المشاركة الأصلية كتبت بواسطة طيف السعوديه 
^الدماني^ انتي بكل مكان لك موطئ قدم ..
وعقبال ما تطئ قدماك سطح القمر .. ههههههههههه
ربي يوفقك ويسعدك دنيا وأخره
دائما اقرأ تقاريرك بهدوء واسوي لها قص لزق بجهازي ههههههه
من مذكرات ^الدماني^
بعد ما ودّعنا يوروديزني ..
توجهنا لمحطة القطارات GARE DE LYON
في باريس …
وركبنا وابور الساعة اتناشر ،
يا مقبـّـل ع الصعيد،
"بعلولي" قلبه مايل وأنت قلبك حديد 
(مع الاعتذار لعفاف راضي )
أوبس سوري ! رونغ نمبر ! قصدي مقبـّـل ع جنيف
وحالما وصلنا تم الترحيب بـ ^الدماني^ عبر مكبرات الصوت (من العين )
وأنا واقفة أتريا بعلولي وقد طال انتظاري ..
كان جو المحطة يذكرني بـقصيدة :
يالله يا قلبي تعبنا من الوقوف
ما بقى بالليل نجمة ولا طيوف
ذبلت أنوار الشوارع
وإنطفى ضيّ الحروف
يالله يا قلبي سرينا
ضاقت الدنيا علينا
القطار وفاتنا
والمسافر راح
كلمات : الأمير بدر بن عبدالمحسن
كان حزتها مباريات كأس العالم …
والكل يشجع اسبانيا حاملة اللقب
اتجهنا لمكتب تأجير السيارات عشان نستلم سيارتنا ..
اتفاجأت ! 
لأن بعلولي قرر يغير سيارتنا المعتادة
"عفـّـاري" …
تحيدونها من تقرير إيفوار ؟
https://forum.uaewomen.net/showthread.php?t=697372
واستبدلها بـ …
قلت له : يا بعلولي خلنا على "عفاري" !
يقول المثل الميكانيكي :
"جديمك نديمك لو يديدك أغناك "
قال لي : هذاك أول !
الحين المثل الجنيفي يقول :
" عليك باليديد واستشرف المستقبل"
وأطلق على اليديدة اسم "الحشيم"
والسبب ؟!! عشانها بنت "انجليز" وقبايل
أثناء القيادة …. بدأت تطلع الفضايح
أولا : نظام النافيجيشن معقـّـد وما يطلع العنوان كامل !!!
ثانيا : النظام يغطي سويسرا بس !
يعني اذا بغينا ندخل فرنسا والا ايطاليا ما نقدر نستخدمه !!!
كل هذا وبعلولي وده يقول :
"يا قلبي يا كتاكت ! ياما انته شايل وساكت"
لكن القشة التي قصمت ظهر البعير هي …..
يوم انتقل من حارة الى حارة بدون ما يعطي اشارة
تشان تصارخ عليه وتقول له بالفم المليان :
RESPECT THE RULES AND THE REGULATIONS OF THE COUNTRY!!
هنيه عاد انفجر وقال لها :
"مب كفاية صابر على علاّتج ! بعد تفاتنين ؟!!!
مالج يلسه عندي !
الحين بتردين !
هنيه عاد كان ودي
تشوفوني وأنا شمتانه فيها 
واحنا في مكتب تأجير السيارات خذت لي لفة في كراجهم تشان أشوف ……
^
^
^
^
^
^
^
بالله عليكم هذي مغسلة والا عروسة المولد ؟
صدق المثل الميكانيكي اللي يقول :
"لبـّـس البوصة …تبقى مغسلة سيارات "
لو تشوفون اللقاء الملتهب بينها وبين بعلولي
كان لسان حاله يقولها :
بحبك وحشتيني !
بحبك وانتي نور عيني !
ده وانتي مطلـّـعة عيني
بحبك موت !
وطلعت "عفاري" هوب بسيطة !!
كان لسان حالها يقول له :
انته معاي ؟
والا انته ناوي تبتعد عن خط سيري ؟
انته هواي ؟
والا عندك بالهوا محبوب غيري ؟
كلمات : الشاعر خالد ناصر
وتصافت النفوس واتجهنا نحو فندق
Mandarin Oriental Geneva
الفندق تابع لسلسة فنادق مندارين أوريانتال الشرق آسيوية
وهذا شكله من الخارج (صورة من النت)
هذا اللوبي الصغير
وجلسة اللوبي
زاوية ثانية
وللناس اللي يحبون الـ out doors في يلسات طاله على الشارع
من داخل الفندق وخارجه مثل ما هو واضح من الصورة
والـ BUSINESS CENTER
وأثناء الـ check-in قدموا لي عصير برتقال أحمر ! امممممممم لذيذ !
واحنا ماشين في الممر المؤدي لغرفنا لفتت انتباهي
المباني الخضراء اللي مسوينها فوق الطابق الأول عشان الفيو 
لكن الصراحة ما رمت أقاوم اني أصور حبل الغسيل اللي على البناية المجابلة
الغرف صغيرة نوعا ما لكنها وايد راقية ،
واللي عجبني فيها : ان المصمم استغل كل زاوية في الحجرة للتخزين بسبب صغر المساحة
مثل المدخل ..
السرير … (ولو تلاحظون استخدام المنظرة وراه عشان تزيد مساحة الحجرة)
الركن الهادئ البعيد خخخخخ اللي أيلس عليه ….
….. وأشاهد التلفاز
أما الشي العجيب اللي استوى ولا في الأحلام
اني أول ما فتحت التلفزيون للمرة الأولى طلع لي ….
^
^
^
^
^
^
^
^
^
^
^
^
فيلم كابي كابي الهندي اللي كنا نشوفه في طفولتنا في بمبي
على رأي المثل الجنيفي-الهندي :
ربّ صدفة خير من ألف ……. ليلة وليلة
هذا المكتب اللي شهد كتاباتي (وايد مصدقة عمرها )
تعرفون شو أكثر شي حبيته فيه ؟
^
^
^
^
^
^
المكان المخصص للقوابس الكهربائية (شو رايكم في قوابس ؟ )
الـ COFFEE MAKER اللي من سرنا لين يينا ما دقيناها من كثر ما نحوط
والجماعة معذبين عمارهم وعلى قولتهم حاطين لنا أفخر أنواع القهوة
أما الحمام فـ …..
….. الكرامة ليكو …
^
^
^
^
^
^
^
^
والممزر ليّـــه
فقد كان فخما …
وأشبه ما يكون …
بـــ SPA
أوكي الحين خلونا نطلع من الفندق …
ونقطع الشارع مشيا …
وعلى بعد أمتار بسيطة يوجد المركز التجاري لجنيف
أحرص كل مرة اني أمر على فرع لادوريه الشهير
(على فكرة لادوريه له فرع الحين في دبي مول)
عشان أشتري ألذ مكرون
طبعا النكهة المفضلة عندي هي الفستق والفراوله
لكني ضحكت يوم لقيت نكهة العرق السوس
تحيدون لبان القطوة السودا مال الطفولة اللي مصنوع منها في تقريري
"حتى الانجليز يحبون راعي الدكان "
https://www.forum.uaewomen.net/showthread.php?t=788052
وفي نص السوق توجد ساحة المطاعم اللي فيها خيارات متعددة من الأكل
أحلى ما في السالفة …بعد ما تخلصين الأكل .. يحل العصفور ياكل البقايا
…. تليه الحمامة (ما حدش يعني جاب سيرة انفلونزا الطيور ولا دياوله )
لكن أحلى ما عيبني في الساحة : شيء غير متوقع !
^
^
^
^
^
^
^
^
^
^
^
^
^
^
^
أرضيتها الحجرية مكونة من أحجار عليها كلمات من كل اللغات ومن بينها العربية
مع السلامة والقلب داعي لكم
من الساحة ترومون بسهولة تشوفون نافورة جنيف
ويقدرون اليهال يطعمون البط والوز عندها
وبعد ما فـﭽﭽت راسي من المشاري ردينا الفندق
أصبحنا وأصبح الملك لله …
الحين بننزل نتريق من البوفيه اللي في مطعم Le Sud
وبعد فيه جلسة خارجية
كل صباح …
"ما أحلى الرجوع إليه" على قولة نجاة الصغيرة
اقربوا ! سامحونا إلا الوالم تراه
بقية الرحلة في الصفحة التالية