شحالكم بنات ,, عساكم طيبين ,,
المهم ؟!؟!
ابغي مساعده منكم ,,
صار لي متزوجه 10 شهر ,, ما يمر علينا اسبوع الا نحن متضاربين ع شي تافه
هو من النوعه العصبي ,, ويحب يفرض رايه
بس مهما كان انا بعد لي راي
يمكن المشكله فرق السن الي بينا
انا عمري 20 وهو 26
تفكيره مال اول مب شرات اللحين رغم انه دراس فبريطانيا 4 سنوات
انا من النوع الي احب الموضه ,, احب اي شي يديد
بس والله لو قلت لكم الاشياء الي نتضارب عليها بتضحكون ,,
1-ما يحب المكياج ,, بقلب البيت نكد
2- الفساتين ,, قضيه الشرق الاوسط لو لبست
3- السفر ,, لحد اللحين ماسافرت شهر عسل ,, لانه مايحب سفر
4 – الفنادق ,, شو تبي فيه البيت احسن لج
5- طلعات المولات و السنما ,, انا مليت وتعبت اريد ارتاح
6- امه ,, ماتحبني بالمره
7- بلاك بيري
كم مره رمسته ,, بس ماشي فايده ,,
ها الاشياء مستحيل اي ريال ما يحب حرمته تسويها
عطوني الحل ,, والله تعبت
احس حياتي كلها نكد وضيق
الله يهديكم
بس حاول والله بكل الطرق بس ماشي فايد ,,
هلافديتج اول شي اي فارق ترمسين عنه فديتج بالعكس فرق السن مابينكم حلو
وهو اذا يقولج هالكلام عادي يمكن يغار عليج يمكن يجربج عطيه اعذار لان دوم اي زوجين فاول حياتهم تكون عندهم مطبات لااااااازم
عيل لوخذتي واحد فعمرج 20 سنه بتقولين بعدين هذا مايقدر المسؤوليه
اذا ريلج مايبا يسافر خلاص لاتحنين بعدين بروحه بيقولج بنسافر او يوم طالعون تي في وطلع منظر حلو قوليله الله خاطريه اروح هالمكان وحتى لو مااعلق المهم انج بينتيله انج تبين تسافرين من غير ضرابه وبوز 
واذا قالج لاتحطين ميك اب لا تحطين ومرات حطي بس شي خفييييييييييييييييييييف يمكن لانج ساكنه عندهم فالبيت ويغار عليج مايبا حد يجوفج به
وعالفساتين البسي الي يحبه وشوي وشوي غيري مب عنادا فيه لازم تلبسين فستان ترا الرياييل نفس اليهال اذا جافوج تعاندينهم بيعاندون بزياده
واذا على امه فديتج حاولي تكسبينها والله بعدين بتقولين ام خليفه قالت لاني جربت اهديها اي شي واجينه العيد ياي اهديها مخور ذهب عطور دخون الي تقدرين عليه وحتى لو هي ماعلقت بس بتستانس من داخلها اكثر شي اذا انتي اول وحده تهدينها من حريم عيالها
واذا عصب ياختي لاتردين عليه الزواج هب عناد وسب وترادد فالكلام خليه لييييييييييييين مايهدا ويكون موده اوكيه وكلميه ماعليه صبري ترا ماشي كرامه مابين الريال وحرمته ابدا لاتحطين حاجز مابينج وبينه ولا ترا وايد بتتعبين ولاتسمعين كلام حد سواء من ربيعاتج ولا هلج (بنات عمج عمتج اي حد ) اذا يقولوج لاتسكتين ردي عليه وخلي شخصيتج قويه لانهن هن مايعرفن شو علاقتج بريلج وشو طبعه
وانا اقولج مرة ثانيه ترا الزواج مبني على تانازلات اذا هب من الحرمه يكون من الريال واذا ريلج عصبي شرا الي عندي ههه خليج انتي الي تتنازلين بس بحدود وخلج انتي الاحسن والاعقل وصدقيني بيي يوم وبترتاحين اذا مب اليوم باجر
والله يهديه ويهديج انتي بعد ليش لا ويسعدكم ويوفقكم يارب
هيه صح بالنسبه للسفر وشهر العسل انا احينه صارلي 3 سنوات معرسه ولاجفت السفر هههههههه وسااااااااااااكته عادي جدا فاصبري غناتي الصبر مفتاح الفرج
تقبلي مروري اختج ام خليفه
واذا تبين اي شي من اسئله او استفسار انا حاضرة نحن خوات فالله الحمد لله
والمشاكل الي بينكم انا ما اشوف لها لزمه انج اتسوين عليها الضرابه كل السالفه وما فيها ريلج يغار عليج ويحب اتكونتي ملكه بس انتي مب حاسه
واما سالفه امه حاولي اتراضيها