هاي أول مرة أكتب مشكلتي ..متعودة أني أحل مشاكلي بنفسي وماأدخل حد ..بس أحين أحس مخي وقف ومب قادرة أفكر ولا أقرر وريلي عطاني 3 أيام عسب أقرر..
أنا صار لي سنتين متزوجة وعندي ولد عمره 7 شهور مشكلتي أن ريلي صار له مدة تقريبا 8 شهور كله يقولي نفسيتي تعبانة ومضايق كل يوم لازم يقولي هالكلام وأنا أسئله شو فيك شو مستوي يقول مشاكل في الدوام وولأن ولدي مريض عنده الثلاسيميا شهريا يحتاج دم أدعوله أن ربي يشفيه الحمدلله ع كل حال يقول عشان ولدي مريض وبعد هاي الفترة عمي اللي هو أبوه تعبان شوي يقولي عشان أبوي مريض وبعد عمتي اللي هي أمه قبل أسبوعين مسوية قسطرة ف يقول عشان أمي مريضة ..
هو مضايق من هاي الأشياء اللي أنا أعرفه تعبت ونفستي تعبت لأن هو مضايق مب عشان ولدي أنا راضية باللي الله كاتبه لي ومتفائلة أن ربي بيشفيه وهاي هدية من الله ..
المهم في تصرفات أنا ما أحبها في ريلي أنا وحدة غيورة وأحاول قد ما أقدر أسيطر ع عمري بس ماأروم ريلي واايد يهتم في خواته هم معرسات ألا وحدة بس هو يهتم في وحدة معرسة عادي نحن قاعدين كلنا يقوم يسير يحضنها ويبوسها وساعات يتمصخر عليه ييدامهم وهم يضحكون يوم أقوله ليش جي اتسوي يقول أستهبل وأنا عاادي أعصب شوي وعقب أهدئ ..من فترة كنت أشوف تليفونه أشوف يرمس وحدة ع الواتس اب وحدة من الدوام صح هو يرمسها عن الدواوم ويسايرها عشان ياخذ عنها بروجكترات وساعات يضحك وياها ويسولف بس انا اغار يقولي اونه هاي ماتنجاف خسفة وضخمة وما فيها ذرة جمال بس بعد اغار..وبعد إذا أطلب منه شي أتم أحن وأترجاه بس لا حياة لمن تنادي لين أمل وأسكت..ومصروف بعد ما يعطيني اذا ابي شي يعطيني نفس الوقت بس أنا أبي مصروف حقي وأقدر أتصرف فيه..والمشكلة الكبيرة اللي مدمرة حياتي أن ريلي ما يباني أسير بيت ربيعاتي وبيت بنت عمي وبيت خالي يقولي حطي عليهم أكس ما بدشين بيوتهم لين ما أموت بس عادي هم أيون بيتنا وأتواصل وياهم بس بيوتهم ما أدش بس أنا هالشي مضايقني انا قبل لاأعرس كنت واايد أسير عند ربيعاتي ودووم أسير وأطلع ويا بنت عمي ووأيد كنت مع بنت خالي جنه خوات لأن أنا ما عندي خوات باجر الناس بيرمسون عنه أن هو شكاك أنا خايفة ع سمعته لأن ف عائلتنا مافي هالشي وأخاف هو يسمع من برع أن الناس ترمس عنه وعقب يلومني أناوهو واايد حساس من هالشي ..يعني بالعقل أذا هو ما خلاني أكيد الناس بترمس عنه وأنا أشكثر أطلع أعذار وحجج..وبعد مشكلته أن هو بيتوتي ما يحب يطلع ولا يطلعنا إلا بطلعت الروح ولا يحب أسير أعراس إلا نادرا…
أحين هو نفسيتي تعبانة مب من ولده وعمي وعمتي نفسيته تعبانة مني لأني أقوله بسير بيوت ربيعاتي وبنت عمي وخالي واونه صرت أخاف استانس حتى لو اكون مستانس امثل اني مضايق بس عشان ما اتيبين طاريهم هو ما كان بيقول بس لأني أمس قلتله أن حياتي جحيم وياك جان يطلع اللي فقلبه وزين أني قلت عسب يطلع اللي فقلبه ويقول أنتي شيبتيني ف هالسنتين وذوبتي قلبي ما عاد فيني قلب ليش ياناس أناشو سويت أبشو غلطت..
هو دووووووم يقولي أحبج وما أتخيل خياتي من دونج وأنتي وأنتي
بس أمس طلع كل اللي بقلبه أونه هذا حياتي وأنا ماروم أتغير وما راح أكون خاتم بصبعج ولا أنتي ولا عشرة من أمثالج يرومون يغيروني أذا تبيني أهلا وسهلا وبيوت هايلا ما ادشين لين مانموت واذا ماتبيني الباب يوسع جمل وولدي باخذه عنج فكري وقرري واذا قررتي اتمين وياي بنفتح صفحة يديدة وبنحط النقط ع الحروف وبعطيج مصروفج ووو ..
ما اعرف شو اسوي ارضى باللي يقوله واتم وياه ولا أتطلق وأنحرم من ولدي ومنه ومن حياتي..
أنصحوني خواتي وأدعوا أن الله يشفي ولدي وعمي وعمتي ويسخر لي زوجي ويسعدني في حياتي أكون شاكرة لكم .
حبيبتـي هدي عمـرج و فكـري بعقلج مب بقلبج
اذا هو قالج بيحط النقط عـ الحروف خلاص يعنـي آتفاهمتوا
وحطي شروطج و لاتتنازليـن
الله يصلح من بينكم
عندج اسره وبيت وولد تعبان الله يشفيه يعني عندج مسؤوليه واشياء اولى واهم من الروحه لبيوت ربيعاتج وبعدين مب شرط تسيرين عندهم يمكن تلتقين وياهن اي مكان والسموحه
الريال يمسك الحرمه ويبي يحبسها بالبيت
انا بقولج تفاهمي معاه . واهم شرط زيارة الارحام مب شرط ربيعاتج . .ويعطيج
مصروف ليج
نصيحه لا تهدين بيتج وولدج
كون زوجك بيتوتي يعني لا عندة طلعات مع ربع وتاركك بالبيت بروحك يعتبر زوج يحب بيتة
وكون فتح قلبة ويريد يحط النقاط على الحروف معناة رجل واضح ويريد يفتح صفحة جديدة
حبوبة أسمحي لي الواضح أنك ما عرفتي تكسبي زوجك وتقولي تحبية وتغاري علية بس تصرفاتك
معة لا تدل على ذلك الحب والغيرة ليس بالتملك فديتك
أن المحب للمحب مطيعا
وهو لم يطلب منك المستحيل طلباتة عادية وتحدث بأغلب البيوت
المطلوب منك تغير نمط حياتي وتتقربي لزوجك أكثر وكوني كما يريد وطلبي منة مصروف
وأن تخرجوا مع بعض وتغيروا جوا يمكن أنت ملانة من الرتين والجلسة بالبيت
حبيبتي بعدكم بأول حياتكم وما أشوف عندكم مشكلة لخراب البيوت
بس مرض أبنكم ومرض الأهل شيء متعب للنفس الله يشفيهم ويعافيهم
استهدي بالله ورجعي نفسك حتى لا تحاسبي على تقصير بحق زوج يحبك
ما قصرتوا