حل لحب الشباب غير الريكوتين/ تجارب + نتايج
اكيد في وايد يعانون من هالمشكله وفي منهم اللي قرر ياخذ الريكوتين وفي اللي خايفه منه بسبب الاعراض او انها متزوجه
في حل غير الريكوتين وهو (the Regimen )
*
هالمنتج اكثر شي معروف عند الاجانب ،بحثت عن تجارب للعرب وماحصلت شي يمكن بس تجربه وحده >اكثر التجارب بتكون بالانقليزي اتوقع هذا بيكون اول موضوع يتكلم عن المنتج بالتفصيل
*
قررت اكتب هالموضوع عسب اساعد بنات وايد يعنانون من هالمشكله وانا منهم
عن نفسي ما خذت الريكوتين وخايفه اخذه وانا اعاني من الحبوب لاكثر من 10 سنوات
في يوم كنت ادور فالنت ويوتيوب وشفت تجارب ناس وكلهم عن نفس المنتج لفتني لموضوع،
بالذات انهم (اجانب ) كانو يحطون صور لقبل وبعد وفي فتره الاستخدام وهاللي شجعني اكثر لان ماشي اخسره اذا جربت
( في شي لازم تعرفونه عن المنتج هو مب حل جذري ، يعني لازم تستمرين فالاستخدام حتي بعد ما تختفي الحبوب عشان ما تطلع يعني خليه نفس روتين للعنايه بالبشره بس اكيد بيكون استخدامه اقل من اول ما بديتي ، يعني مب توقفين وترجع الحبوب وتقوليلي ماشي فايده ،هذا نفس الروتين اعتبريه كاي كريم عالتسريحه هذا اذا كنتي تبين حل صدق )
من اكثر الفيديوات الي شجعتني هي هالبنت ، للي ما يعرفون انقليزي جدمو الفيديو للاخير وشوفو الصور قبل وبعد”
باختصار لكلامها انها كانت تعاني وماخلت شي ماجربته وضيعت فلوسها ومن الاشيا اللي جربتها كان برو اكتف وبعد ما نفع ، لين ما حصلت هالمنتج والنتايج واضحه عليها !!
شخصيا شفت هالفيديو اكثر من 10 مرات وحتي بعد ما خذيت الدوا عسب يشجعني استمر
لفيديوات اكثر بس اكتبو اسم المنتج فيو تيوب وبتشوفون العجايب
تجربتي :
عن نفسي بكمل الحين شهر وانا استخدمه، والنتايج الي اشوفها رائعه
من اول اسبوع بدات الحبوب تجف
ثاني اسبوع وجهي جف بزيااده وبدا يتقشر
طبعا ممنوع تطلعين الشمس الا بواقي ولا بيهيج البشره !!**
حتي لين الاسبوع الثالث خفت الاثار لانها تتقشر ، في كم حبه تطلع فالبدايه لكن مع استخدام الدوا تخف بسرعه وتتقشر
حاليا بس اعاني من آثار!!
والحمد لله ماعنيت من تهيج او احمرار او اي ماكنت اطلع فالشمس فالبدايه
وبخصوص الحشرفه او التقشر الي يصير فالبشره صح انه شعور كريه تحسين ويهج متحجر وجاف
في شي ساعدني من هالناحيه وهو بعد اسبوعين من العلاج بديت استخدمه
وهو فرشات ميا2- Clarisonic Mia 2 الالكترونيه لتنضيف الوجه ( ممكن تسون عنها بحث فقوقل او يوتيوب )
هي مب ضروريه وممكن تستغنين عنها اذا بشرتج حساسه وايد وفي ناس في اول اسبوع من استخدامها تزيد الحبوب عندهم
لكن بعدين نتايجها رايعه تساعد فالاثار والتصبغات هي بس كعنايه ونضافه لا اكثر
سعرها 700 من سيفورا
اهم شي في هالمنتج واي علاج اخر هو الاستمرااار ، حتي لو زادت الحبوب اول فتره او اختفت وبعدين طلعت لج كم حبه لا تيسين واستمررري لانه صدق صدق يستاهل ومن اكثر الاشياء تاثير وما بتندمين ان خذتيه
بتكلم عن المنتج اكثر :
هو عباره عن 3 علب
غسول + العلاج + اللوشن
العلاج=tratment
هو اهم عنصر من الثلاث
اللشون يساعد عالجفاف الي يسببه المنتج في اول اسبوعين الي 3 اسابيع من الاستخدام
اذا تشوفين سعر ال 3 غالي افضل تشترين بس العلاج الي هو عليه مربه برتقالي
لكن ضروري تستخدمين لوشن طبي بعده
ممكن تستخدمينه مرتين فاليوم او اكثر اذا بس بتحطين عالحبه نفسها
هالفيديو يوضح طريقة الاستخدام كامله :
اذا حابين تشوفون نتايج اكثر واراء للناس (كل شي بالانجليزي)
https://www.acne.org/regimen.html
هذا موقع المنتج الريسي ، ممكن تشترونه منه وممنك من مواقع ثانيه
انا شخصيا طلبته من سوق.كوم
من هالرابط
https://uae.souq.com/ae-ar/the-regime…ent-5345588/i/
وصلني بعد اسبوع من الطلب وسلم واستلم من اراميكس
طبعا الي فالرابط الحجم الكبير ممكن تطلبون اصغر
https://uae.souq.com/ae-ar/acne.org/s/
اراء الناس بالانقليزي :
https://www.acne.org/acne.org-the-regimen-reviews-1878/
——————————–
الراي الوحيد اللي حصلته بالعربي :
السلام عليكم ورحمة الله وبركاته ..
انا انسانه كنت اعاني من حب الشباب من كنت بالاعدادية .. ولين اليوم وانا اعاني منه .. كانت الحبوب بكل مكان تقريبا بويهي بشكل جدا محرج ويفشل ..
جربت برواكتف ما نفعني هيج بشرتي وقشرها على الفاضي
جربت ريتن اي + الفا كورت من المستشفى ما جاب نتيجه او بالاحرى ما صبرت عليه ما استحمل التقشير
دورت علاجات وايد جربت رواكيوتين شهر واحد وخفت اكمل بسبب الاضرار اللي ممكن يسببها للجسم
كنت افرفر بالنت جان اشوف في يو تيوب شكثر ناس يمدحون هالمنتج The Regimen من acne.org قلت خل اجربه مو خسرانه شي
طلبته من فتره واستخدمه فترة الاجازه وبديت مع بداية رمضان اليوم لي 26 يوم ولكن النتيجه خياااااااااااااااااااااااااااااااااااااااااااااااا اااااااااااااااااااااااااااااااااااااااال ما شاء الله ويهي تغير بشكل ايجابي …
المشاكل اللي تواجهني في المنتج الجفاف الشديد للبشره هالشي ماحبيته نهائي لدرجة ان لو احط ميك اب يطلع وايد مقطع ويفشل حتى لو ارطب بشرتي مافي فايده لان الtreatment هو اللي ينشف البشره علشان يعالج الحبوب ..
قاعده احاول ادور مرطب اقوى بس بنفس الوقت oil free حتى الميك اب بحاول اغيره واستخدم اشياء للبشره اللي معرضه لحب الشباب فاذا عندكم نصايح لمرطبات طبيه وميك اب حلو لحب الشباب فيدوني جزاكم الله خير ..
المشكله انا ويهي جدا حساس ضد التقشير لكن كملت العلاج .. اول الايام ويهي وايد صار احمر لان احس بحرقان من العلاج بس كنت استحمل بس حاليا احس انه قام يحكني وايد وايد مادري شالدبره هههههه بس بكمل دام انا شفت نتايج فعاله وويهي اقدر اقول صفى بمعدل 90% ما شاء الله تبارك الرحمن ..
تطلع لي حبه او حبتين كل اسبوع لكن تختفي بعد 4 ايام تقريبا لان المنتج يقضي عليها ..
نتيجة ويهي مثل اللي بالصور
( تم حذف الصوره لأنها مخالفه بعدم التظليل )
—————————————-
هالبنت بعد رايها ساعدني وشجعني الله يسعدها
الحبوب اللي اتلكم عنها هي واضحه ومعبيه الوجه مب حبه او حبتين من الدوره الشهريه ** فقط للتوضيح
اتمني من كل قلبي اكون ساعدت حد يلقا حل لهالمشكله لاني مجربه وحاسه فشعور كل من يعاني منها وحبيت اساعد بالي اقدر عليه اني اخبركم عنه
وفالنهايه لكل الي يعاني من الحبوب لا تخلون هالمشكله تضعف حبكم لنفسكم ولاتخلون كلام الناس ياثر عليكم وتذكرو انكم جميلين من الداخل قبل الخارج > بالتوفيق للكل
هالنوضوع جهد شخصي واول مره انشره فسيدات الامارات
اي استفسار انا حاظره
دعوه تكفيني
نزليه كـ موضوع ثاني واطلبي حذف هالموضوع
حق الاجنبية وكنت محتارة يناسبني او لا