شحالكن حبيباتي ..اتمنى الكل يكون بصحه وعافيه
اول مره اكتب في هالقسم لانه البنات شجعوني بردودهن الطيبه لبعض المشاكل وعلى قولتهم اللي يشوف مصايب غيره تهون عليه مصيبته والحمدالله على كل حال ..
انا باختصار الحمدالله صار لي فتره احاول اصلح من نفسي واتقرب لربي اكثر واكثر والله يتقبل مني ان شاء الله
القصه ان الخطاطيب وقفوا من فتره عن القدوم لي وانا عمري الحين 28 سنه يمكن في كثير منكن بيقولن انتي اصغر عن غيرج بس في كل الحالات المجتمع ما يرحم صغير او كبير بالرمسه والتنغيزات وانه لي اصغر عرسن وغيره وكل هالكلام مافكرت فيه..تميت دايما ادعي ربي انه الله يرزقني الزوج الصالح ان شاء الله والحمدالله الله استجاب لدعائي وانخطبت من 2 مب واحد وكلهم ونعم وعيال عرب واخلاق حميده وشغل زين واهل طيبين وملتزمين بس انا ماعرف شو فيني هل هو احساس طبيعي والا انا فيني شي …كل ماحد يتقدم لي اقول مابا اعرس احس بشي يقبض قلبي مع اني اصلي استخاره وادعي واستغفر ربي بس ماعرف ليش هالشي يصيبني ..
فرحانه لان الشخص لي يالسين نسأل عنه خلوق وفيه الموصفات لي كل وحده تتمناها وانا مب من النوع لي اتشرط لو ما عنده فلوس راضيه بس يكون ملتزم ويخاف ربه اهم شي …
بس يوم يرمسوني عنه ويقولون لي يالله يالله بسج انتي كبرتي ومب كل يوم حد بييج ونبا نفرح وغيره قلبي ينقبض ومابا اعرس لدرجة اني انخش في غرفتي اصيح وماعرف شو اقول..
اباكم تنصحوني بحكم تجاربكن خاصه المخطوبات والمالجات والمتزوجات ..هل الشي طبيعي خوف من الحياه اليديده او فيني شي ؟!!
لأنج بتنتقلين لحياتج اليديدة ربي يوفقج يارب ويجمعكم على خير
لان اغلب البنات عقب الزواج يصيحون لانهم انتزعوا من الحياه الي اتعودو عليها
انتي يمكن هالشعور اييج قبل الزواج
انانفس الحالة
لا تتحسـسين منه لانج بدشين حياه يديده
فلازم بتحسين بها الاحسااس
انا شراتج كل ما حد يا يخطبني اركض الحجره واصييييييح ,,
ههههههه ,, ربي يوفقج وايييسر لج امورج
فرحيـنا يا اختي ^_^
قبل لا اعرس
كل ما حد يخطب ارفض من دون ساابق تفكير
بس عقب اختي الكبيره مت تنصحني
قالتلي صلي الاستخااره وشوفي
ربج وين كتب نصيج
ونفس اليوم صليت الاستخاره
وحلمت ان الريال يقول يوم الاحد بيي اخطب
ويوم قمت من النوم حسيت براحه
وعرفت ان هذا هو نصيبي وتم كل شي الحمدالله والشكر