يالمتزوجات والمالجات النظرة الشرعية بليز ساعدوني 2024.

بسم الله الرحمن الرحيم
السلام عليكم ورحمة الله وبركاته
لوسمحتوا الغاليات ممكن مساعده

انا البنت الوحيده لابوي تقدم لخطبتي واحد و يبي يشوفني لأول مرة يعني ( النظرة الشرعية – الشوفه الشرعية )ســــــــــــــــؤالي اللي مر فهالتجربة الاماراتيات فقط سامحوني بس بحكم العادات والتقاليد !

شنو تنصحوني البس هل احط مكياج أو لا وشعري شو اسوي فيه ؟

هل اروم البس فستان خفيف او تنوره وقميص أو مغربي او مخوره او جلابية ولا المفروض عباية وشيلتها ؟

لان الدين رخص للفتاة أن تلبس ماتيسر أمام الخاطب للتمسك بها وبالنسبه للحدود التي يجوز أن يراها الرجل في مخطوبته ، فقد اختلف في ذلك أهل العلم ، فمنهم من قال : تكشف وجهها ويديها ورأسها ومكان قلادتها ، وقال البعض الآخر يكفي الوجه والكفان ، والقول الراجح في تلك المسألة أنه يجوز لها أن تكشف له ما تكشفه على محارمها وهو :
1)- رؤية الوجه والشعر
2)- رؤية مكان قلادتها
3)- رؤية يديها حتى الدبلج ( أعلى المرفق بقليل )
4)- قدميها ، والله تعالى أعلم

هذا الشرع والدين لكن المعروف ان لكل دولة عاداتها وتقاليدها هني فالامارات شو المفروض اني البس ؟ فيدوني مالي غيركم
عادي احط ميك اب ؟ عادي افك شعري ولا ضروري الشيله ؟ شو اقول ولا اتم ساكته ؟ شو اسوي ادخل الميلس واقدم عصير ولا قهوة ولا ادخل فاضية اسلم وايلس دقيقتين ؟
اللي تعرف تفيدني ولاتبخل علي .. فرصه ترجعون لذكرياتكم الحلوه وتفيدون المقبلات على الزواج وفي ميزان حسنااتكم ان شاء الله
بانتظاركم ردودكم الحلوه خواتي ضروري واللي ماتعرف ترفع الموضوع بليييييز

والسموحة

ماشاءالله اختي منزله 5 مرات هالموضوع يكفي واحد

وعليكم السلام والرحمة

الله يكتب لج اللي فيه الخير

النظرة الشرعية تكون (( بعد )) السؤال عدل عن الخاطب والموافقة عليه و رضى البنت عنه و صلاة الاستخارة

بالضبط شو تسوين في اليوم اللي بيشوفج فيه

دخلي الحمام فرشي أسنانج تسبحي ولبسي ملابس مريحة حطي ماسكارا و مرطب ملون للشفاة جذي تبينين طبيعية حلوة

لبسي شيلتج وعباتج و دخلي مع ابوج او اخوج ويتم قاعد معاكم

هو ريّال غريب وممكن مايتم الموضوع اصلا فليش تراوينه شعرج او شي من جسمج واللي هو عورة على الغريب؟؟!!!!!

بس الوجه والكفين وقعدي عدال ابوج او اخوج
حتى لو ماصار نصيب ما ايي يوم تسمعين انه تطنز عليج يقول حاطتلي ماكياج سهرة و لابستلي ماعرف شو!!!!

خليج في السليم

ماسكارا و مرطب ملون وبحجابج و عباتج

ولا تقعدين بروحج معاه لأنه خلوة و حرام لازم حد معاكم

بعد الملجة البسي له و تمكيجي بس بدون ماتخلينه يدخل وحتى وقت تكلمينه بالتلفون تكلموا غي كل المواضيع الا موضوع الجنس، ويفضل الملجة تأخرونها لين قبل العرس بأيام وبالكثير اسبوع

ماشاء الله كفت ووفت

مشكوره اختي يزاج الله كل خير
الله يرزقج الجنة بلا حساب ولا سابق عذاب
فديتج ماقصرتي

من كلامج فهمت انك مغربية وبتتزوج مواطن صح
سوي عداتكم احسن حتى يتعود عليك مثل ما انت و بلمبارك
وعلى العموم كل الدول الاسلامية والعربية البنت يوم النظرة الشرعية لبسها بيكون ساتر
ومكياج خفيف لان الريال مهما كان غريب مو محرم
والله يتمم لك بخير

هههه لا حبيبتي غلطانه ما اعرف شو ارد عليج الصراحة الله يصلحج ويهديج وان بعد الظن اثم
انا اماراتية ولكني من امي عربية مطلقة وما في بينا تواصل لانهم منفصلين من كان عمري 11 سنة
وماعندي اخوات اسألهم واستحي اسأل وحده تعرفني تضحك علي وسلامتج ياحلوه