سفرتنا هالشهر ان شاءالله . باريس 2024.

السلام عليكم ورحمة الله وبركاته

شحالكم بنات ديرتي …

هالسفرة على اساس انها تكون لماليزيا .. لكن تغيرت بسبب الامطار الحمضية في ماليزيا ..
ان شاء الله بنسير باريس من تاريخ 29/3/2011 وحتى 4/4/2011
بنكون انا وريلي وعيالي الاربعة الله حفظهم ..9 سنوات – 7 سنوات 5 سنوات – سنة ونص ..
بسألكم كم سؤال ..؟
1 – ضروري تكون العملة المتداولة اليورو ولا عادي نستخدم الدولار …؟
2 – اقدر اشيل وياي اكل خفيف في الشناط او لأ ؟ لأن الاكل هناك وايد غالي وبما انهم يهال فأكيد بيعون ويا اللعب والمشي والبرد …!
3- بخصوص السوائل سمعت ان لازم تكون كل شنطة فيها سائل واحد بس .. هالكلام صحيح .؟
وشو قصدهم بالسوائل ( شامبو – عطور )

منو عندها خريطة باريس اللي توضح المعالم السياحية وتكون سهلة طرشها لي لو سمحت
وبنات ممكن تفيدوني ببعض النصائح عشان ما اتلعوز …

تسلمون

مرحبا اختي . اختي بخصوص الجو يكون بارد وايد . ولازم يورو وسوي من البلاد عنا وبخصوص السايل اتوقع العطور بس عادي يكون صغير الحجم في الشنطه الي اختي اتشلينها في ايديج اما في الشنطه العوده مال الثياب عادي . اما الشامبوا عادي خليه في الشنطه العوده مال الثياب واما بالنسبه للمعالم سيرو متحف ورتبوا يوم واطلبوا سياره من الفندق وسيروا ديزني بس لازم الصبح من وقت لانهم يفتحون عشر الصبح ويسكرون عشر فليل ووايد بتستانسون هناك والصغاريه بعد وسيروا بعد برج ايفل بس حاسبي علي عيالج هناك

ماقصرتي فديتج ..
نحن حجزنا 4 ايام في ديزني و3 ايام في المدينة …
وبخصوص الادوية مال الكحة والحرارة لازم احطها في اكياس نايلون . ولازم تكون وصفة طبية وياهم ولا عادي ؟

الله يوفقكم بالسفره انا راده من باريس من اسبوع وااااااااااااااااااااااااااايد الجو بارد بس في الفندق فطسه لانه الدفايات شغاله عطول وشلي اكل عندج وااااااااااايد نفعني الاكل اللي شليته وبعدين فندق اداجيو اسمه وايد زين عباره عن شقق فندقيه بيناسبج عندج عيال ومنظقه امينه ماتخوف اذا سكنتوفي باريس في المنطقه اللي قريب من برج ايفل اسالو عن محل اللبناني فيه كل الاكل والاغراض كانج في البلاد اللي بتحتاجونه بتلقونه وخذي يوم تشترين مال ثلاث او اربع ايام لانه الدنيا غاليه عندهم يعني قايسي وانت تاخذين لاتتحرين عمرج في الامارات كله بزياده تشترين انا عندي الخارطه مالت باريس بس ماعرف كيف اطرشها لج حتى اعتقد كرة اللبناني عند ريلي بساله اذا ماضيعها اسميج بتدعيلي يوم بتروحين اللبناني لانه اول ثلاث ايام كنا نروح الجمعيه ونشتري اشياء اخر شي نطلع مانعرف شوهذا بس يوم عرفنا اللبناني تمينا عنده ناخذ اللي نباه ومن تشوفون الدنيا بدة تظلم ردي انتي وريلج وعيالج الفندق لاتخاطرين بعايلتج ناس عايشه بلاهدف هناك وبعدين اسالي التكاسي يوم تروحين قوليلهم يودونج البرشه هذا اسم مكان بفتح يوم الاحد والاثنين والثلاثا بس رخيص نوعا ما بس روحو من وقت حطي هالكلمه بعين الاعتبار من وقت عشان قبل مايضلم الوقت تكونون طلعتو من البرشه وبعد البرشه فيها اللي يبيعون اغراضهم المستعمله تخيلي بالطو جاكيت قيمته غاااااااااااااااااااااااليه في المحلات اشترالي اياه ريلي ب خمسه يورو ناس محتايه وتبيع باقل الاسعار طبعا معظم اللاشياء اللي يبيعونها من المستعمل ماتناسبنا انتي خلج بالمحلات الاماميه مايبيعون مستعمل كله يديد لكن اسعارهم ارخص من داخل باريس واي استفسار انا حاضره التكاسي غاليه تراها وتروحون وتردون بالسلامه اطلبو من التكسي يوديكم الريف خصصوله يوم اطلعو من الصبح ولاتفجين عيالج من ايدج والياهل بوسنه ونص اربطيه في العربانه زين وخلي عيالج يمسكون العربانه من اليمين واليسار لاتغفلين عنهم انصحج لايخوزون من عينج والله يحفظكم وااااايد بتشوفون سكيره بغراشهم يالسين ع الارصفه اذا شفت حد جي قولي لعيالج لايطالعونه ابد لانهم اللي يطالعهم يتحرونه يبا يستفزهم عادي يفرون الغرشه عليكم فخذو احتياطكم ووصي عيالج من تطلعين ترا اللي رايح مب مثل اللي ماراح وحصني عمرج وريلج وعيالج انفثوفي ايدخم 3مرات واقرو سورة الفاتحه وامسحوعى جسمكم كامل وبتكونون في حفظ الله انشاءالله صح نسي اقولج اي شي حديد بتشلينه مقل ملاعق شوك اي شي حطيه في الشنطه العوده لاتخلينهن في شنط الايد لانهم بيشلونهن اذا في شنط اليد انا الادويه حطيتهن في شنطت البيبي اللي شليتها مثل الهاندباق عادي

تفاحة ياقلبي ماقصرتي …

العمله المتداوله هي اليورو

ودزني واايد اربع ايام

وفي اوتليت عدال دزني وفي ماركات ما زرته في اعرف وحده سارته وتمدحه بس كان زحمه فالصيف

وعادي نحن كنا تطلع فليل الحمدلله وضع امان لان تغرب الشمس من وقت عندهم

وتقدرون تاجرون سياره
او تركبون الباص
او القطار

بس لا تاخذين التذكره بالدخله مثلا خذي مال يوم كامل

وانتو تعتبرون ست اشخاص فلازم تركبون التاكسي الاكبر واغلى شوي او بيخلونكم تركبون تكسيين

هو بيكون برد بس من نفس وقت الشتا يوم سرنا في شهر واحد تتصل تحت الصفر بس اذا عندج قواري شليلهم الكفر البلاستيك عن المطر وفي نفس الوقتي يخلي البيبي دافي

والاكل ممكن تشلين وياج اشيا اساسيه مثل حليب اليهال وبسكوتهم واذا ياكلون نوع معين من الجبن

بس سرنا فنادق فرنسا وايطاليا يحطون في ريوق البوفيه نوتيلا وفيلادلفيا وانواع من الجام وجبن كبري او نوع ثاني يشببهه وشي خبز وسلييس وكريب

واذا ناويه تطبخيلهم ممكن تشلين جدر الكهربا بس احنا كنا ناكل في المطاعم معكرونه وبيتزا وتحصلين مطاعم حلال او ممكن تطلبيبلهم من دون قطع الدياي مثل المعكرونه او ما تاكلينهم

وعن السوائل لو في الشنطه الي بتنحط في الشحن ماشي مشكله

بس الي ادشين فييها المطار ما بيخلونجلو غرشة ماي كنا شارينها عند المدخل وسيده وقفنا قالولنا عقوها اشتروا من داخل المطار

تقدرين تسيرين برج ايفيل وقوس النصر هو عند الشانز

أستغفر الله وأتوووووووووب اليه

بالتوووووووووووفيق الغلا