مشكلة اهمال اهلي أطلع و ادخل من البيت و محد يسأل عني !

مشكلتنا فالبيت انه محد يدري عن الثاني .. تقولون كل واحد عايش بروحه ! ما نجتمع الا على وجبه وحده فالاسبوع الي هي حزة الغدا يوم اليمعه ..

بنات من الآخر يوم اطلع ويا ربيعاتي او بنات عمومتي مثلا حواطه و سينما ..لازم لازم كل وحده فيهم امها او حد من اهلها يتصلون يتطمنون عليهم ! او يحطولهم وقت معين مثلا هالساعه تكونين فالبيت ! و لو ما ردت هالحزه اتم على اعصابها و التلفونات ما تسكت من اهلهم !! ..

بناات انا خاطري أجرب هالشعور والله من قلبي اقولكم ..صح انه الثقه شي حلو و لله الحمد .. بس مب لهالدرجه يعني ! خاطري امي او ابوي يرفعون السماعه يسألوني وينج و منو وياج ، او يقولولي يالله ردي البيت ..

خاطري مره و انا طالعه من البيت يزخوني و يحققون وياي .. ابا احس بالاهتمام شوي هممم يمكن ابا احس بغلاتي عندهم .. او عالاقل انه وجودي فالبيت يعنيلهم ..

حتى ربيعاتي انتبهوا و قالتلي وحده الله يذكرها بالخير " يا حظج مرتاحه من الصدعه محد يحاسبج " … ليتها تدري كيف انقهرر من هالسالفه ..

ساعدوني بنات ماعرف اخاف اكلم هلي و يتحرون انه وراي شي او يفهموني غلط .. و مرات اقول اتم ساكته احسن مب انا الي كبروها بيي اليوم و بعلمهم كيف يربوني او يتعاملون معاي

.. ملاحظه اخيره لانه اكيد بتسألوني : امي مديرة احد المراكز و تعشق شغلها ماشاءالله عليها اظني هذا الي خاطف عقلها .. و على قولتها انا حرمه و قويه ما ينخاف علي .. ابويه عنده بزنس خاص طول وقته يراكض ورا مكاتبه ماشوفه دوم لاني ما اقعد فالبيت وايد

اخواني 1 اكبر مني و 1 اصغر عني يدرسون برع، و يوم يكونون فالبلاد بعد ماشوفهم وايد .. و عندي اخت وحده اصغر مني ب 11 سنه

الله يوفقج ويحفظج

مافيها شي لو صارحتي امج باللي فخاطرج … ما بتحصلين احن من قلبها عليج … ودوووم فكري بالشي الايجابي عدم سؤالهم عنج مايعني ابدا انهم مش مهتمين فيج …بالعكس لانهم واثقين فيج وفتربيتهم ..

كلنا نحب انه حد يسأل عنا ويحاتينا … بس نعذر لانه الكل عنده مشاغله ..

صارحي امج فيلسه هاديه وقولي اللي فخاطرج من غير عتب ولا انفعال .. والله ايسر امرج ويحفظج

بس كلمي امج و قولي لها من اسمع حسج بالفون استأنس يالغلا و يعني عاد أكيد كلن و أسلوبه يا غناتي

والله يحفظج