معظم الطلاق من مستصغر الأسباب . تعالوا يا متزوجات استفيدو 2024.

البداية كانت من أخت عزيزة اسمها ( نفيشة ) بمنتدى كويتي .. والاضافات من عندي أنا محدثتكم العذوب .. وأتمنى إنكم يا بنات تضيفون عليه اللي عندكم ..

حياكم الله يامعشر المتزوجات
والغير متزوجات هم حياهم الله لا مانع من تواجدهم بهالمنطقة المنزوعة السلاح
ويريت الكل يستفيد من الموضوع

هذي أخطاء اتطيح فيها حريم وايد بطيب نية .. وتراكمها ممكن يدمر البيوت السعيدة والا انتو ناسين إن معظم النار من مستصغر الشرار .. وسلامتكم .. …

هذا كلام نفيشة الحبوبة ..

حبايبي لاحظت شغلات وايدة تحصل مع حريم وايد واكيد بعد مع رياييل وايد
اقصد تصرفات لا شعورية تطلع منهم بدون لا يحسون فيها
لكن اكيد تضايق اللي يقعد معاهم

فما بالكم اذا الوحدة متزوجة ؟؟؟
في رياييل ينطرون الزلة على المرة ترى انتبهوا
وهم في رياييل يكشون من حريمهم لاسباب مثل هذي
يمكن تشوفونها اشياء صغيرة لكن تاثيرها كبير
والنفس تكع ساعات

راح احاول الخص لكم بعض هالامور ويريت كل وحده تنتبه لنفسها لان هالالمور صعب احد يقولها لج وممكن الناس تسكت حفاظا على مشاعرج لكن الشي يستمر وبالتالي ياثر على علاقتج بالناس بصورة كبيرة

ملاحظاتي:
= لاحظت وايد حريم لي يات تسلم تنفخ بويهج والنفس كله يصير بويهج بشكل مزعج .. ويزيد الطين بله اذا هذاك اليوم كانت ماكله ثوم ولا بصل ولا مو منظفة اسنانها .. طبعا هذي حركة غير مقصودة لكن تضايق ويمكن تتحاشينها المرة الياية بسبب هالشي فما بالكم بريلها شنو بيسوي؟؟
(( الحل )):
اول شي تنظيف الاسنان قبل اي مشوار او بعد الاكل مباشرة
لا تاكلون ثوم او بصل او بقل او اشياء ريحتها نفاثة باي حزة خاصة اذا الزوج متواجد او بتروحين حق ناس
بعدين وقت السلام المفروض الوحده تكتم نفسها ثواني بس علشان ماتضايق اللي قاعدة تسلم عليه وتتجنب فتح الفم والوجه قريب من الشخص اللي قاعده تسلمين عليه

= لاحظت ان في ناس لما تاكل تطلع صوت مزعج بالاكل او تمضغ بشكل عنيف والخشم حتى يفترش واصوات بايخة وخاصة وقت الشرب او البلع وممكن تتريع بعد ولا يصير فيها بوفهاق ولا هامها عادي لدرجة ان تنسد نفسي كانها بمعركة او تتكلم وتاكل والحلج مشرع يا حافظ
(( الحل )):
مراعاة وجود ناس بالمكان ..>>بعد اذا بروحها بتاكل كيفها خل تفترس محنا قايلين شي بس جدام العالم لا المفروض الاكل يكون ببطء شوي وهدوء والاكل ينمضغ عدل تجنبا للبوفهاق وعلى قولة المصريين (الزغوطة) واذا صارت على طول تحاول تاخذ نفس عميق حييييييييل وتشرب ماي عقب ويغدي شرها واذا مضطرة تتريع(لاعت جبدكم ولا اكمل؟؟) تحط ايدها على حلجها وتكتمها شوي مو باعلى حسها عااااااااااااااع …>>>وووووووويع
ادري انارفتوا بس شسوي موضوع ملح

= لاحظت حريم يكون جسمها يفرز عرق وايد حتى لو اهي نظيفة بس الجسم طبيعته يعرق او في احتمال انها مهملة وماتنتبه للريحة وتكون الريحة نفااااااااذة وتقتل ..>>تخيلوا ريلها شنو شعوره؟؟ اكيد بيتضايق ويتجنبها
(( الحل )):
اذا كان السبب اهمال من المرة شقول وشحجي؟؟ تسبحي ترى النظافة حلوة
والملابس غيريها على طووووول مو متحسفة لا تكوينها مرة ثانية وحيل حيل اليوم وباجي واسبوع واسبوعين ولي متى عاد؟؟
الريحة تصير مركزة شنو مافي قلبج رحمة؟؟ الناس بتعيش
تسبحي واستخدمي هالشورجيلات ترس الجمعيات وتنشفي عدل وتالي لبسي ملابسج وحطي ديودرانت المضغوط مو السائل خرطي وبخري ملابسج ولبسيهم تحسين روحج فريش عن العيز عاد؟؟ واي اكو ناس يعرفون روحهم بالمنتدى هني لي سلمت عليهم ما شاء الله ودي قبل لا توخر اخذ ملفعها واحطه على ويهي من الدخون والريحة السنعة..>>عرفتي روحج ولا بعد؟؟
واللي جسمها يفرز تاخذ من الجمعية كريم صغير لمنطقة الابط لونه ابيض وفيه اخضر عجيب يقطع الريحة كلش عقب السبوح تنشفي وحطي منه نتفة شحلاته يقطع الريحة ولبسي تحت اي بدلة بدي نص جم مو حفر ديروا بالكم وخامته تكون قطن يمص العرق لكن الحفر يخلي مجال لاحتكاك الجلد والعرق يسيل ..>>وعوووووووووووووووووو
وبالعروس بسكم رقص اللي تعرف روحها تعرق لا تكثر خلاص مرة مرتين وقعدي ترى الريحة تنتشر وماتسوى تعليقات الحريم وحسافة ماخليتي كشخة للريل الميك اب ساح والريحة تقطع ولا خلي بالجنطة مناديل رطبة وتمششي على طول
وماتشوفون شر

= لاحظت ناس وايدة تسترسل بالكلام اللي تصك راسج ولا تلاحظ ان الموضوع مو شي وتكمل وانتي تطالعين الارض وتتلفتين وتحاولين تجاملين ولا مفر من السالفة واخرتها صداع نصفي وبندول نايت وعسى الله يرحمنا برحمته او انها تتفل مع الكلام وسوري على التعبير مافي كلمة ارق من هذي وممكن تلولح بايدها بعد ولا توقف تسوي حركات ولي تكلمتي طقت الرصيف وجعمتج وقطعت سالفتج بشي سخيف
(( الحل )):
بالعدال .. هذا الحل .. شوي شوي .. تكلمي بهدوء وشوي شوي وجسي نبض اللي جدامج اذا مستمتع بالسالفة ولا منغث واذا اوكي كملي بس اذا طاقة جبده سكتي ولا غيري الموضوع وعيب المقاطع وتحرك الايد بشكل عنيف بس ساعات الواحد يحرك ايده بشكل رقيق ترى وحلو مو كل الحركات بايخة وتركي مجال للمشاركة بالحديث مو لازم انتي بس اللي تتكلمين

= لاحظت ناس ماتلبس اللي يناسبها وتترك انطباع جيب عن روحها بدون قصد وتلاقونها بنية حلال بس خانها التعبير باللبس وخارته خور والناس علبالهم انها من هالاشكال التعبانة ويحشون فيها ويشوهون سمعتها بعد واهي ولا حاسة يكون كاشخة حد الدوسة
(( الحل )):
مو كلشي موضة تلبسونه ولا كل لون يلوق على كل وحده لبسي اللي يناسبج ويناسب لونج وسنج بعد ترى السن له احكام وقياسج بعد وحلاته الشي راهي يبين الخام والموديل مو حلو التقصمل والترصص الزايد جنج متسلفة البدلة

= لاحظت ناس شعورهم جنها عشيش والمشط ما يمشي فيه ايام وليالي وصدقوني المرة مو حاسة بشي ولا الرس كله شيب ولا مفلفل ولا جنه عصعص فار ولا كله نفس التسريحة ومرفوع ولاتدرين شنو قصته ولا متروس قشرة ولا مدهن علبو لاهية باليهال والبيت وتعبانه عقب الدوام
(( الحل )):
مو شرط تروحين الصالون كل يوم ترى مدام الشعر نظيف وممشوط ومرتب وياكثر الباندات الحلوة والفركيتات الناعمة ولا الكليبات وهم سشوار سيراميكا شزينه للي تحب والصالونات تصبغ ولا حتى بالبيت سهل الموضوع و الشيرة وجهاز الشمع والمكاين انواع يعني الحياة تسهلت مو مثل قبل وعليه على حريم قبل وهم السبوح كل يوم وبخروا شعوركم وهالمخمريات الحلوة وقولوا نفشفش ما قالت لا تتركون مجال للرياييل يمسكون عليكم ممسك خلكم كول على طول افا عليكم

= لاحظت وايد حريم بغض النظر متينة ولاضعيفة لي قعدت على القنفة ولا الكرسي باي مكان افرشت ولا ساحت على القنفة مع السوالف ولا الرقبة مفروشة والحنج الثاني ارتز
(( الحل )):
سمتي عمرج ورزي رقيبتج وفرديها خلي قعدتج ملكية واذا تحتاجين كوشية لا تستحين طلبي ولا هالفرشة وشفطي بطنج مو تاخذين راحتج جدام الريال واخزيتااااااااااااه

= لاحظت حريم لي ضحكت تبين لثتها كلها وتكركر وشكلها موشي ولا حاسة الضروس كلهم بالسكة واللثة واذا ماكلة تبولة علوم بعد
(( الحل )):
خلج انثى ضحكي بالعدال شوي شوي ولا حطي ايدج على حلجج اذا ماتقدرين تسوين كونترول ترى مو شي كلش خلج تكانة وثقلي

هذي إضافتي ..

سبحان الله مافيه وحدة من هالنوعيات عندها صفة بس ,, لا كل وحدة مسوتنها هواية مجمعة 3 أو 4 صفات شينة اللهم يا كافي

بخبرج عن شيء يمكن نسيتيه ..

فيه بنات لا قعدت في السيارة عقت النعال أو الجوتي وإنتي بكرامة .. والريحة انننننننننننف !!! ويع ..

أونها بتريح ريولها من الجوتي .. زين منو يريح المسكين من ريحة الدلاغ ؟؟؟

فيه اللي تقعد وايدها على أي حبة طالعة لها ف الويه وهااات يا تعصيييييييير

شيء مقزز !!

فيه اللي تحك رااااسها كل شوي .. يا اختي إذا فيج قشرة اسعملي شامبو وإذا شعرج دهني اغسلي وعالجيه ..

فيه اللي تاخذ راحتها وتنسى صبعها بخشمها وييييييييييييييع .. فيه اختراع اسمه كلينكس

وفيه اللي إذا مزجمة تسمع الفريج كله إنها مزجمة وهي تتمخــ!!!!!!!

بالعدال كل الناس تزجم بس راعي المشاعر .. سيري الحمام واغسلي كل 10 دقايق ما يخالف .. واتعالجي أهم شيء واتدفي ..

واللي مع الوقت ما تحف ويههااا .. الحين الحواجب بنقول حرام وما يخالف ,, والشنب شو تصريفه ؟؟؟

تمشي الوحدة عدال الريال والشنب طاااق عرض ما تعرفينها هو زوجته والا أخوه !!

الله يخلي الخيط .. ومافيه أسهل من إن الوحدة تنظف لعمرها أو اشتري مقص الحف بالفتلة أو الصالون .. أو أضعف الايمان حلاوة .. وانهي الموضوع

الغريب إن فيه وحدة من هذيل عندها ما يلي :
شنب
ريحة حلج + ريحة جسم
مضغ عنيف
افتراس للطعاااام ووزنها واصل ألف
عدم اهتمام بكوي الملابس