صبرت وطالت المدة .ساااعدوني 2024.

أنا صارلي 11 شهر تقريباً مالجة … لكن للأسف طول هالفترة بيني وبين ريلي اللي هو ولد عمي مشاكل … وكل مشكلة تير الثانية … المشكلة هي أني أنا دايماً أتشكى من ريلي أنه بارد في المشاعر ولا مبالي وأسلوبه فالكلام والنقاش صعب جداً وما يهتم فيني … إتصال واحد فاليوم وخلاص وزيارة وحده فالأسبوع وأغلب الوقت انكون ساكتين هو يقول انه مايعرف يتكلم ولا يفتح مواضيع ما يحب يتكلم وايد هالشي خلاني ما أحب أتصاله ولا ييته يوم ييي أتريا الساعه اللي يقول فيها بروح …وهو عصبي وأنا عصبية … كل ما أفتح موضوع معاه ينتهي بزعل وياخذ هو زعلان 5 أيام أو أسبوع ما يكلمني ولا أكلمة ومشكلتنا ولا واحد يحب يعترف بغلطة حتى لو كان غلطان… وهو يقول أنه يخجل مني … وبسبب هالخجل صرت انا اللي أبادر بكل شي من ناحية الكلام وفتح المواضيع والهدايا والمشاعر وغيرها من الأشياء( صرت أحسن نفسي ما عندي أنوثه من كثر ما أبادر) … بس كل إنسان له طاقة مايقدر يتعداها … أنا تعبت من كثر ما أبادر وأعطي وهو ما يعطيني … لدرجة أنه مره قالي كيف تبيني أعطيج حب وحنان … وأي شي أناقشة فيه يريد هو يفرض راية فيه ويقولي أنه كل شي راجع له وكل شي يمشي بكيفة سواء أنا مقتنعة او لا … وكذا مره كلمته فهالموضوع أنه يغير أسلوبه معاي كوني بنت أحب الرقة والرومنسية فالتعامل … وهو يقولي بتغير … ويمر الوقت ومايصير أي تغيير … وصارت المشاكل تكبر بعد مرور 6 شهور من يوم الملجة تقريباً رجعت وقلت مره ثانية بحاول وقعدت أقوله إذا اتحبني اتغير وهو يقولي بتغير واستمر هالشي لين قبل كم شهر ..وقبل شهرين تقريباً بعد قلت له تغير وقال أوكي وأنا غلطان وخلاص هالمره جد بتغير … بدا يتغير جيه يومين وصار يتفاعل معاي ويتصل ويهتم ويسأل لكن للأسف انا فهالفتره من كثر التفكير والصدمات اللي كان يصدمني فيها صار عندي فتور أو برود وهو ما عطاني مجال رجع نفس قبل فأنا خلاص تعبت من البرود فدخلت اهلي وأهله وقلت لهم هذا الإنسان ماخذني كزوجه يحبني ويهتم فيني ولا بس زوجة بالإسم والشكل فقط … وأهله ماقصروا قالوا نحن بنكلمة … لكن للأسف كل حد قعد يقول كلام وكبرت السالفة لين ما صار بيني وبينه كلام يجرح … ووصلت انا لمرحلة إني أكرهه ما أدري هذا الشعور بالكره هو بيكون فهالفتره ولا بيكون دائم … وأنا دائماً أقول أني ما احبة … ما سوا لي شي زين علشان أحبه … كله يكلمني بنرفزة وبعصبية وتكون المشاكل كلها تحدي بيني وبينه … أنا ما أنكر أني غلط فوايد أشياء ..بس هو بعد غلط كثير .. وفهالأسبوع صارت مشاكل وكلام وايد لدرجه أني وصلت لحل الطلاق وقلت له كذا مره بعصبية طلقني … وهو يقول أنه يباني …. بس هذا طبعه صعب يتغير بسهوله … فأبوي قال إذا ماتحبينه خليج فحالج وهو فحاله علشان ما نظلم الريال … إذا ما تحبينه لا تاخذينه.. مع انه ابوي يقولي الحب ما ييي إلا بعد الزواج … وأهله عطوني فرصة علشان أفكر إذا أريده ولا لا …وآخر شي الكل رجع الغط علي وقالوا اني أنا ما أريد أتفاهم معاه وقالوا اني أنا ما خذه سالفة الزواج لعب وأني أنا اللي خسرته مادياً وقالوا لي أنه السالفه سخيفة وأنا اللي كبرتها وقالوا اني أنا بخرب بيتي بإيدي … وإني أنا اللي وافقت عليه من الأول وألحين أقول ما أريد … كلهم قالوا لي لو انتي تبينه بتتحملين كل عيوبه وبتغيرينها بإيدج… أنا ألحين محتاره أرجع أكلمه وأتفاهم معاه وخلاص أقرر أني اتزوجه لأنهم هم قاعدين يجهزون للعرس وهم قالوا لي إذا بترجعين تتراظين معاه خلاص ما ترجعين تقولين بعد كم يوم ما أريده يعني هذا الشي يكون حاسم أني ما أرجع أفتح أي من المواضيع اللي سببت المشاكل أبداً وآخذه على ماهو عليه … ولا أنفصل عنه مع اني أعرف كل شي بيطيح فوق راسي وبيييني الكلام من القريب قبل البعيد لأني صرت أسمع كلام يجرح من أهلي وأهله وهذا بعدني ما انفصلت عنه … سااااااااعدوني أرجوكم…