خواتي الغاليات بغيت انشدكن عن حضانة الراشدية الخاصه
شو رايكن فيها؟؟؟
,,,,
وشو تجاربكن بالنسبة للحضانات …من حيث التعليم و الاسعار وراحة الطفل
؟؟؟؟
…
انا اليوم اول يوم أدخلها الحضانه وان شاءالله بس تكون زينه..
….
بإنتظاااااااركن حبيباتي
أم شمسه
للـــــ^_^ــــــــــــرفع
مشكووورة غناتي للرفع ماقصرتي
……
بس حبيت أقولكم اللي صار ويايه البارحه
اول مانزلتها الحضانه كانت متحمسه بشنطتها اليديده
والصغاريه اللي موجودين … ومعلمتها على طول خذتها ويلستها عدالها
والحمدلله … يوم بغييت اسير عنها سألتها أخليج .. قالت لي سيري
^_^
ظهرت عنها ونا متطمنه وفي نفس الوقت احاتيها لانه اول مره اودرها في مكان ماعرف عنه …
المهم
يوم ييت باخذها اول ما دخلت شفتها فرحانه
وتقوللي انا أدور عليج
ظحكتني.. وعلى طول سألت المعلمه إذا صاحت وإلا لأ
جان تقولي ولا افتكرت فيج
قلت الحمدلله
….
وسألتها شو سويتي اليوم جان تقولي لعبت.. بالزحليقي ولعبت بالطين
وسألت المعلمه إذا أكلوها شي .. قالت الصبح أكلوا الصغاريه كورن فليكس
وعطوهم عالساعه 12 شيبس وكاتشب
وودت بنتي الحمام مره وحده —->> أتمنى بس اتودر البامبرز على حزة النوم
بصراحه ارتحت لهم واااايد
…..
واليوم هو اليوم الثاني لها
ومسوين اليوم فعالية اليوم الاحمر
ولبستها تنوره حمرا وشباصه حمرا
وقالت لي المشرفه على الحضانه انهم بيصورونهم وبينزلون كل شي على سي دي يسلمونه نهاية السنه لأولياء الامور
عيبتني السالفه ^_^
والصغاريه طالعين حلوين اللي لابس قميص رياضه احمر واللي شال شنطه حمرا
عسب يعلمون الطفل انه هاللون هو الاحمر
وإن شاءالله بس تستمر الايام وبنتي على نفس الحماس
لان امي الله يحفظها قالت لي عن تجربتها ويايه اني اول يومين كنت متحمسه وثالث يوم انفجرت من الصياح ولا كملت
^_*
وشكرا لكن يالغاليات على حسن القراءة ولي عوده مع يوميات بنتي شماسي
أم شمسه