أولا الله يبلغنا شهر رمضان لا فاقدين و لا مفقودين .. و يعيننا على صيامه و قيامه ^^
أخواتي و أمهاتي الحبيبات .. كلنا نعرف ان شهر رمضان هو شهر الرحمه و الصيام و العبادات.. و طبعا ما ننكر ان الطبخ و مجابل الأكل له نصيب كبير .. و ياما زاد علينا الأكل و انعق ف الزباله و انتو بكرامه …
و كلنا نعرف ان هالشي حرام .. بس مرات الواحد يغفل او يحس ان اللي انعق شويه أو طعمه مب حلو مثلا ف نقول حرام محد بياكله مب حلو طعمه .. لا الحرام انه ينعق و هي نعمة الله .. اذا ع الطعم بيحطون عليه دقوس او ليمون او سكر حسب الاكل و بينأكل.. غير ان الاذواق تختلف ممكن اللي انا اشوفه لذيذ تشوفينه عادي .. و العكس ..
صحيح الانسان ممكن ايي ع باله اكله معينه و خصوصا ان شهر رمضان الكريم له جو خاص حتى في المأكولات اللي ناكلها فيه .. ف عادي بنسوي الاكله اللي نباها و بناكل اللي نشتهيه و لكن ((باعـتدآآآآآآآآآآآآل )) و هذا هو المطلوب ..
أنا بعطيكن الخطوات اللي نقدر نحافظ بها قد ما نقدر ع النعمه و ما نسرف ..
1_ نحدد احنا شو بنطبخ و ع القد يعني لا تسوون زياده .. حتى الاكل اللي يتخزن شي منه ننساه و ما نذكره الا يوم يخترب للأسف و يكون غير صالح للأكل ..
2_ نحسب المقادير و ما نسوي اكثر من اللازم .. و حطوا في بالكم انكم بتسوون كم طبق ف لو عدد العايله مثلا 4 اشخاص ما بسوي من كل طبق _ اكله _ كمية 4 اشخاص لأنهم بينوعون ف الاكل و ممكن ما ياكلون كل الموجود ( لو كان عدد الاطباق وايد ) ..
3_ اذا زاد علينا الأكل .. نطرشه لأي من المساكين اللي حوالينا .. او اصحاب المحلات التجاريه ( راعي الدكان – الدوبي – المغسله – المكتبه ……. ) .. منها ما ينعق الاكل و منها نكسب اجر ان شاء الله ..
4_ حبيت اذكر شي .. في عاده نحن نشتهر بها الا و هي تبادل الاطباق بين الجيران !! اشوفها شوي شوي تندثر !! حتى لو جيرانكم ما تعرفونهم انتو ابدوا بهالشي و طرشوا لهم صدقوني بيستانسون و بيكون في ألفه امبينكم ^^
حبيباتي .. أدري ان الكل يعرف بأهمية عدم الاسراف بس حبيت اذكر نفسي و أذكركم علشان ربي يبارك لنا ف النعمه .. و ما ننسى ان الأولى اننا نستغل الوقت ف العبادات .. و حتى لو كنا ف المطبخ و مشغولين نحاول نذكر الله و نرطب ألسنتنا بذكر الله ..
ف النهايه عندي طلب صغيرووون .. اللي تقدر انها تنشر هالحمله ف الفيسبوك و تويتر و البلاك بيري يكون شي طيب و ربي يجزيها كل خير ..
تقبلوا فائق احترامي ..
أختكم .. حرمه يديده ..
سبحان الله وبحمده … سبحان الله العظيم
سبحان الله وبحمده … سبحان الله العظيم