خواتي والله تعبانه من أقوم من النوم الصبح لين الليل وانا كله جبدي لايعه وفيني دوخه كأني مريضه حتى الاكل ماتهنى فيه والله كله احس نفسي شبعانه واذا تذكرت الاكل تلوع جبدي ..
واذا يعت وخلاص باكل من اول لقمتين او ثلاث ترجع لي اللوعه وحس كأني برجع
… بعض البنات قالولي أكلي بسكوت مالح وبتخف اللوعه . كلت بس ماشي فايده تخف شوي وترجع مثل ماهي
… حتى وقت النوم يوم أطيح على السرير برقد والله اللوعه وياي والله مرات احس اني بصيح من شدة التعب بس امسك روحي لاني مابا أتعب ريلي وياي لانه مايتحمل يوم يشوفني تعبانه وايد يخاف عليه 
…. خواتي دخيلكم اذا فيه شي يخففها ياريت تقولولي عليه غير لحبوب والادويه لان هذا الحمل كنت أنتظره من سنين ومستحيل آخذ اي أدويه ممكن تضر الياهل . ابا شي طبيعي بليـــــــــــــــــــــــــــــــــززز حبيباتي
يقووولون كلي خبزه ناشفه ع الريق
بتخفف لج شوي اللوعه
سيري عند الدكتوره وبتووصلفلج حبووب للوعه بس عادي ما تضر .. كنت اخذ منها انا
الله يعينج
قبل كنتي تاكلين 3 وجبات يوميا الحين قسميها لين 6 وجبات يوميا صغيره عشان ما ترجعين وحتي لو تم الاكل في بطنج علي الاقل ربع ساعه المعده تمتص فيتامينات ومعادن من الاكل حتي لو بنسبه بسيطه
ولما تنامين نامي علي مخده مرتفعه شوي عشان ما تيجي الوعه بزياده
واذا ما نفع معاج هذا كله جربي حبوب حق اللوعه تباع فيي الصيدليه مب مضره وتنفع حق اول ثلاث شهور من الحمل
انا في فترة حملي كنت كله ارجع من شهري الاول لين الاخير
وحتى وانا اولد كنت ارجع شفت الموت بس كل شي يهون عشان كتكوتي ربي يحفظه
انا كنت اكل نعناع مادري بس حسيته يريحني من اللوعه شوي …
الله يريح سرج ويرزقج الذريه الصالحه …
~ادعيلي اييب ولد~