حبايبي عندي تساؤلات وحابه آخذ مشورتكن
اكيد الحياة الزوجيه قبل ماتربين تختلف من يوم كنتي بروحج انتي وريلج بس
يعني أشهر الزواج الأولى كنت فاضيه اكثر وماحاتي أحد واذا طلعت عادي اتأخر لاني اكون مع ريلي والأمور طيبه
وماخذين راحتنا ع الآآآآآآخر 
الحين الوضع تغير عندي بيبي مسوؤله عنه وماروم اخليه واظهر بالساعات لان يكون بالي عنده
فريلي أحيانا يباني أسوي شغلات أحسها صعبه علي مثلا اسير معاه السينما بوقت متأخر
طبعا ماروم الحين لأن ولدي صغير وماروم اخليه هالوقت واذا شلته بيتلعوز حرااام فأقوله ماقدر
وكم مره خذناه معانا السينما وماتهنينا بالفلم 
الحين طلعاتي معاه قلت مب نفس قبل طووول الوقت طلعات مولات ومطاعم وفنادق وغيره
واذا طلعت احاول ماأتأخر اذا ولدي فالبيت او اشيله معاي أغلب الوقت
فاحس اني اكسر بخاطره مرات لانه تعود علي دووم اظهر معاه ونسوي الي نباه فأي وقت
وحاليا يبانا نسافر انا والبيبي بس مادري متخوفه من الفكره قبل كان عادي عندي بس من ربيت احس تغيرت اهتماماتي ومسؤولياتي وبنفس الوقت مابي امنعه من شي هو خاطره فيه فكيف اتصرف ؟؟
هو للأمانه يساعدني ويحب ولده وااايد ماشاءالله يعني لو طلعنا ماأتعب معاه لانه يحب يمسكه ويونسه
لكن الطلعه نفسها تكون اصعب ولازم تترتب فإذا طلعت يكون لمول اتشرى وأرد البيت
حدي الساعه عشره او 11 وهو متعود يتأخر ل2 مثلا فصعبه علي ارد البيت هالوقت والولد حليله يبي يرقد ولازم اغير ملابسه واعطيه حليب و و و
أحس للحين ريلي ماطلع من جو حياتنا فالأشهر الأولى فكيف اتصرف ؟؟ وكيف ارضيه ومااقصر بحقه ولا بحق نفسي او ولدي ؟؟
نسوي اللي نبـآه نطلع ونرد متـى ما نبـآ بدون التزآمات أو مسؤوليآت
لكن شي طبيعي جدآ تتغير حيآتكم عقب البيبي الله يخليه لكم
فهمّي ريلج انه الوضع شوي غير الحين ولازم ترتبون جدولكم عشآن البيبي
لآزم تترتب طلعآتكم وييآتكم عشآن لا يعتفس رقاد الياهل وما يضآيج من الطلعه
عآدي حبيبتي آنا كانت حالتي نفسج لكن من عقب ما ربيت هو بنفسه شآف الوضع و اقتنع
كنسلت السينما و الطلعات الي مب ضروريه ، تخليت عن وايد أشيــآ
لكن طبعــآ اسيـر الفنآدق و أشل بنتي ويـآي ومستحيل أطلع مكان بدونهـآ إلا الكليـه
ودآم ريلج وده يسآفر وياكم عادي سيروا واستانسوا مافيها شي بس خذي كل الاحتياطات
وإذا ع السينما سيروا العروض اللي من وقت مب المتآخره
وإذا عندج حد آيود ولدج [ امج ولا خواتج ] بعد زين عشان تعوضين ريلج
الي ما تزوجت تحاتي تتزوج, والي تزوجت تحاتي تحمل, والي حملت تحاتي الربى , والي ربت تحاتي البيبي وبعده يجي البيبي الثاني يزيد عالكوم وهكذا
هذا يا اختي الي تشتكي منه هم كل أم!
وهذا طبعا غير صدعة الراس وقلة النوم وشكل الجسم الي تلخبط والتوتر المستمر الخ
اسأليني أنا
الجنة تحت أقدام الأمهات
لازم تصبري وتحاولي تنظمي حياتك,ولازم تستغني انت وزوجك عن أشياء كنتم تسوينها قبل لأجل خاطر هالبيبي
طبعا انتي قادرة ترميه عند الشغاله او امك وتروحي وتتأخري على كيفك ,لكن انا ما اشوف ان هذا تصرف أم
وكان الله في عوننا جميعا
اختى يبالج بس ترتبي نفسج انتى ولدج وريلج
انتى الحين المسئولية كلها عليج فﻻزم بس ترتبي
وقتج يعنى تطلعون من الصبح بدري
حلاتها طلعت الصبح صحه ونظام
يعنى في الويكند بدل الرقاد الظهر
اطلعو من بدري نفسه ريلج
بيتعود على النظام
وربي يحفظهم لج