ما أعرف شو إلي حادني وفتحت صفحة موضوع يديد ..
مرت عليكن إنه شيء يصير لكن .. ويمر عليه سنين وتنسنه !
وتييكم فتره تذكرونه على طول .. لدرجة إنه يكون شغلكن الشاغل !!
هالشيء يصير ويايه الحينه .. ومب عارفه ليش ؟! الحمد لله على كل حال ..
الحادثه إلي صارت ويايه .. وفاة يدي الله يرحمه ..
يدي توفى فجأه من رد من صلاة العصر .. وبلا يا مرض ..
بس كان فيه مرض بسيط في أعصابه .. ونسى القرآن يوم ياه هالمرض ..
هو كان حافظ القرآن .. وعقب قامت تييه شرات حالات الصرع بس بسيطه ..
من سنة 2024 .. والله ماخذ أمانته .. والحينه عايشه في خيال مب طبيعي !!!
ما أعرف شو صاير بالضبط .. أحس بفراغ مب طبيعي ..
أحس فيه شيء ناقصني .. فيه شيء ضايع ..
مع إنه والله قبل هالسنه .. ما حسيت .. حتى أصلا نسيت شكل يدي ..
والله قمت أشتاق له بصوره مب طبيعيه .. وعادي تشتاقين حق واحد تحت الثرا ..
أريد بس أحضنه .. بس أسمع ضحكته !=(
قلت يمكن هالشيء بيسير لو التزمت بقيام الليل .. قمت أخلي أبويه يوعيني قبل صلاة الفير ..
لأنه دوامه من غبشه .. وبديت أصلي ولله الحمد ( فعلاً شعور رائع ) !
قمت الصبح وأنا سايره الكليه ويا أخويه لازم قرآن .. وطبعا الأذكار وغيره هذا شيء لازم !
والله أحس الشعور بالنقص قام يزيد ..
أنا أكبر بنيه وأخويه أكبر حفيد في العايله .. وابويه يوم كنا صغار ما أذكره أبد..
كله سفرات ومهمات .. وربينا في بيت يدي ويا أعمامي طبعا ..
حتى أمايه تقول .. والله يدج ماخلاني أحس إنه أبوج مسافر ..
نحن طول الوقت كنا وياه .. كل شيء هو علمناه إياه ..
كيف نقرأ القرآن .. الأذكار .. كل شيء كل شيء .. ظهراتنا طلعاتنا
مشكلتي بدت يوم حلمت بيدي .. طبعا أكيد كل وحده فينا من تكبر تحس بإنها تبا حد يملي عليها عاطفتها !
أنا هالشيء ما ياني ( لين الحينه الحمد لله ) بس طبعا في الكليه البنات هب مقصرات في هالسوالف ..
ومره حلمت إنه شيء ريال غريب في الحلم .. والخ ما بذكر الحلم ..
ويدي كان فيه .. والله نشيت وأنا زايغه ..
الأحلام عادةً الويوه فيها ما تكون واضحه .. بس أنا حلمته واضح ..!!!!
بكل شيء فيه .. حتى كان لابس كندورته وحاط سفرته على جتفه .. جيه كان يسوي من يرد من المسيد !
من ذاك اليوم .. وأنا معتفسه .!
حاولت أرمس حد .. بس منو ؟! ..
أنا مره يبت طاري يدي عند عمي بوعسيى ( أصغر واحد ) .. كنت أقرا أشعاره لأنه عمي العود محتفظ فيهم لين الحينه..
وانهار من الصياح .. ويدوه أكيد لا .. ولاحد من أعمامي أقدر أقوله هالشيء .. ولا امي ولا أبوي !
بالنسبه لهم هالموضوع خط احمر .. أنا أكبر بنيه في العايله ..
ومن عقبي إختي .. وبنات أعمامي صغاريه .. فدوم أيلس ويا عموه ..
بس أصلا هي من توفى يدي يتها حاله نفسيه .. توفى عقب عرسها بشهر ونص من اييبون طاريه تطيح .!
والله قمت أتحاشى أيلس ويا هلي .. أخاف أتعلق في حد مثل ما تعلقت في يدي .. ويصير شيء !
أعمامي شباب وابويه بجر العايله .. وعاد أنا لازم من يتيمعون كل إسبوع أيلس في ميلس الرياييل عسب أرتبش وياهم !
قمت الميلس ما أشبر صوبه مول ..!
وعاد زادني الزايد يوم مرضت يدوه ( أم أمي ) من أشوفها تعبانه أظهر من غرفتها !
حتى أمايه مستغربه .. مع إني وايد وياها لأنه يدوه فديت روحها تحب أكبر بنيه من بناتها .. وأنا أكبر بنيه من أمايه !
وعمي أقرب واحد لي ودوم وياه سوالف حتى أسراري كلها عنده ..
من شهرين صار أبو .. وفي عقيقة بنته قالي : فلانه أنا مستغرب منج !
قتله ليش شو صاير .. قالي ما شيء انسي السالفه ..
وعقب لانسير بيتنا .. قالت عمو .. ترا عمج قالي إنج وايد متغيره حتى في بنته ماباركتيله عدل !
راح عن بالي ..تخيلوا هالشيء الكبير بالنسبه للعايله وله .. وراح عن بالي !!!
أهم شيء عندي صار إنه أعزل نفسي ..
ومتعوده يوم نبات في بيت يدي كل إسبوع طبعا.. أرقد في غرفة عموه ..
وهي كانت غرفة يدي قبل .. مكتبته هناك فدوم ييلس فيها ..
ويوم اتيي من العين وتبات ويانا .. معروف إنه بتم وياها 24 ساعه .. وبرقد معاها هي وعيالها ..
ومره وقفت ع المكان إلي كان يفرش فيه سيادته يوم يصلي .. والله عيني ادمعت ..
وظهرت بسرعه لاتشوفيني عموه وتستغرب .. قمت أرقد في قسمنا والكل مستغرب !!
وآخر عيد .. يالسه رووحي .. ولا كأنه عيد .. وبالزور لبست وكشخت عقب هزاب ومضارب !!
وأحس فيني صرخه هب طبيعيه !!
والله مب عارفه ليش عقب هالسنين .. وماصار لي شيء الحمد لله عسب أذكره ..
وبنات خالاتي وبنات خالي دوم ولله الحمد متواصله وياهم .. يعني ما أحس بالوحده !
ومن حلمته من 3 شهور تقريباً صار فيني هالشيء ..
والكل ملاحظ التغيير .. حتى ربيعاتي في الكليه .. قمت أيلس في البريكات بروحي ..
كل شيء أسويه بروحي ..
ما أريد أتعلق في حد وأخسره .. الله لايقول !
مرات أستانس وأضحك .. ومن ايي وقت الرقاد جنه حد يارني للحرب !!
قمت أخاف أحلم فيه مره ثانيه ..
والله شيء غريب غريب غريب .. قمت أخلي علاقاتي رسميه ..
هواياتي كلها ما قمت امارسها .. مع إنه أعشقهم كلهم !!
استويت أكره السيره لبيت يدي .. مع إنه هالشيء فرض كل نهاية إسبوع .!
من أدشه أذكر يدي .. =( .. الحمد لله الحمد لله الحمد لله ..
ما اعرف شو كتبت .. بس المهم إنه فضفضت .!
هالمكان الوحيد إلي أحس فيه بالأمان من ذكر هالموضوع لأنه محد يعرف يدي .. ومابعفس مود حد !
وآسفه جان غثيت حد بهالطاري .=(
يالله يارب ارحم قلباً ضعيفاً لايقوى على النبض بدونك ..
الله يرحمه ويرزقه فسيح جناته .. ويرحم جميع أموات المسلمين ..
والله ما اعرف شو اقولج بس لازم اتشلين من راسج فكرة
ان تتعلقين بشخص ويموت
ترى هاذي اعمار ومكتوبه عند ارحم الراحمين
الله يوفقج ويبعد عنج كل شر غلايه ,
ماعرف هالاحساس .. ما قد توفى حد قريب مني
يقولون يدتيه كانت قريبه مني بس توفت وانا صغيره .. ويدي ما شفته .. ويدي الثاني ما عرفته زين كنت صغيره يوم توفى
وريل يدتيه توفى قريب ويمكن هو اكثر واحد عرفته مع هذا ما احس هالشي اثر فيني وايد .. الله يرحمهم اجمعين
بس احس لو حد من العايله صارله شي, حد اعرفه وتعايشت معاه فتره .. يمكن تصيرلي نفس حالتج واكثر
بس حاولي تقوين نفسج, خمس سنين الريدي طافت .. وادعيله
يمكن يوم مات كنتي تمرين بمرحلة صدمة و الحين بديتي تستوعبين و تحزنيين
صدقني عقب بيخف اللي فيج وبتنسين
انتي تقولين ما اباا اتعلق فالناس عشان ما تفقدينهم، بس تخيلي فقدتيهم ما بتتحسرين على الوقت اللي ما قضيتيه وياهم!
مافي حد يروح عنه قريب الا وهو يتحسر على الاوقات اللي زعلتي هالشخص فيه او ابتعدتي عنه
حتى هواياتج ابتعدتي عنها و ابتعدتي عن كل شي يفرحج في هالدنيا لأنج في يوم بتتركينها مثلاً!!
هالشي مب منطقي، حبيبتي عيشي حياتج بما يرضي الله و صح طبيعي تحزنين على وفاة يدج بس مب معناته حياتج توقف عند هالنقطة
نحن امة محمد اعمارنا بين الستين و السبعين و على ما اعتقد انتي قلتي انه مات عقب ما رد من صلاة العصر ، اعرفي ان الله يوفى الانسان في احسن وقت و هي كان راد من الصلاة فأستبشري خير ان يدج في مكان زين و مرتاح
صح نحن اهل و احباب فالدنيا بس نحن مسلمين حتى لو حد مات فينا و سبقنا بنتلاقى وياه في جنة الخلد بأذن الله
يعني مب معناته ما بتشوف يدج مرة ثانية لا بتشوفينه بس ان شاء الله عقب
اممم حبوبه الاشخاص في الحلم
بالذات المتوفين لو قالوا شي او
حتى ابتسامه ترى هذا اسمه تلاقي ارواح
يعني روح الحي والميت يتلاقون احيانا
في المنام ..، مابا ازيغج بس الموضوع
انا اشوفه من شي حلو تخيلي اختي يدج الله
يرحمه ممكن كان مشتاق لج مثل ما انتي متوله
عليه ..، نصيحه اقرى قرآن واختمي له
ترى كل او اي عمل ممكن نسويه في نيه يكون
للمتوفين يوصلهم لو قرينا قرآن او صلينا او استغفرنا
لهم او تصدقنا عنهم…،
فضفضج ذكرتني بيدتي الله يرحمهآ
تآريخ 27 بتكمل سنه ~
الله يرحمهآ يآرب ، الكل كآن يحبهآ ، وكآنت تتخبر عن العربَ ومآتنسى حدَ
مآيآ في بآلي انها بتروح عنآ يوم من الأيآم ، ومآ توقعت أني بفتقدهآ هالكثر
أحس نفسي في حلمَ ، يوم اتذكرهآ تخنقني العبرهَ ،
ويضيق صدري وعآد لوحلمتهآ أنش أقول بعدهآ حيـه ، وأنصدم أني أرد للوآقع الأليم !!
الله يرحمهم كلهم ـ ويكونون من أهلـه الجنـه
حطي في بآلج أنج يوم من الأيآم بتلتقين ويآهمً ^^
وإن شآءالله نلتقي ويآهم في الجنـه ،
وكل نفس ذآئقه الموتَ
لا تغيرين حيآتج ردي مثل مآكنتي ، ترآ هالشي الي تسوينه يأثر على الي يحبونجَ
وهم يبونج مثل مآكنتي ، وكل النآسً بتموتَ ، دآمج انتي العودهَ غيري جوهم وردي مثل مآكنتي
وحآولي تبينين العكسسً لأنه هذآ الإنسآن الي بحب كل النآسَ ، لا تبينين انج حبيتي شخصً وآحد
وهالشخص هوه سبب تغيرج من مآت َ
إن شآءالله اتكونين مرتآحـه عقب هالفضفضه ،
ربي يوفقج ويرزقج بالزوج الصآلحَ مثل يدج ^^
الله يرحمـه
كنت هنآ 