من بريد المشكلات المشكله الـ مصخرة صارت بدوامنا 2024.

السلام عليكم ورحمة الله

بنات حبيت افضفض عن موقف صار من يومين وسبب لي نوع من الاكتئاااب ,,

الله يسلمكم احنا شغلنا مافيه مراجعين يعني احنا الموظفين بس خبصة مع بعضنا
ودوامنا تقريبا ثلثين الموظفين رجال والباقي حريم
والنقظة الثالثة ان اغلب الرجال الموجودين وافدين ومقيمين ,, مافيه الا شوية اماراتيين رجال ,,

طبعا البنات اغلبهم اماراتيات شوية بس اللي وافدات ,,

عطيتكم هالهذرة علشان تعرفون ابعاد موقفي

عندنا كمن بنت امهاتهم مصريات ( والله موب قصدي اهين حد بس هذا اللي صاير ) ,,

البنات هذيل سووا قروب خاص وهم ربيعات واااايد ,,

احنا علاقتنا ويااااهم وايد زينة وإن كنت ما نجاريهم في بعض التصرفات يعني هم رافعين الكلفة مع الرجال وايد واصواتهم عالية في الصالة ويقعدون مع اي موظف وافد ويسولفووون وعادي عندهم بس مع المواطنين ما يكثرون الكلام واايد

قبل سنة تزوجت وحدة منهم واول يوم داومت بعد الزواج جابوا كيك وسووا حفلة ,,, طبعا احنا شاركناهم وكنا فرحانين لها لأنها زميلتنا وبالنسبة لي اعرفها من ايام الجامعة .

بعدها بشهرين تقريبا تفاجأنا بكيكة ثانية ولمة وحفلة والا عيد ميلاد وحدة منهم ,,

طبعا استغربنا وكان فيه استنكار من البنات والشباب الاماراتيين للموضوع ,, كيف حفلة عيد ميلاد بالشغل وقدام الرجال ,, بس مافيه حد اتكلم

وبعدها بفترة كمن شهر عادوا وجابوا كيكة ثانية وحفلة لوحدة ثانية منهم لعيد ميلادها !! ,, وصار نفس الاستنكار ,, بس محد كلمهم بالموضوع ,,

الاسبوع الماضي تفاجأنا ان العاملين قاعدين يركبون بالونااات وشعارات حفلات عيد الميلاد وزينة وحركات بالممرات واحنا تفاجأنا شو اللي يصير ؟؟ شوي والا يقولون عيد ميلاد وحدة من القروب اياااه ,,!!

طبعا هنيه واااايد استنكرنا خاصة ان الرجال الوافدين واااايد تطنزوا وتمسخروا ,, والمواطنين تضايقوا ,, في المرات الماضية كانوا يجيبون كيكة وبس ,, لكن هالمرة زينة وبالونات ,, ثقيلة يعني!

الاخس صار بعيدين ,,
اول ما وصلت البنت اللي مسوين لها حفلة والا هم يجيبون بخاخات الاشرطة والثلج ويرشونها بنص الصالة وصرييييييخ وهرج ومرج .,.,

وواحد من الموظفين الوافدين اخذ اسبريه وقام يرش معاهم ,,

طبعا انا ما قدرت احتمل المنظر لأنه قمة المهزلة حرمة قاعدين يرشونها بالبخاخااات قدام الناس مهزلة كبييييرة .. فانسحبت من الصالة ورحت المصلى ,,

بعد ما هدأت الضوضاء رجعت والا هم مولعين الشمووع والرجال اللي في القاعة كلهم يغنون لها هابي بيرث داااي!!!!

انا ما شاركت وشفت الشباب الامارتيين طلعوا من الصالة وطلعت انا معاهم واسمع الكلام اللي مثل السم منهم :
– مصخرة
-قلة احترام
– مافيهم ادب
– استعراض
– ما ينلاموون محد رباهم
وكلام من هالنوع ,,

طبعا البنت اللي مسوين لها الحفلة غالية جدا جدا جدا على قلبي ,, وانا ما ارضى عليها بنص كلمة ,,

انتظرت لحد ما الخبصة انتهت رحت لها انا وزميل لي وااايد تحترمه وتقدره ,,

سلمنا عليها وزعلت علينا تقول لي : ليش ما تشاركوني فرحتي ,,

قلت لها بصراحة ما عجبني اللي صار ..

قالت : ليِش؟؟

قلت لها لأنه كان استعراض وكان اوووفر
وقال لها زميلي : الناس علقوا وقالوا مصخرة!

قامت صارخت علي وتقريبا قالت لي روحي انا ما يهمني رايج !

وقالت أنا حقي عليكم تدافعون عني قدام اللي قالوا انه مصخرة ,,

قلت لها : يخسي حد يغلط عليج هم علقوا ع الموقف .. وبالفعل كان موقف بايخ ,,

وهي قالت انا ما احتاج نصيحة منكم والمفروض تكلمون اللي سووا الحفلة موب تخربون عليه فرحتي!

فأنا رجعت مكتبي وخليتها

شوي والا القروب اللي مسوي الحفلة رايحين لزميلي اللي راح معايه نكلمها ,, وقاعدين يقول له : انت كيف تسمع كلام فلانه وهذي حاقدة وما تحب اننا نفرح وانت اذا تبا تنصحنا انصحنا قبل الحفلة وانت مثل اخونا واحنا ما نريد انت تزعل ,,

فهو قالهم: فلانه تحبكم وتخاف عليكم ولو انها حاقدة كانت تكلمت عليكم وبعدين راحت وصفقت لكم بس هي ما رضت عليكم وجات وقالت اللي في خاطرها ,,

بس هم ما رضوا يتقبلون اي كلام وصار انطباعهم اني انا البومة اللي تريد تخرب احتفالهم !

نفس اليوم انا رحت للبنت اللي مسووين لها الحفلة قبل لا اطلع من الدوام بس هي قالت لي كلام يجرح وقالت انتي مشكورة لانج طلعتي على حقيقتج قدامي!!!!! وخربتي يومي مع ان كان المفروض يكون يوم مميز,, !!!

قلت لها : الحين تميز يومج بالمصخرة قدام الناس اما انتي تفكيرج غريب ,, وقلت لها عرفت انج ما تعرفين تقدرين من اللي يحبج واللي يبا يمصخرج قدام الناس …

واتصلت بباقي البنات كان في قلبي حرة اريد اعرف متى انا حقدت عليهم او خربت لهم حفلتهم علشان يقولون الكلام السم اللي قالوه

بس ولا وحدة ردت ,, وثاني يوم بالدوام ولا وحدة جات صوب مكتبي ,, وانا قررت اني اطنشهم ولا اسوي لهم سالفة ,,

والحين انا متضايقة لان اللي كانوا مسوين لها الحفلة واااايد احترمها واقدرها بس صدمتني بردة فعلها

الحين انا متكدرة لأن اللي مسوين لها الحفلة ظنت فيني ظن السوء ..

لكني اخترت اكلمها هي لأن علاقتي باللي مسوين الحفلة موب قوية ، ولأن هالبنت هي اللي بدت تقليد حفلات الميلاد بالدوام، ولان البنت هذي اكبرهم واعلمهم ولأنها اصلا شبه مسؤولة عليهم ,,

شو رايكم ؟؟