أنا من فتره معرسه ولكن مشكلتي تتعلق بأهـلي … صحيح اني عشت وانا اتناسى الموضوع وأسوي عمري اني بخير وما بلايه شي .. واني ماتعرضت ل شيء .. بس عشان ابين للناس إني قوية .. ويمكن لين يومكم هذا وأنا جيه .. أحب بيت أبوي … لأنه الناس الي فيه تغيروا لأسباب .. وكانت أسباب سبحان الله غرييبه … انا ما اتشمت ولا مستانسة … بس الله يكتب وهذي أسبابه … ولكن الي أثـــر علي وخــلاني انش من عز رقادي الحين التفكــــــــير الزايد .. أنا من فترة زرت حرمة أبـــــوي بعد زواجي .. وهي الي مربتني ( مرقدة وتعبانة ومريضة) .. قالت لي : سامحيني على الي سويته فيج يوم كنتي صغيرة}~ .. أخــاف أموت وانتي مب مسامحتني …
تغصصت … رجعت لي كل الذكريات .. والمشكلة الي انا نسيتها بعد 7 سنين من محاولة النسيان .. والله مب قادرة ايود عمري .. المفروض أكــون راقدة ومرتاحة … بس مب قادرة من كثر ما أفكر في الي سوته معانا .. انا واخواني .. مادري إذا المفروض أشرح .. بس عمري ماخبرت حد إني تأذيت منها .. دايما وللحين .. أقولهم أحسن وحده في الدنيا .. والكل يحسدني انه مرت أبوي تعاملني بحنية و أدب واحترام .. مـاقولكم انه بعد ماكـبرت وعقلت وهي مرضت تغيرت معاي بس ( لأنها خافت اني بعد هالشيء .. أودرها وما اقعد وياها ) .. سالفتي سالفة وهي قصة طويلة عريضة مادري اذا المفروض اشرح ولا شو .. بس أنا كل الي معور قلبي ..
أسامحها على شــــو؟ يا ( مرت أبوي ) انا نسيت وحاولت انسى وحاولت اسامحج ليش اتذكريني؟
يا اختي (بنتها) انا نسيت تعاملج معاي ونسيت كل شيء .. ليش تقولين سامحيني؟
يا اخوي ( ولدها) .. انا نسيت وااحاول اتذكر كل شيء حلو ليش تقول سامحيني؟
أسامحها على شو ولا على شو ولا على شو ؟
على الأيـــــــام ( الي طلعتني فيه من بيتنا وأنا عمري 3 مادري 6 سنين )
على الأيـــــام ( الي محتاجين فيها فلوس وتقول ماعندي ونحن نضطر ناخذ من هنيه وهنيه )
على الأيام ( الي تخش فيها الأكل ولا الصابون عشان مايغسلون ثيابنا )
عـلى الأيام ( الي راقدين فيها ف ملحق البيت ؟؟ )
على الأيــام ( انضرب فيه وأنا نايمة ؟ )
على الأيام ( الي انطرد فيها اخوي وهو عمره 10 سنين وماعنده مكان يقعد فيه والي خلانا نسكت انا واخوي الثاني عشان ماننطرد مثله )
علــى الأيام (الي اخوي كان يرجع من المدرسة وهو ميت خوف من ربعه الي اغتصبوه ؟ )
علـى الأيام ( الي دمرت فيها علاقتنا مع أبونا وحسستنا انه هو يكرهنا لأنه جينا لهدالنيا ؟ وانه امنا كانت عار على المجتمع و انه هي كانت اخس انسانه في الوجود وانه مرت ابوي " احسن شخص في العالم ")
على الأيام ( الي دوم تقول فيها خوالج وخالاتج بشاكير عندنا وعند ابوج وخميرة و حرامية …..الخ )
على الأيام ( الي شلونا من أمنا ونحن سنة وسنتين ؟ عقب فرونا للخدامة ؟ وتبيعنا ع الدريول و ع الحارس عشان تحصل لها كم فلس؟ وهم يستانسون فينا ؟ )
علــى الأيام ( الي فيه نحن نجسين واذا استخدمنا الشيء يحرقونه او يفرونه في الزباله لانه يمكن عيالها يتسممون منا ) ..
علـى الايام ( الي خلتني نفس الخدامة عند خواتي ؟ وعند حرمة اخوي .. وانا حليلي مادري ع بالي يحبوني هههـ ) ..
علـى .. وعلى .. وعلى …
مم على شو اسامحها ..
والمشكلة بعد هذا كله .. كنت اقول يحبوني .. ههههـ
وبعد ما مرضت … وانا لين ما صار عمري 20 سنه وانا مجابلتنها بصدر رحب وبكل حب مني …
وكل الناس تحسدها عندج بنت من ريلج لكنها تخدمج وتحبج .. كنت صدق احبها !!! ههههـ ولكن ماعرف ليش ماكنت استوعب انها ماكانت تحبني ماكنت اتخيل ..هههـ لانها كانت تقول انا احبج وانا اصدقها لانه ع نياتي … كل هالسنين انا ساكته ومتحمله .. ههههـ وأقول لا …… أنا الي كئيبة وأنا الي اكيد فيني حالة نفسية … ولا هي زينة هههـ اعق الملام علي أنا … وعلى أبوي …… ولكن مسكين ابوي … والله العظيم ارحمه واسامحه واسامحه واسامحه لأنه ماله ذنب هي الي خربت .. ومن مرضت وسكتت … حياتي تغيرت للأبد سبحان الله … انا الحين محد يسوي شيء بدون لا يستشيرني .. والحمدلله يحاولون يراضوني ابوي واخواني وخواتي بعد ماكنت عندهم ما اسوى … ربي رد لي اعتباري انا واخواني… ويعرفون اني انا ماراح اسكت الحين لو شو ماصار عشان جيه محد يتكلم أو يتجـرأ انه يقول شيء هههـ .. صارت البنت قوية وماتخاف … نفس قبل وشجعت اخوانها انهم مايخافون .. ( بعـــــد شو )!! أرد واقول احسن مـن ولا شيء ..
ولــكن يا بنات … قلبي عورني … يوم قالت : سامحيني على الي سويته فيج يوم كنتي صغيرة}~ ..
علـــــــــــى شو أسامحج يا مرت أبوي ……….. على شو …. 
عورتي قلبي
ولان اخر هذه الحياة موت
ولان الانسان ينتظر من الله يرحمه
ولان عذابها ما بيرد شي
ولان الي راح راح
وعلى شان الله يوفقج
وعلى شان الله اكرم من عباده، اذا العباد سمحوا فالله بتجاوز عن العباد. يوم بيكونوا في امس الحاجة للعفو
انتي طيبه و خدومه و نيتج اتجاه الناس صافيه و بريئه . شخصيتج نفس شخصيتي ايام زمان
لكني تغيرت عقب ماعرفت نية الاوادم اللي تعاملت معاهم .
و بصراحه ؟؟ صرت ما احب نفسي
انا قبل كنت احسن .
قبل كنت مرتاحه لأني اعامل الناس بأخلاقي و بمبادئي
الحين شخصيتي فيها خبث
قبل على نياتي الحين لا
قبل ارقد و انا ضميري مرتاح .. الحين لا
خلج على طبيعتج لأنج بتكونين مرتاحه اكثر
و سامحيها و ربج بيزيدج من فضله .. وبيرد لج حقج .
و الله تبغين الصراحة انا إنسانه طيبة يا غير أني ما أسامح الي يغلط ما ادري ليش ،،،، يعني حرمة يدي غلطت في حق أمي و يدتي ،،،، يا غير القصص الي كنت أسمعها و الي كانت تسويه في يدتي ،،،، ارد اكرهها و اكرهها و أقول يا رب تأخذ قضا يدتيه منهم ،،،
لكن سامحيها عشان ربج
سامحيها مب عشانها عشان ضميرج يرتاح
نحن مب ماخذين شي من هالدنيا يوم نشوف الناس تموت نقول فعلا نحن شو ماخذين من الدنيا غير اعمالنا؟
ياريت كل ام وابو يفكرون بهالمواضيع الي تستوي ف حالات الطلاق والزوجه الثانيه محد يدفع ثمنها غير العيال