مدرسة أحياء أو علوم تبحث عن وظيفه ساعدوها و لكم الاجر 2024.

السلام عليكم و رحمة الله ..

شحالكم ؟؟

انا درست في مدرسة من مدارس دبي .. من الروضة .. لين ما تخرجت هاي السنة ..

و على حظي .. قالوا خلاص المدرسة بيهدمونها ( الحمدلله اني خلصت ) المهم هذا القرار يا مفاجئ و على نهاية السنه ..

اولياء الامور تبهدلوا .. يدورون لعيالهم مدارس ..

و المدرسين و المدرسات بعد تبهدلوا حليلهم .. رزقهم انقطع مرة وحده بدون سابق انذار ..

واحد من المدرسين .. يعرف ريال فاتح مدرسة يديدة .. فشجع الطلاب يكملون فهاي المدرسة و الطاقم التدريسي بعد .. يعني اغلبهم بيكونون متواجدين في المدرسة اليديدة ..

الا مدرسة الاحيا .. حليلها والله ..

مادري شو استوا .. اظني عندهم مدرسة احيا و قالولها ما نباج ..

غمضتني الصراحة .. واااايد .. خاصة يوم قالت ..(( ما لقيت شغل .. الحينه ارجع العراق صعبة ما عرف شو اسوي ))

هي مدرسة عراقية .. و شرحها ما عليه كلام .. درستني سنتين ثاني و ثالث علمي و الحمدلله دوم 100 من 100 فالامتحانات و درست خواتي الاربعه بعد .. و تدرس المنهج الاجنبي بعد ..

حتى احس انها المفروض ما تكون مدرسة على هاي المعلومات اللي عندها ما شاء الله .. منهجنا بالعربي .. بس كانت اتيبلنا وايد مصطلحات موجودة عندنا بالعربي و بالانجليزي ..

بليز اللي تقدر تساعد هاي المدرسة او تحصل لها شغل في دبي او الشاجة او عيمان تراسلني .. و لها الاجر ان شاء الله ..

؟؟؟؟؟

الله يعينها ويرزقها من حلاله

بس ما يستوي جذي …. حرااام … لازم ما يهدون المدرسة الا بعد ما يوفرون مدرسة ثانية أو يوزعون الطلاب وطاقم التدريس على مدارس ثانية

لا حول ولا قوة الا بالله

انا مدرسة وحاسة فيها …. غصة

انشالله غيري بيقدر يساعدها لان مو بيدي شي للأسف

هيه والله ..

الله يسمع منج اختي ..

اشكرج ع المشاركة الحلوة ^^

والله كان على عيني بس ما باليد حيله الحال من بعضه.
بس عفواً اختي هذه المسألة بيدين وزارة التربية والتعليم هي اللي توفر لها المكان المناسب ، حتى لو كانت المعلمة تدرس في مدرسة خاصة ، لأن المدارس الخاصة لا بد انها تتسجل في وزارة التربية والتعليم فبالتالي المعلم لا بد انه تكو ن بياناته موجودة في الوزارة ولها الحق انه يشوفو لها المدرسة المناسبة دام عقدها في الدولة ما انتهى …. والله العالم
والسموحة على الإطالة

غناتي لو مدرسة 3 سنين أو أكثر في مدرسة خاصه .. تروم تقدم اوراقها للتربية عسب تشتغل في المدارس الحكومية
او لو تريد تقدم اوراقها لمدرسة خاصه و المدارس الخاصة ما شاء الله وايد و ما تقول لا

ماعرف والله ..

لان اعتقد المدارس الحكومية ما تعين العراقيات ..

اشكركن ع المرور ^^