جيتكم وأنا كلي أمل ألاقي حل لمشكلتي
من وأنا صغيره
كان حلمي أصير دكتوره ..
أساعد الناس وأعالجهم …
أشوف غيري يتألم وأداويه بيديني ..
طفل(ن) يصيح .. وأم(ن) تنوح .. وشايب يحتاج عون وأمان
كنت أبا أمسح دمعة الطفل
وأواسي الأم الحنون
وأطمن الشايب وأداريه
وأحطهم ع العين والراس
لكن مشكلتي ( مع أهلي )
عمرهم ما شجعوني على شي !!
كل ما كنت أبوح لهم بأحلامي .. يقتلوها !!!
أنتي منو قالج بنخليج كذا … وأنتي منو قالج بنخليج تكملين دراسه
وأنتي .. وأنتي
مو عشان المجال يحرموني ….
لآ …
هم ما يبون البنت تشتغل وإلا أنها تكمل دراستها
يبون البنت تاخذ ثانويه وتقعد فالبيت تتريا نصيبها
أحبطوني ..
دمروووني …
كنت أصيح الليل وأون .. محد لي سامع …
كل ما أدرس وأشد حيلي … أقول فخاطري .. ليش أدرس دام إني واثقه بأني راح أكمل ثانويتي بس
وبقعد فالبيت !!
رغم كل الإحباط والحزن اللي عشته وعانيته …
ما استسلمت ..
عشت أبني أحلامي بروحي .. أبني طموحاتي بروحي …
أنا البنت الوحيده بين 9 أولاد ..
لا أخت (ن) أشاركها همومي ولا مراهقتي ..
إلين ما تخرجت
وخذت نسبه حلوه …
استانست وايد عليها … بس بنفس اللحظه
عورني قلبي .. يوم أفكر بربيعاتي اللي بيكملون دراستهم العليا …
وأنا بقعد في البيت لا شغله ولا مشغله …
لكن أعمامي أجبروا أهلي بأني أكمل دراستي …
ودخلوني الجامعه ودرست الطب
وكانت أول سنه لي في الجامعه …
وأهلي كانوا مو موافقين …
كنت محتاجه لأي إنسان يواسيني
يعطيني معنويات .. يشجعني للأحسن
بس لا من مجيب ..
كل ما كنت أرد من الجامعه
يعاملوني بقسوه بالبيت !!
ما يخلوني أدرس ع راحتي
كانوا يحاولون يطفشوني من الدراسه
عشان أقعد في البيت
لكني وقفت بويوهم .. وصمدت
دراستي كان شغلي الشاغل
إلين ما يا اليوم اللي تعرفت فيه على إنسان
بادلني العطف .. وساندني وساعدني وايد في أول سنه لي في الجامعه
تعارفنا كان في أحد الإجتماعات …
شاب طموح يطمح إلى التفوق ..
بس فالبدايه .. مب أنا اللي أعجبت فيه
هو اللي أعجب فيني ..
وأنا والحمدلله .. إنسانه أصلي وأصوم ومحتشمه ..
وكل اللي يعرفوني يذكروني بخير …
كانت ربيعتي يالسه حذالي .. تقولي فلانه .. شوفي فلان من ساعه وهو يتأمل فيج
قلت لها شو أبا فيه .. خلينا بالمحاضره .. هاييل ناس فاضيين
وخلصت المحاضره ويوم ظهرنا
صادفته برع قاعة الإجتماعات اللي كنا رايحين لها
يا صوبي وسلم .. وأنا ما رديت عليه السلام ><
عطيته ظهري وشردت ..
لكنه تبعني وتم يزقرني يقولي يا أختي لحظه
وأنا ما عطيته أي إهتمام
ورحت عنه بعيد ..
لكنه شاف ربيعتي اللي عندي
وقالها يا أختي بغيتج بطلب ممكن ..
قالت له آمر أخويه .. قال لها البنت اللي كانت معاج
كنت أبا أقول لها شي بس هي فهمتني غلط وراحت
وربيعتي مستغربه !!!
قال لها لو ما عليج أمر … عطيها إيميلي .. وعطاها الإيميل
ويت ربيعتي وخبرتني بالسالفه ..
وأنا ما رضيت آخذ إيميله
بس ربيعتي قالت لي شوفي شو يبا منج عقب احذفيه
يومين عقب ضفته وكان موجود
سلم ورديت عليه السلام
قالي أنتي فلانه قلت له إي نعم أنا فلانه شو تريد مني
قالي أنا مابي منج شي بس اللي أباه رقم أبوج !!!!!!!!
قلت له أبوي !! قالي هيه نعم أبوج …
قلت له لا أنا أعرفك ولا أنت تعرفني تبى رقم أبويه بعد
قالي أنا لو كنت أعرفج ما بطلب رقم أبوج
إلا بييكم البيت …
قلت له شو تبا من أبوي
قالي بالحرف الواحد
دشيتي خاطري .. وبيي بتقدم لج بالحلال …
تخيلو عاد لو كنتوا مكاني شو بتسوون .. !!
قلت له أنا ما يخصني فيك
ومابا أشوف أي شي منك مره ثانيه وحذفته
وتميت أسبوع وأنا متبهدله أفكر باللي قاله !!
وشكيت لربيعتي وقالت لي حرام عليج
ع الأقل اختبري معدنه … وهو من البدايه يبا رقم أبوج ..
يعني نيته صافيه ..
قلت لها لا تفري مخي .. أنا مو ناقصه
وأهلي أدري لو دق عليهم بيذبحوني …
تفكيرهم محدود وماراح يتفهمون شي
وطنشت الموضوع ….
وعقب كنت أدردش ويا قروب عن الدراسه
والبحوث والتقارير
طلبت منهم شغله … و واحد قالي أنا بقصر معاج
وفعلا .. طرش لي بحوث وتقارير وساعدني وايد في ثاني سنه ..
تخيلوا .. مع الأيام زادت علاقتي فيه .. 3 شهور ونحن مع بعض
لأنه ما قصر معاي بشي ولا مره شفت منه شي لا أخلاقي
كنا مجرد زملاء لا أكثر ع المسن
وصدفه .. فالأخير اكتشفت أنه نفس الشخص اللي قابلته قبل ..
هو نفسه .. وأنا ما ركزت ع إيميله !!!!!
فاتحني بالموضوع مره ثانيه … وقالي أنا صبرت عليج عل وعسى ترضين فيني
لأني حسيت بأنج أنتي البنت اللي أنا أباها … واللي زاد تعلقي فيج … رفضج وصدج
فياليت ما تحطميني هالمره بعد …
وأنا من هناك دموعي أربع أربع
لأني أعرف أهلي زين ..
ما راح يوافقون ..
وصارحته بكل شي .. قالي أنا بحاول وما بخسر شي
وفالأخير .. قررت أعطيه رقم أبوي ..
و تخيلوا .. أبوه دق على أبوي .. وأبوي خبر أمي
وأمي جن جنونها
وراح تفكيرها لبعيد
وقالت كيف عرفج وكيف وكيف وكيييييييف ؟
لدرجة أنها مدت إيدها وضربتني ضرب من الخاطر
وأنا حاولت أفهما …. بس من دون فايده
ودخلت عمامي فالموضوع … وحاولوا يفهمونهم بس من دون فايده
ومن هالسالفه ( انتهزوا الفرصه وطلعوا سبب عشان يظهروني من الجامعه )
ويلسوني فالبيت
مرت سنتين وأنا يالسه فالبيت لا شغله ولا مشغله
والولد اللي عرفته … ما عرفت عنه شي من بعدها
كنت أبكي من الخاطر
لأن أمي احتقرتني وايد
وكانت تسوي أي شي عسب تظهر لي سبب تضاربني عليه
وشلت عني لابي وفوني … حتى الـ tv شلته عني …!!!!!
من غير السب والشتم والضرب اللي كنت ألاقيه من صوبها ><
إلين ما يا ولد الحلال وتقدم لي .. و وافقوا أهلي عليه لأن ما عليه أي كلام
وتمت الخطوبه والملجه في يومين …
لكني للحين ما ارتحت
كنت أعتقد هالشي بيغير مجرى حياتي 180 درجه …
بس تدخلات أمي واستفزازاتها ما انتهت …
لليوم هذا وهي تعاملني بهالأسلوب ..
وتقولي دوم … لا تظنين بأنج تزوجتي راح اخليج ..
أنتي أصلا ما تسوين فلس .. وأنتي وأنتي …
وليومكم تضربني …
بس أنا صابره ومتحمله …
شكيت لريلي
فالبدايه تعاطف معاي
بس الحين
قالي أنا ما يخصني فمشاكلج ويا اهلج
حليها بروحج
تخيلواااا !!!!!!
هذا ريلي اللي مالي غيره الحين يقول لي هالرمسه
صار ما يساندني مثل قبل !!!
وأنا تعبت الصراحه
لا لقيتها من أهل ولا لقيتها من ريل !!!
وأنا بعدني في فترة الملجه وعرسي بيكون فشهر 9
انصحوني …
شو أسوي ..
وين أروووح
عند امنو أرتااااااااح ؟
ما صار عندي غير رب العالمين اللي ألجأ له كل حين
بس ييوم بعد يوم أنضغط أكثرررررر
أبا الحل دخيلكم
مستقبلي الدراسي ضاع
ومستقبلي مع ريلي بيضيع
وأمي صارت تتدخل بحياتي للحين
لا وتقول … ما بتروحين عند ريلج عقب
مع العلم أنه يداوم في دبي طول الأسبوع
وفي الويك إند ينزل ..
شسوي ..؟؟؟
دخيلكم انصحوني ؟
الله يعينج يارب ويصبرج
ومن اهتدى بك فلن يضل،
ومن استكثر بك فلن يقل،
ومن استقوى بك فلن يضعف،
ومن استغنى بك فلن يفتقر،
ومن استنصر بك فلن يخذل،
ومن استعان بك فلن يغلب،
ومن توكل عليك فلن يخيب،
ومن جعلك ملاذه فلن يضيع،
ومن اعتصم بك فقد هدى إلى صراط مستقيم،
اللهم فكن لنا وليا ونصيرا، وكن لنا معينا ومجيرا، إنك كنت بنا بصيرا
اللهم صل و سلم و بارك علي سيدنا محمد و علي آله
و صحبه و سلم و الحمد لله رب العالمين
واسمحيلي ما قدرت افيدج بشي
ادعي من قلبي ربي ايسر امرج يارب وايفرج همج أختي
لـآ حول ولـآ قوة آلـآ بآللهـ
عورتي قلبي
آلله يحنن قلب أمج عليج ..
وآلله يهدي ريلج ان شآءآلله
مآ آعرف شقولج
آدعي ربج فديتج