خواتي ..عزيزاتي.. حبيتكم تساعدوني في مشكلتي ويا أهلي..
أنا خريجه من سنه تقريبا.. للحين ما حصلت وظيفه و جربت حظي في كل مكان و سويت كم مقابله و تريييت واااايد لين يزقروني وجيه " محد سوالي سالفه" و أفكر أرجع أدرس أحسن خاصه في هالوقت " وقت الأزمه الماليه" أو أبني لي مشروعي الخاص و أربح من وراه " ماشي غير هالحل"
أهلي سلمكم الله محصليلي وظيفه قرييييبه وايد على بيتنا " ما يبوني أسير بعيد" براتب مقبول وكل شي.. لكن المشكله ان هالمكان مختلط و ثاني شي هالدوام شفتات " وين أتحمل أنا الضغط و التعب !!"
حاولت أتفاهم وياهم اني أنا ما أتحمل أشتغل ويا " الرجال" لأني أعرف و شايفه أشيا جدامي مرت عليي و أنا أبا أصون نفسي " الحمدلله أعرف قدر نفسي اني ما أحب السوالف الماصخه وياهم و محترمه نفسي" ما أبا ألتفت لهالأشيا " ما أبا حد يجرني" أبا أكون في حالي..
حصلت وظيفه و بالوااااسطه في دائرة حكوميه بعد و براتب ممتاز لكن في إماره ثانيه و براتب جيد ومكان كله بنات " هاذا الي أنا أبغيه" عشان أكون مرتاحه نفسيا " قالولي أهلي عشان المواصلات و عشان و عشان" و ردو يفتحون لي سيرة ان أداوم هاذيك الوظيفه الي فيها شفتات " و صكت الضرابه"
حاليا أفكر اني أقدم أوراقي على وزارة التربيه و التعليم على وظيفة "إداريه" يكون أفضل لأني أحب شغل المدرسه والإداره و تخصصي يصلحلهم بعد.. أكيد بكون مرتاحه ويا الطالبات و يا الإداريات و المدرسات لأن كلهم " إناث" و أنا هاذا الي أبغيه المهم ما أحتك في شي اسمه " رياااال"
أحينه أهلي رافضين و بالأخص "أمي" تقولي شغل المدرسه تعب
في ذمتكم.. تعب و دوام من السبت للخميس من الساعه 8 لين 2 و نص في المدرسه ولا دوام شفتات ما أعرف ليلي من نهاري ؟؟؟؟
أنا ما أقول اني رافضه اني أشتغل موليييه.. بس أنا في أشيا مضايقتني.. و أحينه بعددلكم النقاط.. هاذا الي استخلصته من خلال تجاربي و أنا السيره الذاتيه ما شاء الله عندي متروسه كلها EXPERIENCE
أنا جربت الشغل في المكان المختلط و ما عيبني لأني حسيت ان في كراهيه " ايي واحد يتعنتر على وحده ما يطيع يدربها أو يغثها أو شي" جد صارت وياي و ما أنسى الصراحه.. شفت الدنيا فاااالتوووه ما عيبني الوضع و أنا ما أبا أخترب أو أعرض نفسي للشبهه " الناس زاهبه حق الرمسه بس" و أنا وحده ما أحب أييب الكلام لنفسي
أذكر أيامها كل يوم أحط ايدي على قلبي و أقول متى بيعدي هاليوم و بيخلص " يالله برحمتك أبا أفتك منهم"
قولولي.. شورو عليي شوفولي صرفه ويا أهلي.. ساعدوني
حبيت اضيف يا اختى ليش اهلج مصرين على الوضيفه الى حذالكم لانها بتكونين عدال عيونهم يعنى ما يخافون عليج بس الى في اماره ثانيه بتكون بعيده عنهم شوى يعنى بيضلوا يحاتوج يوميا فراعى بعد وجهت نطرهم يا اختى والهدوء ممكن انه يهدى السالفه كلها
المشاركة الأصلية كتبت بواسطة مرته وحبيبته 
جاري الإقناع يختي..أحاول..ألحين تقولي نحنا بنطرق جميع الأبواب
المشاركة الأصلية كتبت بواسطة كلى دلال حبيت اضيف يا اختى ليش اهلج مصرين على الوضيفه الى حذالكم لانها بتكونين عدال عيونهم يعنى ما يخافون عليج بس الى في اماره ثانيه بتكون بعيده عنهم شوى يعنى بيضلوا يحاتوج يوميا فراعى بعد وجهت نطرهم يا اختى والهدوء ممكن انه يهدى السالفه كلها
أنا خايفه على نفسي أكثر من ما هم يخافون عليي.. الحمدلله أنا في غنى عن الوظيفه ,, ومتأكد بحصل أحسن عنها..
أنا عادي عندي لو حصلت وظيفه فيها ضغط شي و وقت أقصر.. بس مب شفتات
ما عليه حبوبه.. لا تأسين..
" من ترك شيئا" لله عوضه خير منه"
وإن شاء الله بتتوفقين في الوظيفه اللي تفعج دنيا ودين
بارك الله فيج