أبا أعرس مب عارفة كيف ؟؟ أحس بالنقص من هالموضوع. ساعدوني 2024.

شحالكم خواتي

أنا مب عارفة كيف أبدى موضوعي،، و من وين أنتهي؟؟ حياتي كلها ملخبطة و غريبة و عجيبة مب عارفة ليش حياتي جذي؟؟

الصراحة، أنا إنسانة عمري 27 سنة، و خاطري أعرس، أموووت في شيء اسمه عرس، خاطري أتزوج ××××××××
و غير هذا زميلاتي في الدوام وايد يعيروني و يحسسوني اني مب معرسة، لأن عدم زواجي هو نقطة ضعفي الحقيقية. لأن متميزة في عملي، و جميلة، و الناس و بالأخص الرجال يحبوني لأني اجتماعية و منتجة في عملي. ما أدري طول اليوم أحس بالحزن حتى انه صار يشع من عيني، و أحس بالرغبة، خاطري حد يضمني لصدره، أبا أحس بالدفء.. لا تضحكون علي، كل يوم أسبح بالليل و أدلك جسمي بالكريمات و أعدل شعري و أولع شمعة بحجرتي، و يكون الجو رومانسي، و ×××××× أحس بإحساس فظيع، و بعده أقدر أنام، لا تقولون لي انتي انسانة متفيجة و فاضية ما عندج شغلة، اسمحولي خواتي لأ؟؟ أنا أداوم و أطلع من دوامي و أسير الجامعة عسب الماستر لاني طالبة ماستر، بعدها أسير الجم أسوي ابروبيك و ساعة ع الالات أو أكثر مع أني مب متينة بس عسب أكسر الروتين و أرد البيت.. يعني المفروض أكون منهكة و تعبانة و ما لي بارض في هالسوالف.. بس سبحان الله ما أدري كي يراودني هالشعور، و أنا بعز تعبي خاطري خاطري أكون في أحضان ريلي و أنحب و أحس بالأنوثة..

في دوامي المختلط شي وايد شباب تعدوا الثلاثين و بعدهم عزاب، و كل واحد منهم يقول الزود عندي، و ما أكذب عليكم اتمنى واحد منهم يدق باب بيتي بس عسب أحس بالتميز و احس اني مرغوبة و مطلوبة .. بس للأسف في حياتي ما انخطبت، و لا تقدملي واحد، و أنا فعلا ما أسير أعراس لأن أمي ما تحب تسير اعراس، و اذا سارت أعراس بنات صديقاتها ما شلتنا وياها، و أعراس معارفنا و أهلنا ما تحضرها، أصلا انا ما عندي فستان للمناسبات، حتى ربيعاتي أو بالأحرى زميلاتي بالدوام ما يعزموني لأعراسهم أتفاجأ ان لهم أخت عرست أو في مناسبة ملجة أو غيرها، حتى مرة خاطري وحدة من زميلاتي تعزمني، بس للأسف ما عزمتني، يوم سألتها ليش؟؟ قالت عسب ما تخطفين الأضواء، و تناسبين أخو ريل أختي، الأقربون أولى بالمعروف!!!! و ما نسير على الناس و لا حد يسير على بيتنا،
تصدقون صارلنا أكثر من 10 سنين ما فصلنا ملابس للعيد، تدرون ليش؟؟ لأن محد يزورنا، و كانت لنا جارة من أهل الوالد، و انتقلت وقتها لبيتها اليديد، و من هاكي اليوم ما صارت أمي تفصل لنا بالعيد، كانت تفصل لأنها خايفة من انتقادات الجيران لها، بس الحين كل اللي حوالينا وافدين فصارت ما تهتم… و حتى قرايبنا ما صاروا يزرونا لأن أمي ما توجبهم عدل و ما ترد زيارتهم.. و حتى اذا حد ربى أو عرس، أو توفى، ما توجبهم و لا تقوم بواجبها.. يا ما نصحتها و كلمتها بخصوص هالشي انه غير مستحب و لازم تغيرها شوي، اذا مب لها على الأقل لنا احنا بناتها مب وينة فحقنا الناس ترمس عنا يقولون ان اخنا ما نعرف السنع و لا سنة العرب..

خواتي،، احنا 4 بنات و كلنا بسن الزواج بس محد يتكلم،، و لا عمرنا فتحنا هالسيرة حتى بين بعض، على فكرة أمي مب مواطنة، قبل كم يوم قالتلي أمي أنها طلبت اثنين من ربيعاتها انهم يدورون حق أخوي العود عمره 22، يعني فكرت تزوجه و احنا البنات الثلاث اللي أكبره عنه كلنا مب معرسات ما فكرت فينا،،،

ما عندي ربيعات كلوز، أو ربيعات بمعنى ربيعات، يعني تفضفضين لهم، أحس اذا فضفضت عادي من ثاني اليوم القسم كله يرمس و الرياييل هناكي بيرمسون بعد، ×××××× ما عندي علاقات و لا خرابيط البنات اللي أسمعها و أشوفها بعيني، أطبخ في الاجازات أصلا تعلمنا الطبخ من عمر 15 و برعنا فيه و أنظف حجرتي بروحي، و أغسل ملابسي و أكويهم بروحي، بس هب عارفة ليش جيه نصيبي، خاطري أعرس عشان أسكر حلوج البنات اللي معاي بالدوام، وين ما أسير قالولي بعدج ما عرستي؟؟ ليش مب معرسة ليومج… لو أني جيكرة ما حد قاللي هالكلام، بس لأني حلوة و متفوقة و الناس حاسة بالنقص مني، مب عارفين بشو يغثوني، جابوا طاري العرس… مع اني بنت متعلمة و لازم يكون تفكيري متفتح، بس مب عارفة ليش أفكر بهالاسلوب.. ليش مب مقتنعة بالنصيب…

أدري أني أحسن عن غيري بوايد.. و الحمد الله على كل حال… بس خاطري أعرس…

و السموحة خواتي على عدم التركيز في الكتابة، و عدم ترتيب الافكار، لأن ذهني مشتت… و ادعولي في هالايام المباركة، و أتقبل تعليقاتكم بصدر رحب.. و السموحة مرة ثانية

لاتعذبين نفسج بالتفكير حلو انج تقضين اوقاتج بممارسة بعض الانشطة
حبوية ليش ماتجتمعين ويا خواتج وتكلمين امج بهالموضوع خلاص انتي كبرتي وكيف تفكر امج حق اخوج وماتفكر عنكم
وين ابوج؟
غناتي فاتحي امج فالموضوع وبعدين في دار الخطابة لو بتقدمين فيه طلبج ومواصفات شريك حياتج ها احد الحلول طبعا اذا كنتي مقتنعة بفكرة الزواج من عند الخطاابة ..
شوفي حبيبتي الزواج مب حرام بس اللي انتي قاعدة تسويه كل يوم حرااام
وبعدين لايهمج انا بكون ربيعتج واختج وتقدرين تبثين لي مشاعرج واذا احتجتي شي لاتترددين
ربي يحفظج ويرزقج بولد الحلال اللي يغنيج ويكفيج عن الحرااام

وهالله هالله بالاستغفار وصلاة التهجد

و الله يرزقج ان شاء الله..

انا ما بوافقج على كل الى تقولينه لانج اصلا عارفه الغلط من الصح من كلامج وما اضن انى اقدر اغير قناعاتج بكلامى بس عندى سؤال اذا امج اقطعت الاهل ليش انتى ما توصلين الى اقطعته امج يعنى يوم الاعراس سيرى وسلمى ويوم العزا عزى بدايه بيستغربون بس مع مرور الايام بيتعودون على وجودج .

من جهه ثانيه ترا الرزق يتاخد مرات بكثرة الذنوب يا اختى وممكن هذا الشي اشرة لج من رب العالمين علشان تقيسين مدى قربج له وصراحه من كلامج احسج ما شاء الله انسانه مميزه بس اكيد فيه شي ناقص انتى دوريه وبتعرفين نحن يستحيل نعرفه لانه مو وياج معنه باين وضاهر في كلامج .

وعندج اشياء وايد تخلى رب العالمين يبارك لج ويعجل لج بخير الزواج والستر بس اخلصى النيه لوجه الله ومنها

– الصدقه .
– كفالة الايتام .

واختى الناس طول عمرها ترمس وهذه مقوله قريتها لوحده من الخوات يزاها الله خير

" الى عرست يقولون عنها متى تحكلين واذا احملت متى بتربين واذا ربت متى بتيبين الثانى"

واذا اطلقت ليش تطلقتى واذا ما عرستى عنستى والناس طول عمرها ترمس ونحن منهم وما نخرج عن نطاقهم فيا اختى واوزنى حياتج على الصح والطاعه واعرفى كل ما عفيت نفسج حبج الله وقربج وعطاج من خيره والدمعه لو انزلت عن تعب ومعانه كانت قريبه من الله .

ما اعرف شو اقول بعد فالله ييسر لج امرج ويبعدج عن الحرام واخر شي نصيحه منى لج لوجه الله دوم قولى هذا الدعاء اللهم اغننى بحلالك عن حرامك وبطاعتج عن معصيتك .

اذا تبين العرس

لاتعصين الي بيده الارزااق

خلي عنج هالعادة السرية لوجه الله و باذن واحد احد راح يعوضح بالي احسن من العادة بالزوج الصااااالح

في كلام وااااايد خااطري اقووله لج ,,, بس المجال مايوسعني

اذا حاابة راسليني ع الخاااص

الله ايسر امرج يااارب