مرحبا خواتي .. شحالكن .. صارلي زمان ما دشيت منتدى سيدات الامارات .. لكن اليوم وبعد القهر وبعد الي شفته قلت صراحه ما ارتاح الى يوم اكتب هالموضووع ..
اكيد كلكم تعرفون مستشفى العين ( مستشفى الجيمي ) انا قبل فترة يمكن ثلاث شهور قدمت اوراقي هناك وعطيت اوراقي حج مدير قسم شؤون الموضفين كنت انا واختي .. اختي جامعيه وانا ثانويه عامه .. عطينا اوراقنا وقالنا بصراحه احنا قبل فتره حطينا اعلان في الجريده وقالنا اصبرو ان شاء الله خير .. سرنا البيت وقمت انا واختيه نتصل عليهم .. اقولهم انا ثانويه عامه يقلون لا احنا نبي جامعه .. واختي تتصل تقولهم انا جامعه يقلون احنا نحتاج ثانويه عامه .. قمت انا عصبت منهم وسرتلهم ودخلت عند وااحد ما اعرف شو اقول عنه اسبه ولا اشتمه واخذ سيئات حرام .. قلتله لو سمحت انا مقدمه اوراقي هنيه عندكم قبل فتره قالي انتي شو قتله انا ثانويه عامه .. قالي بطريقه قهرتبي وخلتني اعصب قالي اقولج اختي سيري خلصي دراستج الاول وكملي جامعه وبعدين قدمي اوراقج في مستفشى العين .. عصبت منه وهو اصلا مب صغير يعني يمكن تقريبا فوق سن 40وقتله التحداك انته الي قاعد على المكتب ومسوي عمرك المدير اذا كان عندك شهاده ثانويه .. وكانت قاعده واحده عداله تسوي شغل الكمبيوتر طالعتني وضحكت وسرت عنها ركبت السياره اخوي يقولي شفيج ويهج احمر وعيونج مصفره خبرته السالفه وقالي الحمدلله احنا الشباب يا دفاع يا شرطه ولا حد يذلنا .. طالعته وهزيت راسي وانا مقهوره. انزين هنيه وخلصنا هالسالفه ونسيت الموضوع .
بعدين اختي ربت .. وين ربت في مستفشى الجيمي .. وفي قسم الولاده قبل اختي لا تربي قلت بسير اشوف اختي واودي حج امي وعمتها الغدا .. واول ما دشيت والله في هذاج المكان ما شفت غير وافدين جنسيه سودانيه وجنسيه شاميه ومصريه .. المشكله انها اشغال سخيفه . يعني كاتبه ..واحده على كمبيوتر واحده قاعده والله ولا تسوي شي غير انها تقول انتي ورين رايحه وانتي عند اي مريضه بس.. وهب ممرضات.. ياريتهم ممرضات لا موضفات عاديات يعني لابسين لبس مدني .. مب لبس ممرضات انقهرت قهر .. وعصبت وقلت بصوت عالي كانت اختي تمشي قبل لا تربي وقلت ها بدل ما يحطون مواطنات حاطين وافدات .. عن ابو من قلت المواطنات .. ولا احنا نتعلم وندرس ونتعب علشان غيرنا ياخذ مكانا .. كنت معصبه يا خواتي ما تتخيلون شو انقهرت قلت عن ابوو احنا ندرس ونتعب ولنا حقوق في دوله .. لنا حق في البترول ولا نحصل شي .. خلصنا من هالشي ..
ومن جم يوم تاريخ14 /5 ربيعتي تقولي اختي متصلين عليها مستشفى العين وقالوا لها تعالي سوي مقابله .. قلت لها من متى مقدمه اختج قالت تقريبا من شهرين واتصلو عليها وسارت سوت المقابله وايد عجبتهم .. سكت وانا مقهوره وقلت لها الله يوفقها ان شاء الله .. ما انقهرت علشان دقوا لاخت ربيعتي .. الله يوفقها ويوفق كل محتاج واخت ربيعتي صج محتاجه .. وشويه اشوف ربعتي الثانيه تقولي اتصلوا علي مستشفى جيمي وعندي مقابله ..قلت عن ابو احنا مقدمين من متى ولا اتصلوا علي ولا على اختيه قالت ما ادري سيري راجعيهم .. قلت ما بسير لاني لو سرت بسبهم كلهم وبرد ..
شفتوا القهر وين وصل .. احينا الوافدين ياخذون مكانا .. واحنا وين مكانا في بلادنا .. وين نسير ونشتغل … انا اصلا قررت اني اكتب رساله وطرشها لاي مكتب الشيوخ وبشرح لهم حالة المواطنين .. قعدتنا في البيت تشيب الراس .. لا طالعات ولا شغل ولا غيره .. وين نسير يعني ..
الله يكون في عونا جميعا …ومالج غير الصبر اختي ،، والله بيرزقج بالوظيفه الزينه ان شاءالله بس انتي لاتيأسين من رحمة الله وروحي كل مكان قدمي لاتقولين هذيلا ذلوني وخلاص مابسير اقدم في أي مكان لاني انا انحطيت في نفس هالموقف والله ونفسيا تعبت بس عقب الحمدلله يتني وظييفه انا مب مقدمه عليها اصلا والحمدلله ،،، والله ماينسى عبده
الله يوفقج اختي
انا يوم روحت ما طاعوا ياخذوا اوراقي
قال بس يوظفون الوافدين
بس الشكوى لغير الله مذله
وحسبي الله ونعمه الوكيل
و انا ما خليت مكان ما قدمت فيه و عندي شهادة جامعية
و تخيلي اخرتها شو يقولون ؟ يقولون نبى ماجستير
مع ان بعض البنات ما يخصهن بالشغل و توظفن