عندي مشكله وهي إن إلتزاماتي المادية ما تسمح لي أشتري شنطة ماركة ، أنا موظفة بس أوفر فلوس عشان أكمل دراستي العليا يعني ما يتم لي شي نهائيا بفصل عبايات بدفع فواتيري بساعد أهلي،، المشكله إن هالمسأله بدت تأثر عليه، قمت ألاحظ المجتمع اللي حوالي واللي أنا أعيش فيه أول ما تي عينهم تي على الشنطة اللي شالتنها، يعني لو شاله شنطة عادية بتشوفين نظرات الإحتقار كأني أنا من كوكب ثاني أو أنا ما يناسبني أيلس وياهم، سواء فالدوام ولا في أي عزيمه، صرت أستحي والله إني أحضر لو إنعزمت، ماعرف شو أسوي هل المشكله فيني أنا ولا في الناس ؟ ليش إستتووا الحريم جذي؟ قسما بالله قمت أستحي بنات أختي فالإعدادي والثانوي يشلون ويوم يشوفوني يعايروني، تخيلوا لاني درجة وصلت، يوم اشوف بنات شالينها ، أقول ماشاءالله متى أنا بقدر فيوم من الأيام أخذلي لو وحدة بس، والله يا بنات ما تتخيلون قمت أنعزم وأعتذر أو ماسير بسبة هالموضوع، مابغي حد ينظر لي إني أقل منهم، أنا جامعية وحللوة الحمدالله، يوم بتطالعني وحده جاهله أو مب متعلمه بنظرة بايخة بس لأني مب شاله شي ماركة، مرة كنت فعزيمة ولاحظت على طوول الناس عينهم على شنطتي، إستحيت وايد، أنا من النوع آخذ من المحلات العادية اللي فالمولات أمثال ألدو وناين وست مثلا هاي قدرتي، ماعرف كيف أحل هالموضوع، وايد مضغوطة ماديا وأختي يوم أكلمها تقولي إنتي إنسانه تافهة لانج تفكرين جي، بس يا بنات والله مابالغ أنا متوسطة ماديا بس صديقاتي مستواهم المادي أعلى يعني أباءهم أغنياء ولا أزواجهم أغنياء، يوم نجتمع في مناسبة أحس بالإحراج الفظيع،بنت أختي فجامعة حكومية تقوللي تدرين خالوه نحن فالجامعة اللي ما تشل شنطة ماركة يعني مب راقية وما يلسون وياها البنات، دممعت عيني وايد، هل معنى هذا إن الناس ما بتلفتلي ولا بتفكر تختارني لحد من أولادهم مثلا لاني ما أشل شنطة ماركة؟؟ لا تقولون أبالغ أنا الوسط اللي عايشه فيه مبهدلني حتى أهلي عندهم القدرة مثل بنات أختي وبنات عمي، لكن أنا نفسي عزيزة عمري ما طلبت من حد ولا بطلب، أنا بس أبا أفكر أدور حل لها الموضوع كيف أشتري ومن وين لو مرة وحدة بس أو مرتين خاطري والله ، شوروا عليه، والله قمت أستحي أطلع عزايم بسبب هالمشكله.
انا اربيعاتي كلهم مايشلون شنط ماركات
وعادي احس مافيها شي احب ربعي على طبيعتهم
واخلاقهم اهم شي
اذا شليتي ماركه استغفر الله يعني بتحصلين حسنه من ربج
ماعليج من الناس وكلام الناس مايخلص
انتي بنت محترمه واهم شي انتي ونفسج وانتي راظيه عن عمرج
قولي الحمدالله وفيوم من الايام بتشلين احسن الشنط
المهم انك انسان ماشاء الله عليك خلوقة ومتعلمة وحلوة
واللبس المهم محتشم ومرتب والشنطة مب ضروري ماركة في شنط عادية احسن من الماركة
وانت انسانه عصامية قاعدة تشتغلين وتساعدين اهلك وتريدين تكملي جامعة مااشاء الله
يعني عندك هدف سامي مو قاعدة تعقين 1000 درهم على شنطة ماتسوى 100 درهم
وهذا كلام صحيح اغلب شنط الماركات صدق ماتسوى 100 في شنط اقل من هذا السعر
مميزة وحلوة وحتى العبايات
والعبايات قصتها قصه اغلب المحلات تغلي عشان شي واحد يدفع المواطن وبس
لدرج اني اعرف وافدين مايبيعلهم العباية قدام المواطن عشان بعدين يغلي على المواطن
يعني يبعها للواحد ب 350 وللمواطن 1000 درهم
وواثق الخطى يمشى ملكا
والشنط و اللبس هذا مايستاهل اختي الزعل
الزعل على الايمان و الاخلاق بس
طنشي انت وراكي اشغال
وفي اضافة ثانية في ناس اغنياء كثير
بس مايحرجون الناس ومايعلقون على لبسهم
بالعكس يمكن يشترون اشياء متوسطة في السعر
عشان مايحرجون الناس او يحسوا انهم فوق عن غيرهم
او على الاقل يقدرون امكانيات الناس
واصلا الغنى مايعطي الانسان الحق في التكبر
واذاء مشاعر الناس
اول شي انتي الصح والناس الغلط اللي من كثر ما يفكرون بالمظاااهر ينظرون لج على انج مب كشيييخه..
انا شراتج ما اشتري ماركاات لان ميزانيتي ما تسمح لي ..
بس اخذ الموضوع على انه عااادي .. اهم شي عباتي تكون حلووه (دوم يسألوني من وين) ومرتبه وناعمه ..
نصيحه لا تخلين هالشي يأثر علييج .. يعني اهم شي انج تكشخين فالعباه بحدود طبعا والشنطه تكون حلوه ,,
انا ما يهمني سعرها كثر ما يهمني شكلها اذا حلوه ولا لا ..
خلج واثقه من عمرج .. في وايد بنات ما ياخذون ماركات بس شنطهم وااااايد حلوه احلى عن الماركات بعد ,,
اتمنى ان كلامي مفهوم 
لاني منقهره من هالفئه
صدقيني اللي يفكرون بالمظااهر ناس متخلفه ..
اذا الي حوااليج هذاا تفكيرهم فهااذي مشكلتهم فديتج ^^
والعيب فيهم مب فيج انتي 00ولا تنسين ان الانساان محااسب بكل درهم
يصرفه عند رب العالمين ^^
لا تتحسسين وأكيد فيه حوااليج بناات مثلج ماايهمهن المظااهر ويهتمن بالانساان نفسه
قوي شخصيتج ومب لااازم تقليد عسب يحترمونج 00الانساان يحترم لشخصيته حبوبة
الله ايسر امورج ويسعدج يااارب 0
ولله الحمد والمنة عايشة حياتي واداوم وادرس وانا ما عندي الا وحدة ماركة لاوبعد هدية من اختي
شخصيا مب ناوية حتى افكر بسوالف الماركات حتى لو توفر لي .,. احس اني اعقل من هالشي
بس في حالتج شنسوي ما نقدر نغير المجتمع .,. فخذي لج شنطة تقليد ولا من الكراج سيل .,.
يعني اكشخي فيها قدام ربيعاتج ولو اني ما احب هالمبدا مووول .,.
وسلام الله على زمن قل لي ما ماركة شنطتك , اقل لك من انت !!,.
الله يقسم الارزاق وهو اللي يحط النصيب وهو اللي يحبب الناس فيج
مب الشنطه