مع بداية كل سنه يديده تبدى مأسااتي والله العظيم تعبت 2024.

انا بنت حالي حال باقي البنات احلم مثل باقي احلامهم ويمكن طموحي اكبر وعقلي اكبر من البنات ..ما افكر بلبس ولا طلعات ولا اي شي

الشي الوحيد ألي افكر فيه هو اني ((ادرس))

من كنت صغيره افكر اروح الجامعه واتخصص تخصص نادر لأني ذكيه ومتفوقه ودايما من الأوائل..على الرغم من ظروف بيتنا الكئيبه..لأنه ابوي عاطل عن العمل..وعلى الرغم من المعيشه الضنكا والمشاكل الكبيره …كان كل همي دراستي بس ابا ادرس

وصلت الثانويه العامه..وسهرت الليالي والايام وتخصصي ((علمي)) وتعبت وايد..لين تخرجت..

هيه تخرجت وياليتني ما تخرجت…الكل يسألني كم يبتي كم يبتي والكل افتخر فيني على رغم الظروف نسبتي كانت(( تسعينات ))

ويه وقت الجد..ربيعاتي كلهم اختاروا الجامعه ألي يبونها وسجلوا وألي سافرت وألي وألي…

انزين وانا؟؟

كلمت ابوي وقلتله وأنا ونسبتي وتعبي؟؟

قالي شسوي ما عندي فلوس؟؟ تمي في البيت لين الله يفرجها؟؟

ما صحت جدامه وسويت نفسي قويه لأني ادري انه ما عنده فلوس..ومن وين بييب..

بس انا كل يوم يمر اتقطع فيه ألف مره وكل ما حد شافني يقولي وين تخصصتي؟قلت لهم ما راح ادرس وايود عمري غصب عن البجي

ألي نسبهم اقل مني السنه اليايه بيتخرجون ألي يابوا ستينات وسبعينات درسوا بأرقى الجامعات

وانا اقعد ألملم حسرتي في البيت…هيه في البيت..مرت سنه مرت سنتين ومرت ثلاث سنين وهاي الرابعه وما بقا عالجامعه غير ايام ..

كل هالفتره قاطعت صديقاتي لانه كل رمستهم عن الجامعه والجو الجامعي والاساتذه والمحاضرات..احس بالألم والحرقه وما اقدر اتكلم او ابوح ساكته لانه عارفه ابوي مو بيده شي..

صار عمري 21 يعني الي بعمري راح يخلصون خلاص وانا قاعده ادور حل للي أنا فيه..

ابا ادرس ابا ادرس والله العظيم بس ابا ادرس..اصيح طول الليل وادعي ربي اني اكمل هالسنه دراسه..

بتقولون لي ليش ما درستي بالجامعات الحكوميه!! بقولكم لأني مب مواطنه..هيه مب مواطنه..

انولدت اهني وعشت ودرست وكبرت شسوي هالشي مو بيدي!!

اهلي كلهم مواطنين هيه كلهم بدون استثناء ألا نحن..

ولما قلت لهم ساعدوني عشان ادرس تبروا مني قلت لهم ما راح تخسرون شي اعتبروها زكاه صدقه اي شي انا راضيه ..محد رضى والكل قال عندي ديون وغيره مع انهم اغنيا هيه اغنيا وما عليهم قاصر

طيب انا شسوي في حياتي وين اروح يقولون تزوجي..يعني من وين اييب لي ريل؟؟..انزين اذا ما عرست بتم جيه محد طايع يشغلني ,,

يعني انا انتهيت اعد ايامي ألي راحت عالفاضي ولا اني قادره اسوي شي