شوفوا المشكله الي صارت اليوم في الكليه 2024.

بنات حبيت اخبركم عن المشكله الي اليوم صارت في الكليه عندنا الي فبوظبي

ابا اعرف الي انا سويته صح ولا غلط؟؟

بخبركم السالفه من أول

انا هاير دوبلوما فونديشن،والي في الكليه يعرفون بنات الهاير دبلوما كيف،المهم شو صار ياطويلات العمر

عنا في الكلاس بنيه شخصيتها وايد ضعيييييييييفه وااااااااااااااااايد
يعني لو شو تسبونها ولا مابتقولكم شي
كل البنات امصخرينها حليلها وطايحين فيها طايحه،انا صراحه ماروم اشوف شي غلط واسكت عليه

المهم انا اشوف البنيه صراحه وايد طيبه وماتستاهل يعني اذا طيبه يقصون عليها ويمصخرونها؟؟
واهيه حليلها ماترد ولا تقول شي عادي هذا لانها تبى يكون عندها ربع

المهم هالبنيه من فتره وحده من البنات الي شايفه عمرها في الكلاس مخلتنها المطيرزيه مالتها

كيف يعني؟؟ انا بقولكم كيف:اتخليها اتشل لها قشها وتوديلها اياه اللوكر وتتحكم فيها تحكم مب طبيعي يعني لو اهيه يالسه فمكان عادي تقولها قومي وايلسي فالمكان الفلاني،اتصارخ فيها وتسبها ع كيف كيفها وهايج تظحك جنه الامور طيبه وياليت سب شرات حيوانه ولا كلبه!!لا وربي ان سب خاااااايس مال شوارع

المهم الشي الي ينني اليوم شو هو؟
خلصت حصة الكومبيوتر انزين.
شو صاااار؟ الي صار ان البنيه قامت اهيه وربيعتها وقالت حق هالبنيه شلي لابتوباتنا وأغراضنا وحطيهم في اللوكر!!!تخيلو؟؟انا هني متت من بطة الجبد قلت بشوف هايج بترفض ولا لاء؟

أقولكم الابتوبات ثقييييييله انا عن نفسي طولي وحجمي ضعف هالبنيه ومب رايمة اشل لابتوب واحد هالمسكينه كيف بتشل ثلااااااث؟؟

ماقدر كيف اوصفلكم

كيف بتشل الفايلات والابتوبات الثلاث؟؟

اتصدقون شلتهم كلهم وع ويهها نظرة كسررررررررت خاطريه مارمت اسكت صراحه

واهيه شالتنهن رمستها بس بأسلوب ما اجرح فيه مشاعرها،قلتلها انا اشكبري مب رايمه اشل لابتوب واحد انتي ماشاء الله شاله ثلااث؟؟قالتلي حليلها مب مالي مال فلانه وعلانة،قلتلها الاثنتين اشكبرهن مب رايمين يشلن مالهن وانتي حليلج اتشلينهن ليش؟؟قلتلها خلهن هني خلهن بدقلها انا فلانه اتي اتشل قشها

تخيلوا البنيه شو قالتلي؟؟قالتلي حرام امانة هاي ماروم!!صدق بنت متربايه زين واخلاقها تمام

ربيعتي انحرق فؤادها عليها واهيه دفشه بكلامها فقالتلها ايييه انتي مب بشكارتهن يعاملونج جي ليش اتشلينهن اغراضهن،حسيت هني البنيه انجرحت من هالرمسه ورمست ربيعتي وقلتلها اعتذريلها واعتذرتلها

المهم عقب سرنا الكفتيريا نتغدا،الي صار اني حصلت البنيه بالتالي انا زقرتها قلتلها فلانه تعال هني ووياها ربيعتها وربيعتها هاي الي لسانها وصخ واهيه الي تتأمر ع هالبنيه المسكينه فقلتلها تعالي بقوج ليش تعاملون هالبنيه جي؟حرام عليكم اصلا اهيه لابتوبها ماتروم اتشله كيف بتشل ثلاث والبنيه مسكينه حرام عليكم اتسونها مطيرزيه حقكم البنت حسيتها حست بالرمسه وقالت بدقلها اعتذرلها،بس تخيلوا شو صار؟؟ربيعتها هاي الي ماتستحي ع ويهها رفعت ايدها فويهي اتقولي انتي شو يخصج؟؟اهيه راضيه اتكون جي اشعليج انتي؟؟انا نزلت ايدها عن ويهي وقلتلها ماسمحلج ترفعين ايدج فويهي بهالطريقه،تخيلوا شو قالتلي؟؟اونه شلي ايدج عن أيدي وانا لو ابى اعطيج طراق بعطيج طراق،هالحوار طبعا بصوت عالي،طبعا ياطويلين العمر انا وحده اصبر واااااايد بس لين هني وبس،قلتلها وربي سويها عسب ادوسج دوس هني تراني بايعتنها بشرف ولا وحده شرواج اتتي اتفكر تعطيني طراق ،اهيه هني عصبت اونها وتمت تتحطرم وطنشتها وربعتي تمت تهديني لاني لو تميت اسمعها مابرتاح الا لو اشوف دمها،عقب ردت خطفت وراي وقالت هـبـله سكتت ومارديت مابا اتنرفز،المهم شوي ونحن طالعين اشوفها يت ويابت البنيه المسكينه وياها ووصلت لين عندي وقالتلها يلا قوليلها انه عادي عندج تسوين جي!!وقحه قسم بلله،البنت حليلها واقفه ومنزلة راسها في الارض قسم بلله قطعت قلبي،قلتلها فلانه انا مابرد عليج وقمت امشي،شو سوت الحلوووووووووة قامت دزتني وانا واصل حدي واللللللللله خلاص بمسك راسها بحطها تحت ريولي مب فارقه وياي تراني عامريه وماقدر وربي اتحمل وحده جي دمي حاااااار،ربيعتي شافتني خلاص استويت حمرا وشمرت عن ايديني جان تسحبني واتطلعني من الكانتين وهايج الخايسه اتسبني وياوييييييييييييلي مارمت ازخ راسها واجلعه جلع

عقب كان علينا كلاس،انا وربيعاتي يالسين نتناقش انه عادي البنيه تتزوج زلمه وجي وشو راي قلتلهم لو احبه ومتفاهمين عادي ربيعاتي قالوا يااع كله بيتريق ثووم راحت هايج الخايسه قالت هيه مستواها،انا هني عاد بسها خلااااص ،وجان ربيعتي اترد تمسكني وانا والله شو اقولكم بركان وانفجر خلاااااااااص معصبه معصبه،بعدين يت ربيعة هالخايسه لي انا كلمتها وقالتلي بعتذر منها،يوم يت تمت هايج اتصارخ عليها واتقولها اباها تطلع من القروب وبتطلع يعني بتطلع،ترا عندنا بروكت والمس مقسمتنا قروبات واهيه وربيعتها فقروبي بس انا رئيسه المجموعة،انا اتنفست بهدوووء وقلت مابطلع من القروب عسب ابط جبدها.

بنات يقولون لي انه المفروض ما اتدخل وبنات قالوا صح الي سويتيه بس انا الحين يهمني شو اسوي مع هالخايسة؟؟ربيعتي قالتلي لا اتضيعين مستقبلج مع وحده ماتستاهل ويطردونج من الكليه عسب ضرابه وانا اشوف كلامها منطقي وغرايزي تقولي اذبحيها لين اتوب وتعرف انتي منو،بالذات اني للأسف بكمل وياها فنفس الكلاس لين اخر السنه