ,,
وقت الليل حزت النوم الساعه 12 ريلي قال لي بسير اتطمن على امي وابوي بشوفهم رآقدين ولا ,,
قلت له توكل ,, وانا مناك مجهزة عباتي عسب اطلع من الغرفه ,,, بعد نص ساعه طلعت من الغرفة وكنت لابسة عباتي عسب اخاف حد من حمياني يقوم ويشوفني ,, المهم سمعت هدوء بغرفة عمي وعمتي ,, بس سمعت صوووت ضحك بغرفة حميي وحميي محد في بوظبي هني يودت عمري عسب ما انصدم ,, سمعته بالصوت الواطي ويضحك ,, وانا واقفة حذال الباب وقلبي يتقطع ,, وفيني صييحه من الخاطر ,, ليش ياربي ليش ,, وجان ارد غرفتي بس وقفت عند باب غرفتي وقلت بخاطري خله ينصدم لما يطلع ويشوفني واقفة عند الباب ,, طلع الحبيب من الغرفه وجان ينصدم ويشوفني واقفة عند باب غرفتي وقال لي ليش مب رآقده ,, قلت له كنت خايفة انام بروحي فقلت بتريآك تطلع من غرفة اهلك ,, اهنه اهو سكت وعرف انا شو اقصد ,, وعلى طول ماسويت له سالفة ودخلت الغرفه ,,, وتمينا لحظة صمممممممممممت ,, وانا فيني صيحه بس مب قادره اطلعهاااا ,, بس يودت عمري وتخيلو بنات قلت بكسر هالشي اللي من بيناا وفتحت معااه سالفة ملجتنا عسب ما ابين له انه فيني شي ,, قمت اذكره بماضينا وقت الملجة وبداية زواجنا كانت اسعد الاياام بصراحة ,, وهو تذكر معاي وعاش الجوو بالسوالف معاي ,, وفجأه حضني وقال الله لايحرمني منج يا حبيبتي والله اني احبج ومحد يسوااج
حسيت برآآآحة احس طلعت من خاطره بس بعد ليش يسوي هالشي من وراي ,,~
وبعدني يآبنات ما واجهته لاني اللي اعرفه اللي تواجه الريآل بالأمور غلطانه وفيه نوع من التسرع
وبدال لاتنحل المشكله تزيييييد ,,
فأستغليت الفرصة وقت سبوح ريلي وخذت فونه ودورت ع بن كود البنت اللي يرمسها ,,
وشفت انها مطرشه مسج له وكاتبه صباح الخير حبيبي اشتقت لك ومن هالكلام الحب والغزل
تعرفون شو سويت مسحت المحادثه ,, وخذيت بن كودها وخزنته عندي ,, ريلي طلع من الشآور ولاكأنه شي مستوي ,, وشيك ع فونه وماشاف شي وجان يهد التلفون ويه صووبي يصبح علي,, حسيت بالانتصار خخخ وقلت هذي بدايتهااا ,,
واليوم انا في بيت اهلي خذت فون اخوي البلاك بيري وقلت له انا محتاجتنه دقايق ابي اتعلم عليه لانه
يمكن اشتري شراته واخوي عطاني الفون ,, وطبعا انا اعرف للبلاك بيري بحكم ربيعاتي بالجامعه كان عندهم وكنت اتعبث فيه ,, المهم ضفت البنت ,, وطحت معاها سوالف ع اساس اني ادور نيوكونتاكت واهي يت ع حظي خخخ ,, والبنت ماقصرت تمينا نسولف وعرفت معلومات عنها اهي شو اسمها وكم عمرهااا ومن وين وشو تدرس ,, وطلعت مب متزوجة ,,
صكرت فوني وحاسه براحه اني عرفت ريلي يرمس منووو ,, وانا برآآوييهم ,,
بس المشكلة الحينه الخطوة الثانية مب عارفة كيف ابديهآآآآآآآآآآ ,,
عسب جي نزلت هالموضوع اباكم تساعدوني وتخبروني شو اسوي بعد ماعرفت عن البنت كل شي
كيف اتصرف مع ريلي وأواجهه بهالشي ومعاي الدليل ,, لاني الحينه متوتره وعادي اتهور ><
ابي ريلي يندم ويحس ع دمه وأبيه يعرف اني مب هييييييييييينه ,,^^
الله يكملـج بعقلج يآرب
مآبقدر انصحج لاني انا متسرعه
اخاف اقولج سويي جي وينجلب الموضوع ضدج خخخ
انا لو مكانج الصراحه كنت بواجهه وبصيـح
بس انتي ذكية وعرفتي تتصرفين
ياريت لو كل الحـريم شراتج
الله يبعد عن ريلج شـرور الدنيآ و يسعدكم يارب
مم مي تو مآعرف شو آقولج لآني بنوته مب معرسه
بس آن شاء الله المعرسات مابيقصرن
والله يحفظج غلاي ^_^
بس دايما المح له لو جكيتك والله ابد مابستر عليه بنشر غسيلك
انا من رايي ولو ان الحركه وايد صعبه تقوليله وانتي تضحكين احسه جي والله بيستحي ولا تنسين كلمة حبيبي ولو بالمجامله هذا من رايي بس الاحسن سمعي راي الاغلبيه يمكن رايي مايفيدج
يابنات لييه لييه ليييه ع طوووول تربعن تقولن خيانه!! ترا هالكلمه قويه والله ولما الوحده تقراها تحس بإهانة وتفقد صبرها وعقلها ورزانتها.. وانا ما ابرر اللي سواه بسسس الكلمة لها وقع قووووووووي في النفس خصوصا نحن الحريم غاليتي احييج على صبرج وحكمتج وربي يكملج بعقلج فديتج.. ترا يمكن بس هي سوالف يعني ولا ترا لو يلف الدنيا مابيحصل مثل ظفرج.. انا ما اجامل او اهديج بس لا والله من اسلوبج وطريقة تعاملج يدل على شخصيتج ورقيج..
عزيزتي استخدمي رجاحة عقلج بالأول قبل لا تقرين وتطبقين بعض الردود اللي ممكن تهد اللي سويتيه ف لحظة.. و ايضا اتمنى اختي ام خماس تفيدج بعد لأن كلامهر و اسلوبها ونصحها يعجبني ماشالله عليها ربي يحفظهااا.. عن نفسي لو صار معي هالشي ماراح اقدر اسوي شي غير اني ابكي..
*