مساء الخير والنور والسرور …
انا متابعة قديمــــة لهذا المنتدى لمواضيعكم وافكاركم واتعلم واستفيـــد من خبراتكم وتجاربكم الحياتيهـ العملية والعلميــة …
نحن الحمدلله الله اختارنا نولد ونحن مسلمين ونعيش مسلمين …وتعلمنا العبادات والطاعات …مثل الصلاه والصوم وغيرها من العبادات الي تقربنا من الله …
يمكن البعض يعظم عبادة عن عبادة ثانيه مثلا يصلي ويصوم دايم …بس مقصر في عبادات ثانيه مثل الصدقه والزكاة والعمره والحج ..فعلا في ناس عندهم خير لكــن سبحان الله مايفكرون يكملون فرضهم مثلا الحج والزكاءة ..
انا حبيــت اكلمكم عن الصدقـــه الي البعض مقصر فيها …وانا متأكدة انه هل الفئه قليله جدا …لأنه الحمدلله شعبنا من اكثر الشعوب والدول الي تتبرع للدول الثانيه في ازماتها …
ابا اخبركم عن مواقف الصدقه ويايه وانتو بعد كل وحده تكتب لنا اثر الصدقه على حياتها …
يمكــن الي تكون مقصره تبدأ تعيد حساباتها وتخرج لو مبلغ من مصروفها شهريا تتصدق به للناس المتعففين …
انا هل الشهر وايد اعاني من سالفه انه وايد امور تخترب عندي ..واايد بشكل ما تتصورون ..يعني مول راتبي يالله يكفي لين اخر الشهر عشان البترول والامور الضروريه …بس فعلا انا صرف هل الشهر كله تصليحات ماشتريت شي لنفسي يمكن بس عباتين فصلت ..وباقي راتبي حق التصليحات …ابا اجمع مبلغ ما اقدر …
المهم انا مسويه نظام الظروف قلت بجرب هل النظام …وبحط مبلغ في ظرف يكون للحج سواء رحت السنه او لا مع انه محد معزم بس مؤمنه اذا الله كاتب لي بسير لو مارحت بعد في خير لي …المهم امس صارت في عائلتنا من بعيد ضروف …رحت فتحت خزاتني وكنت بس بطلع مبلغ حق البترول ..شفت ظرف الحج …وطلعت منه مبلغ …بالعادة انا هل الظرف كل ما اطلع منه مبلغ احس بغصه لاني اكون ساعات مجبوره ومحتاجه …فأمس طلعت مبلغ 1000 درهم صدقه لوحدة كبيره في السن من اهلنا من بعيد خليت الوالدة تعطيها لاني استحي…
واليوم اخر الدوام يتني وحدة …ضحكتني قالت لي عندي لج رساله حب ههه من شخص حلو …
وانا مستغربه منها اصلا هي مب عربيه وتسولف كانت …جان تعطيني ظرف من جهه مكان كنت اتعامل وياهم وكنت ادرب لهم بنات …والظرف فيه شيك ..بنفس المبلغ الي طلعته من ظرفي ….وانا منصدمه لانه هل الجهه طرشو لي من زمان رسايل شكر وشهادة …ما توقعت يطرشون لي شيك …
صدق الصدقه عبادة مهمه وسبحان الله رايد لي ارجع المبلغ في الظرف مره ثانيه …
خبروني عن مواقفكم …انا مرت عليه مواقف وايد بس الي ذكرته جريب مستوي لي …
ودايما شجعو ازواجكم وعيالكم وعودوهم على هل الشي 
لها ثأتير كبير لمن يجربها وتجعلك البركة في كل شيء يكفي انها تحفظ لنا كل عزيزعلينا بأذن الله
مشكورة الغاليه على الطرح الاكثر من رائع
اممممم انا الحمدلله أتصدق بين فترة والثانية بس ما اذكر ان صار معاي شي
لكن الخير ياي ان شاء الله
واذا صار معاي شي بسدحه
هل رسآيل الموبآيل اللي يقولون طرشوآ مسج على رقم معين ويآخذون منه مبلغ معين
هل يعتبر صددقة ؟؟؟؟
سبحان الله، يزاج الله خير عالموضوع
صدق امس طلعت مبلغ زهيد جداً
واليوم حصلنا اضعافه والله
مشكورة اختي على طرح الموضوع المهم، فعلاً الصدقة فيها بركة و الحمدلله انا احاول قدر الإمكان يومياً أتصدق لو بدرهم واحد
و سبحان الله دايماً يوم أكون على حافة التفليس آجوف الفلوس تيني مادري من وين ههههه سبحان الله و أقول الله ما ينسى عبده
و أهم شي الصدقة الجارية بصراحة هاللي اتم للواحد حتى عقب موته