يا أمهات خلونا نعيش الأمومة 2024.

طبعا أجمل شعور عندنا ، يوم الحرمة تكون أم خاصة ولأول مرة…
بعد التعب و العناء في الحمل، تفرح بشوفة ضناها،،
وطبعا قبل لا تربي، تكون حاطة في بالها كيف تربي البيبي، والنظام اللي بتمشي عليه..
وبتكون قارية كتب و مواضيع عن كيفية تربية الياهل،،
والحين مش مثل أول،، قبل كانت الحرمة تسوي كل شيء و الريال مسؤول عن شيء ثاني..
أما الحين لا..
الريال و الحرمة يتفقون ع كل شيء مع بعض..

بس الشيء اللي يحطم هالشعور، الشعور بالفرح هو يوم الناس تتدخل في كيفية تربيتج لطفلج.. خاصة يوم يحسسونج انج "ما تعرفين شيء" و "انه كل الدكاترة في العالم ما يعرفون شيء"
ويظهرون كل اللي تسوينه غلط… ويضحكون عليج يوم تقولين "بشاور ريلي" ومن تعليقاتهم اللي مالها داعي "منو الأم انتِ ولا هو"

صحيح يمكن الأم ، كونها أم لأول مرة، بتجهل وايد أشياء،
بس هالشيء طبيعي، محد ينولد و هو يعلم بكل شيء..
في أشياء نجهلها و أشياء نكتسبها بعد مرور الوقت…

مثلا، موضوع متى الحرمة تأكل طفلها،،
الدراسات تدل انه الأفضل الياهل يبدأ أكل بعد 6 شهور،،
فتيج حرمة و تعق عليج رمسة بس عشان انتِ ما أكلتي البيبي من هو 4 شهور،،
طيب ما فيها شيء،، انتِ مقنعة انه عادي، أنا مقتنعة انه البيبي أفضل ياكل بعد 6 شهور..
مافيها شيء لو تنفعيني من خبراتج و تجاربج بس مب لازم تجبريني اني أتبع خطواتج كأم،،

وبعدين الأم لازم تخاف على ضناها،، مب حلوة انه الناس يعايرون الشخص و يقولون "كـنج الوحيدة في العالم عندها بيبي" مب حلوة والله،،
نسيتي يوم انتِ كنت أم كيف كنت تخافين على عيالج؟
نسيتي يوم كنت تصيحين يوم البيبي يصيح؟
نسيتي يوم كنت تخافين يوم البيبي ما يمشيه بطنه و تركظين المستشفى من الخوف،
عيل الحين دورنا نتعلم،،، لا تحرمونا من هالشيء،،
نريد منكم تجاربكم بس مب أكثر،،

خلونا نربي عيالنا مثل ما نحن نشوفه مناسب، دامنه ولله الحمد ما علمنا عيالنا شيء خارج دينا،،،

أتمنى ما تزعلون من كلامي..

خصوصا في تربية البيبي سوي الي انتي مقتنعه فيه ….
واراء الناس تختلف

شوفي الصح لعياالج وتوكلي

مشكوره الغالية ع الموضوع ولو انو فتحتي جروح بتمنى انها تندمل بيووووووم

الله يحفظ عيالج
ويرزق هالبنت الي تبا توم
ويرزقني انا بعد توم :$
~> عرسي قبل

ههههههههـ، دعواتكن لي بالأتوآم