يومياتي في قراءة سورة البقرة وشو صار معاي 2024.

بسم الله الرحمن الرحيم

السلام عليكم
هذا موضوعي الاول للي ما شافته (اضغطي على الموضوع تحت)

يومياتي في قراءة سورة البقرة.. وشو صار معاي

طبعا انا بعد ما خلصت قراءة سورة البقرة حسيت بشعور راحة نفسية كبيرة الحمدلله..

كنت اسمع من وايد بنات انهن يحلمن باحلام مب زينة مثل جن وحد يقول لهن لاتقرين السورة..ألخ بس انا ما واجهت اي من هالاحلام والحمدلله وهذا يعني ان ما علي عين او سوا او حسد.. (مع اني قبل كنت اتحسب ان فيني عين)

عقب الاربعين يوم.. قلت باخذ بريك كم يوم وببدأ من اول وجديد.. وقولوا شو صار فيني يوم وقفت..

1. مسكتني عصبة في رقبتي وتمت تعورني يومين..(اي صدق تعور) وما رمت احرك رقبتي
2. الريال اللي اهله كانوا على وشك الموافقة.. اجلوا الموضوع..لان اخوه سووا حادث (الله يهدي شبابنا اللي المتهورين في السواقة).. اخ يالقهر ..لول
3. طبعا كان يوم ميلادي من كم يوم وعمري صار 550 سنة ويعدني عا……آنسة

الحين قررت ابدأ من اول وجديد وبقوة..
اللي حابة تبدأ معاي ترسل لي اسمها الحقيقي على الخاص وبشو تباني ادعي لها وان شاء الله بسوي ليسته بالاسماء مرة ثانية وما بنسى اللي قبل طرشن اساميهن لان الليستة الاولية لازالت عندي

اللي بدن معاي قبل وما خلصن.. اكيد بيكملن بس اللي مابدت وتبى تبدأ

بنبدأ مرة ثانية من يوم الخميس الموافق 6-3-2009
وبننتهي على يوم الثلاثاء الموافق 14-4-2009 وبرد احط يومياتي واخر تطوراتي في موضوعي العالق (الله ايسر علي وعلى كل البنات)

ملاحظـــــــة مهمة ومفيدة: اللي تبى تقرأ القران في الدوام وهي فاضية او فيها الحلوة وماتروم تمسك المصحف وتبى تقرأ من النت
حصلت موقعين وايد حلوين وصراحة الله يجزي كل شخص اشتغل على هالموقعين الجنة ان شاءالله.. لانه صدق متعوب عليهم

1. https://quran.muslim-web.com
ترومين تختارين القاريء.. وترومين تشوفي الصفحات مع التفسير مع خاصية الحفظ.. وااااايد حلو السايت

2. https://tanzil.info/
هذا السايت فيه اكثر من لغة.. العربية والانجليزية زالفارسية والهندية..ألخ وفيه ايضا التفسير واختيار الصفحة..ألخ بعد مفيد وحلوانا ضفت السايتين للمفضلة عندي عشان ما اضيعهم… يعني الحين ما في عذر للتكاسل

بصراحة اتمنى اشوف مشاركة الكل.. ويمكن نحن ما نقدر انساعد بعض بس اكيد نقدر ندعي لبعض.. وما تعرفن يمكن تستجاب الدعوة ورب العالمين كبير ويعرف ما في النفوس..
قال رسول الله : ( دعاء الأخ لأخيه في ظهر الغيب لا يرد)

عن أبي الدرداء -رضي الله عنه- قال : قال رسول الله صلى الله عليه وسلم "دعوة المسلم لأخيه في ظهر الغيب مستجابة عند رأسه ملك موكل به، يقول له كلما دعا لأخيه: "آمين ولك مثله"

وقال الله – تعالى -: "وقال ربكم ادعوني أستجب لكم"، وقال في الحديث القدسي: "أنا عند ظن عبدي بي"، وقال الرسول – صلى الله عليه وسلم -: "إن الله حييٌ كريم، يستحي أن يرفع العبد يديه ثم يردهما صفراً خائبتين"

والاخلاص في النية اهم شي.. اذا ما تحقق الشي اللي تبينه بعد ما بديتي قراءة سورة البقرة.. لا تقولين اووه الله ما استجاب لي. وانا تعيت وانا ادعي واقرأ بس بعدني منتحسة.. وما صار اللي اباه…ألخ

بالعكس قولي الحمدلله على كل حال ويمكن باجر يكون احسن عن اليوم وردي اقري وادعي مرة ثانية.. واكيد لرب العالمين حكمة في عدم الاستجابة اليوم.. يمكن في شي انتي ما تشوفينه في امنيتج ويمكن في شي احسن بوااايد ينتظرج بس بعده ما يا الوقت انه يطلع عندج

بقولج قصتي: من زمااااان كنت ابا واحد من اهلنا وكنت ادعي ليل نهار ان الله يجمعني فيه لانه كان مثال الانسان اللي كل بنت تتمناه من صلاة وصيام وحاج بيت الله ورياضي ومايدخن ودارس ومثقف ويشتغل ووسيم..ألخ

تميت سنتين ادعي يوميا انه يكون في نصيبي وقمت ليل وتميت اقول يارب اذا هالانسان فيه خير لي في ديني ومعاشي وعاقبة امري يكون في نصيبي واذا ما كان يارب ابعده عني وارزقني اللي احسن عنه..

وبالفعل اتقدم لي.. وكنت طاااااااااااااايرة من الفرحة.. قلت معقولة انا واايد محظوظة… واااو
قلت بصلي استخارة عشان اقطع كل وسواس

بعدها بكم يوم.. شفت الريال مع وحدة (مواعد) في كوفي شوب وهو ما توقع اني ممكن اروح هناك.. وانا كنت بالصدفة داخلة المول لحاية مع ربيعتي وانا طالعة يت عيني عالكوفي شوب وعليه هو بالاخص..

انا انصدمت ورديت اطالع عشان ما اكذب نفسي.. وسألت ربيعتي.. انتي شو تشوفين هناك,, قالت ريال ويا وحدة!!! (وهي ما تعرف منو هو)

وطلعت وانا تفكيري منشل.. ولا قادرة اتكلم..!!!
وصحت صياح هاك اليوم وعلى طول بدوووون اي كلام قلت نو واي.. ما اباه.. وهو من سواد الويه ما رد حتى يحاول يقنعني اني غلطانة…

من عقبها كنت كل يوم احمد ربي انه كشف لي هالانسان قبل لا اتوهق فيه واتعلمت درس صح ان الله استجاب دعائي بعد سنتين بس رواني ان هالانسان مب هو الانسان المثالي لي ورواني فيه شي ما كنت اتخيله فيه.. واكتشفت انه مسوي نفسه انسان صالح وديُن وهو من هناك…………… وتزوج وحدة اجنبية! عشان تخليه يلعب على كيفه

عشان جي اقولكم لا تحزنين اذا ماحصلتي الانسان اللي تبينه لان الاحسن يترياج.. ولا تيأسي ابدا لانج ربحانة في الحالتين.. اذا حصلتي الشي اللي تبينه فهذا خير لج واذا ماحصلتيه فهذا ايضا خير لج بس اكيييييد حصلتي الاجر الوفير

الحين هالانسان اللي انا اباه.. ادعي ربي دايما انه يجمعني معاه بالحلال اذا كان فيه خير لي واذا ما كان ان شاء الله يبعد عن دربي..

اسميني انا وايد ارمس..
خلوني اطلع من هني قبل لا اقول قصة ثانية…

دمتم في حفظ الله

مستجدات اول 10 ايام في الرابط اللي تحت.. مشاركة رقم 107

https://forum.uaewomen.net/showthread…415631&page=16

مستجدات ثاني 10 ايام في الرابط اللي تحت.. مشاركة رقم 152

https://forum.uaewomen.net/showthread…415631&page=22

انا معاج الغاليه اول وحده

ربي ايوفقج اختي
بس تعرفين لازم الواحد يكون عنده يقين انه الله بيحقق له اللي يتمناه
يعني نؤمن بقدرة ربنا

أنا اسمع صورة البقره من شهر تقريبا بس أحاول اخلي عندي يقين انه الله بيحقق لي اللي اتمناه
وهالشي اللي متعبني لأني اخاف من الزمن والناس لكن فنفس الوقت عارفه انه ربي معاي
أتكنى تددعين لي ربي يهديني ويطمني

ان شاء الله راح نبدا وياج

الله يحقق اللى في بالج وبالي يا رب

وانا بعد ببدا وياكم

ووقت الدورة نقرا من المصحف الالكتروني صح؟؟

ان شاء الله معاكم