بدون مقدمات بدخل في الموضوع علي طول
بما أني أداوم دوام كامل 8 لين 3 و عندي بنت عمرها 5 شهور الله يحفظها جبت خذامة من 3 شهور عسب تهتم في البنت يوم أنا في الدوام.
بعطيكم نبذة عن الخدامة و كيف تقضي يومها….. عسب تفهمون
خذامتي فليبينية عمرها 45 سنة مسيحية و ما اشتغلت بالبيوت قبل أول مرة تشتغل بره بلادها.جبتها عن طريق وحدة في دوامي و الحمد الله تبين حنونة و زينة و أنا ارتحتلها لأنها عودة و عنها عيال و أصغر بناتها عمرها 15 سنة. و أعطيها راتب 1000 درهم
طبعا في شغل البيت حدث و لا حرج ماتعرف تسوي شي خير شر. يذوب تعرف تكنس و تطوي الملابس
فهمها ثقيل و بطيئة جدا. قمت أسوي كل شي بروحي عسب ما يرتفع ظغطي من بطئها.
ما أخليها تجي صوب الطبخ أبدا و ما تنظف البيت كل يوم . اللهم تغسل المواعين اللي أطبخ فيهن و اللي هي تاكل فيهن.تنظف البيت الجمعة و السبت يوم أنا بالبيت و يريت تنظيف يبرد القلب نصف التنظيف أسويه بروحي عسب أتفادي بطئها الشدييييييد عادي تم تمسح الممر ساعتين.
حاولت أعلمها بس ما تمسك الشي من أول مرة و أنا من النوع اللي أكره التكرار و أكره يوم طريقة ترتيبي لبيتي تكون غير عن ترتيبي أنا. زيادة علي أنها ما تنفذ التعليمات بحذافيرها أحسها طنش و تسوي اللي في مخها.
مدمنة كوكاكولا و تشبس رقم واحد الكرتون مال 24 غرشة كولا يخلص في 4 أيام للعلم لا أنا لازوجي نشربها .
بالعادة أجهز أكلي مال يومين أو 3 أيام مسبقا عسب ماأطبخ كل يوم لكن يوم أرد أحصلها ماكلتنه مع اني أقولها اطبخي اللي تبينه حقك بس لا تجين صوب أكلي خاصة إنه مال رجيم لكن للأسف لا مجيب و يوم أقولها تسويلي حركات عبيطة كأنها ياهل وتقولي أكلك أونه لذيذ أحلي عن اللي أنا أ سوييه.
مرة قامت تقلي سمك 4 الفجر تخيلو أنتو الموقف قممممممممة القهر.يوم نشيت من ريحة السمك
أشوف شو السالفة أحصل الحبيبه شرات القطو علي صحن السمك قلتلها معقولة اللي سويتيه تطالعني وتذبلي في عيونها أونه السمك يوم يكون توه فرش طالع من البحر يكون لذيذ ( للعلم زوجي كانو طالعين رحلة صيد داك اليوم و جاب سمك ).
تموت علي شي أسمه رقاد و أبسط مثال البارحة أنا و هي تمينا سهرانين الجمعة أنا قعدت ألاعب بنتي لين نامت 3 الفجر و هي قاعدة عدالنا تطالع التلفزيون ( للعلم ما أخليها تلمس بنتي يوم أنا موجودة – أسويلها كل شي بروحي). رقدنا 3 . أنا نشيت 9 و هي نشت 2 الظهر.
مثال ثاني يوم أطلع الصبح دوووم أخليها راقدة و لا مرة نشت في الوقت اللي أطلع فيه و اللي هو 6:30 الصبح.
طبعا بنتي تنام عدالي و إن قامت أقوم و ياها لين أرضعها و أغيرلها و ترد تنام . و بنتي ماشاء الله عليها ما تنام إلا عقب 2 الفجر بس دوم أنا و الخذامة موجودات أقولها سيري ارقدي ماتطيع تتحجج عسب تم طالع التلفزيون و مسوية عمرها قاعدة عندي إن احتجتها.
اش معني انا أسهر و أنش حق دوامي 6 و هي تم راقدة لين ما تنش بنتي علي 12 أو 1 الظهر
مع كل اللي ذكرته أحاول أبرد و إياها لأبعد الحدود لا أصارخ و لا أعصب عليها عسب ماتسوي شي في بنتي
فعسب تشي استسلمت ودلعتها ما أخليها تسوي أي شي اللهم تهتم في البيبي يوم أنا ما حد بس.و طبعا عسب بالي يطمن راقبتها من أسبوع في الصالة و غرفة البيبي و اكتشفت الآثي:
بيمكن شوفونها أشياء بسيطة بس أنا أشوف أكبر منها مافي
أقولها الرضاعة 180 مل كل أربع ساعات أعطيها البيبي , اكتشفتها كل شوية رضعت بنتي من نفس المرضعة حتي مرات بدون ماتحرها و تخليها بدون غطا.
كل مابنتي فديتها صاحت سكرت فمها بالملهاية .
بنتي تنش و تم تصيح في فراشها روحها و هاذيك تطنشها لين تنش علي راحتها.
أقوللها غيريلها الحفاظ كل ساعتين ,,طنشها بالساعات ما تغير الحفاظ
مرات تخلي بنتي عند التلفزيون علي كرسيها و هي ترقد ,وبنتي مرات تم تصيح روحها لين ما ترقد مسكينة و الخذامة نايمة .
وصيتها أنها ماتغير ملابس بنتي ابدا . مرة ملابسها توسخت من الحفاظ فسختها و خلتها علي الفراش بدون غطي و عقب قامت تطلع ملابسها و ما أحتاج أقولكم عن البطئ.
خواتي اللي مستغربات مني تري بنتي تم و ياها أغلب الوقت عسب تشي مبردة معاها للأخر
أنا من الأساس ما أداني شي أسمه خدامة لو مو دوامي اللي مش قادرة أفنش منه حاليا مابجيب حد مول مو مرتاحة ببيتي و أحس بضيق
للحين ماكلمتها . شو تنصحوني؟؟؟؟الحين الله يخليكم شو تشوفون أشل بنتي حضانة و لا أغير الخدامة
الحل و لله الحمد
جزاكم الله خواتي كلكن اللي لاموني و اللي عذروني ماقصرتوا و ردودكم خففت عني شوي و الحمد الله حاولت أكون منصفة مع الخدا مة لأبعد الحدود عسب خاطر بنتي لكن للأسف ما بين في عينها كل الدلع مدلعتنها
و أنا كلمت دوامي علي أساس أخلص شغلي من البيت حتي لو بنصف الراتب راضية مع أن شغلي حساس و يباله تركيز.
الحمد الله مديري (أمريكي ) تفهم الوضع لأبعد الحدود و وافق أداوم من البيت لمدة شهر كتجربة براتب كامل و بعد الشهر راح يقرر إذا أنفع أكمل أشتغل من البيت أو لا
ادعووولي يمر الشهر هذا علي خير و يوافق أكمل المشوار علي ها الحال لين ماتكمل بنتي سنه علي الاقل.
مشكورين و ماقصرتوا حبايبي
الحل تشوفيلج وحده فاهمه ومتعلمه وسبق لها العمل .. حتى لو كانت كبيرة في السن
بس اهم شي تكون مشتغله من قبل
بالنسبة لبنتج .. حاولي ترتبين رقادها .. عسب تنام لج الساعه 11 اوو 12 بالليل
اذا نامت العصر او المغرب . خليها بس ربع ساعه وعيها
هذي ما تنفعلج
حتى لو تخسرين فلوسج سفريها
انا عندي فلبينية عمرها في الثلاثين بس ما تسوي الى خدامتج تسويه
وانا اايدج يوم تقولين الفلبينيات يحبن الرقاد
بس لان عندي خدامة اندونيسية تطبعت بطبعها فما تنام
أنا في قمة الاستغراب مب من الخدامة !!!
أنا مستغربة منج !!!!
وحدة ما تأمنينها على بيتج وعلى التنظيف وعلى الطباخ ، تأمنينها على ياهل عمرها 3 شهور !!!!!!
تعرفين انها تموت في شي اسمه رقاد وانتي موجوده
كيف يا في بالج انها بتودر الرقاد وبتجابل الصغيرونه وانتي مب موجودة ؟!!!!!
الياهل هذي مسؤولية عووووووووووووده
اذا اهمالها أثر فيها الله لا قال
لا بينفع شغلج ولا انشغالج .
أنا يوم كنت أشتغل
كانت بشكارتي 24 ساعة متفرغة للصغيرونه
وتعرف حق اليهال زين امازين
وما أخليها بروحها وياها
تكون في بيت أهلي والبيت كله ناس
لكن في النهاية حسيت ان هالطفلة محتاجتني
والأفضل أيلس أجابلها بدال البشكارة.
يمكن في حالتج ما ترومين تستقيلين مثلا
لكن الحل انج تسفرين هالبشكارة لأن ما فيها فايدة وحدة تذكر
واي بشكارة ثانية بتيبينها وديها ويا الصغيرونه
عند أهلج أو أهله أو حتى اليران
لكن لا تخلين طفلة صغيرة لا حول لها ولا قوة
ويا بشكارة ما تعرفين من وين يايه
ولا اذا كانت نيتها صافية والا لأ.
أنا تحسبت إن جبتها ماعندها خبرة بفتك من شر الخذامات مال المكاتب بس حسبتي شكلها طلعت غلط.
بنتي تعدل رقادها عيجزت و أنا أحاول لو أخليها واعية اليوم بطوله وقتها هو وقتها
وان محد يقدر لبنتج بيتج وبنتج اولا فيج من الشغل لابركتن في الفلوس اللي بتخسرج بنتج وبيتج الله يهديكن من حرمات تشوفن الغلط من الخدم وتسكتن