كيف اراضيه واقنعه،، ابا احضر العرس 2024.

السلام عليكم

اشحالكم حبيباتي بغيت اخذ رايكم في موضوع

انا متعودة اخبر ريلي كل مكان اسير له حتى لو كنت بيت اهلي اذا بغيت اودي اليهال البقالة اكلمه اقول بودي الصغارية الدكان وبرجع ..
المهم البارحة طلعت من عند ابوه كنت زايرتنه وزوجي كان عنده بعد قلت له بسير البيت يايه م الدوام وتعبانة قال اوكي انتبهي وكانت الساعه ثمان فليل ..

ويوم وصلت عند البيت تحت بنايتنا بالضبط في الطابق الارضي شي محل ذهب .. وانا اربيعتي بتعرس اخر الشهر مب ماخذتلها شي المهم وانا خاطفة من عند المحل تذكرت اربيعتي ووقفت سبحان الله تم يتصل حرق تلفوني واخترت الطقم وعطيت بطاقة الفيزا للبايع ورديت عليه قال وينج قلت له ف محل الذهب اللي تحت بيتنا وهو يعرفه ندخل احيانا مع بعض جان يعصب ويسكر ف ويهي وسبحان الله خبرني البايع ان البيزات ما طاعت تنسحب وسالني لو عندي بطاقة ثانية بس توترت وخفت يوم ريلي عصب قلت له خلاص ماريده وطلعت واتصلت له عطاني محااضرة وعصب وحلفني اخر مرة ويقول لي والله بتنضربين ان عدتيها والله يعلم وين تسيرين وما تخبريني وان يولي بنات وسوو سواتج بضربكم كلكم هههههه وشايفتني طرطور ماتحترميني والعرس ما بتسيرينه ويا ويلج ان قلتي بسير لا تفتحين الموضوع وياي مول وسيارتج باخذها عنج وبخليج تسيرين الدوام في تكسي وانا اهدي فيه اقول له محشووم سامحني اسفة اخر مرة وووووالخ انا ادري اني غلطت المفروض اخبره بس خطافي يعني ما كنت مخططة اسير محل الذهب من مريت عداله وتذكرت عرس اربيعتي ع فكرة صار لنا معرسين خمس سنوات وعندنا عيال والحين حامل ..

المهم تضايقت اخر شي لا خذت الطقم ولا ريلي رضى

تحسون الموقف يستاهل كل هالعصبية ؟؟
من كثر ما اربيعاتي يحنون علي ويضحكون علي يوم يتم يتصل فيني صاروا يوم يطلعون ما يخبروني يقولون ريلج بيحشرنا لا اتين معانا احس مالي شور في طلعاتي ابد

الحين افكر كيف اخذ لربيعتي هدية ما بيخليني اطلع ادري ولا بيخليني احضر العرس هههههههه

سوري بس ماداني هالصنف من الرياييل

الله يعينج عليه

المفروض بداية زواجج ترسمين حدود لاوامره
لازم يثق فيج انتي عاقل

دوم اقول لريلي انت لك حريتك وانا لي
مب شرط اعطيه تقرير وين سرت ووين ييت
الحمدلله اخاف من ربي قبل ماخاف منه
وهو خذاج والمفروض سائل عن تربيتج واطباعج ومايخاف عليج

حبيبتي أنا أشوف ان من حق الزوج يعرف وين حرمته سايرة لو حتى البقالة ،،،، هو مب عدم ثقه هو حرص زائد ،،، يختي ما تعرفين يستوي عليج شيء على الأقل يعرف انتي وين كنتي ويقدر يتصرف ،،، العضوات اللي يشوفونه تدخل زائد اسمحولي الريال هو مأخذ الحرمة من بيت أهلها ومسؤول عنها لا صار عليها شيء أهلها مابيرحمونه ،،،،
المهم ترومين تخلين اختج وإلا وحده من ربايعج تاخذلج هديه وقدميها للعروس ويوم العرس طرشيلها مسج اعتذار ان صار عليج ظرف ،،،
وعقب العرس بفتره زوريها واستسمحي منها ،،،، وعاتبي ريلج ان حرمج من عرس ربيعتج بطريقه لطيفة ،،،،

بقولج شي
من حق الزوج يعرف حرمته وين تسير شبر شبر
بس سوري ما يحق له يشكك في نزاهة حرمته ؟؟

لكن في نوعية منهم ما يحتاي تخبرينهم بكل التفاصيل
و تعطينهم رؤووس اقلام
مب كل شي ينقال للريل بصراحة ؟؟؟ و خلاص تغيري و عوديه ع ها الطبع
و ردي ع تلفوناته يوم يتصل ولا تتورين خلج كول

لان انا لاحظت ع عمري يوم اقول مثلا ت
رى انا بروح السبا و عقب الصالون و عقب الخياط و عقب بمر اخذ لي اسكريم و عقب بتعشى برى
او اقول حبيبي انا بروح الصالون و عقب الخياط و بتعشى برى

جوفي الفرق بين الجملتين ؟
مب لازم تقولين كل شي بالتفصيل الممل
طبيعة الرياييل ما يحبون كثرة الاماكن و كثرة الطلعات
فأنا احب اخلص مشاويري في يوم واحد
لا تكثرين كلام دام المكان واحد خلاص بعد
لا تعطينه التفاصيل شريت و سويت و رحت و بلعت و سرت الحمام

و كل ريال له ستايل معين و كل وحدة تعرف ستايل ريلها و طبيعته
و الحرمة طبيبعتها تفتح ع نفسها باب ان قرقرت و سولفت بتفاصيل حياتها بيتغير طبيعة زوجها

ولو تلاحظون هل عمره الريال يقول لحرمته و هو راد
ترى انا سرت عند ربيعي و عقب سرت الحلاق و تناقشون ف ها المواضيع …..
و عقب سرنا القهوة و عقب تعشينا ؟؟؟
معظمهم لا ما يعطونج تفاصيل طلعتهم هههههههههههه اظن اللي يعطيج التفاصيل هذا غير و سبشل

اما بالنسبة للعرس
ردي ع تلفونج يدامه و سوي نفسج تسولفين لو مع اختج
و قولي حبيبتي اسمحي لي ف خاطري ايى
بس ما اقدر ايى لظرف خاص و ارمسي يدامه مباشرة
و هو ان شاء الله بيسمعج و يمكن يحن قلبه و يغير رايه
انا احب اسوي ها الحركة خاصة يوم ابغي اطلع و اعتذر
ولو ما رضى بعد شو بتسوين مب بايدج
و شكرا هههههههههههه وايد قرقرت ادري

الزوج له حق يعرف وين تروح زوجته حتى لو كانت خطوة برى البيت
مش مسألة عدم ثقة لكن الدين امرنا بهالشي
استغرب من اللي تقول له حريته ولي حريتي
ليش حبيبتي احنا اجانب ولا وين عايشين

الحين لااااا تجيبين له سيرة العرس مووول لانه رح يحس انك تعانديه خلاص انسي العرس وهدي وبعدين عطي فلوس لوحدة من اهلك او خواتك تاخد لها هدية .
مو مستاهلة حبيبتي تسوي مشاكل مع زوجك عشان العرس وياريت رح تستانسين رح يظل بالك مشغول .
روحي لشيخ الشباب بوسي راسه وقولي له خلي يولي العرس ما ابيه ابي افرح بشوفت ضحكتك على محياك ههههه

المشكلة انج عودتي ريلج من البداية تقولين له الصغيرة و الكبيرة
لهالسبب شب عليج لما درى انج في محل الذهب من غير ما تخبرينه
و نحن معاج أن الموضوع ما يستاهل كل هالعصبية و انه يحرمج حتى من السيارة و يشك فيج !!!

ما أقول الا الله يعينج بصراحة و مالج غير رضاه ، أنتي أعتذرتي و خلاص خلي الأمور تمشي مثل ما هو يبي و لا تفتحين معاه سيرة العرس أبد أكسبي رضى زوجج و فوضي أمرج لله … لا تكبرين الموضوع لا تنسين عندج عيال و هو أدعي له بالهداية … الله يوفقج