بما أن مشاكل اليهال كثيرة وكل يوم ضرابة بينهم ومن كثر ما تابعت سوبر ناني وقريت مقالات عن تربية الأبناء ما حصلت شيء فادني غير جدول النجوم 
جدول النجوم: تحتاجون ورقة بيضة كبيرة ارسموا فيها جدول على عدد عيالكم يعني مثلا قسموا الجدول لخانتين كل ولد له خانة بروحة وكل خانة قسموها 3 أقسام أو على حسب الورقة اللي عندكم المهم هذا الجدول تحطون فيه نجوم للتصرف الزين مثل: (إذا الولد كل زين، ذاكر زين، نام بدون مشاكل، أي شيء زين يسويه الياهل حطوله نجمه…..)وإذا حد من عيالكم غلط أو سوى مشكلة مثل: (ما أكل زين، ما ذاكر دروسه، تعبكم في وقت النوم، ضرب أخوه، ما سمع كلامكم….أي غلط يسويه الولد إمسحوا عنه نجمة) …الولد اللي يضرب أخوه إمسحوا عنه نجمة وحطوها لأخوه اللي انضرب وبعد ما تمتلي الصفحة من النجوم تحسبون عدد النجوم عند كل ولد واللي عنده نجوم أكثر بحصل هدية أكبر واللي عنده نجوم أقل بحصل هدية أصغر….بصير عندهم تنافس بعدين وكل واحد بحاول إنه يسوي كل شيء صح علشان يجمع أكبر عدد من النجوم…….أنا عيالي صغار أعمارهم 4 و3 سنوات فكنت أشتريلهم نفس الهدية ههههه… الله يعينكم على تربية عيالكم ويحفظهم لكم… بس صدق الجدول مفيد وايد جربوه وادعولي
مشكوورة اختي الغالية
يعطيج العافية
انا عندي ولد عمره 3 سنين وبنوته صغيرونه توها عمرها 4 شهور..
طبعا المنافسه للولد بس..
والبنوته وحليلها بس حاطين صورتها مب عارفه شو السالفه.
المهم خذت لوح فلين وحطيت صورهم..
وسويت خانات التحدي بعد بصور..
يعني انه يرقد من وقت حطيت صورة ولد راقد..
واذا تبون بنزلكم الصورة قريب ان شاء الله..
وكنت اقول لولدي يوم بتكمل 10 نجم اختار المكان الي تبا نسيرله
عاد هو يتشرط الا ابا صحارى الا الالعاب الي ما ادري وين..
المهم يوم يكمل اوديه واحسه يكوون مستاااانس..
ويوم يسوي شي صح..
يعني مثلا يفرش اسنانه يقولي يالااا حطيلي وهو يختار النجمه الي يباها..
يربوا وان شاء الله ما تخسرون..
وسويتله لوحه ثانيه.
اعلق عليها رسوماته وساعات اسويله اوراق عمل عسب يحس بانجازاته..
والله يحفظلكم عيالكم ويحفظلي عيالي من كل شر..
اختكم..
روح البلاد..