بعد طووول محاولة قدرت اسجل عندكم فالمنتدى من زمان عايبني وصدق حبيت هالقسم خاصة فية ترابط ومساعده جذبتني له قلت مالي غير هالمنتدى افضفض له واطلع المكتوم
اتمنى من قلبي احصل لي مكان وأخوات بينكن واحصل اللي يسمعني بلا مقابل يرشدني ولو بدعوة
انا اختكم فيني اعاقه حركية من الصغر من يوم كان عمري 13 سنه ايلس على كرسي متحرك بس مو هالمشكله انا الحمدلله راضيه واحب وضعي ومتأقلمه وااايد بفضل من الله
طلعوني اهلي امي وابوي من المدرسه بعد ماكملت الصف السادس بسبب اعاقتي لانه كانوا يتعبون بتوصيلي وإلخ وانا وافقت اوقف الدراسه لاني وقتها كنت ياهل ما اعرف مصلحتي
بعدما طلعت من المدرسه قعدت فالبيت سنين طويله كنت ادرس عيال الجيران الصغاريه
ندخل في صلب الموضوع ابوي طول هذيج السنين ما فكر يشتري لي حتى كتاب يثقفني ولامجلة تسليني انا ابوي عنده حرمه ثانية وبنات منها كلهن اصغر مني وانا الكبيره من بين بنات ابوي مرت السنين وكبروا بنات ابوي وكبرت انا بعد بس لحظة انا كبرت بالعمر لكن بتعامل ابوي معاي ماكبرت ولا تغير شي
الوضع من عمري 13 لين 20 سنه هو نفس المعامله لا جديد فيها يعني مالي كلمه لا يعتمد ولايثق فيني مايخبرني عنه اي شي مثل ترقياته اوغيره مايناقشني بشي جدي ابد كل هذا وما اهتميت كنت احس بميوله لبنته اللي من الحرمه الثانيه ومرت السنين وصار عمري 21 قلت بثبت اني كبرت وتغيرت شغلت موهبتي وجذبت الاعلام كله لي وماتغير ولا افتخر فيني ولاكني سويت شي مرت سنه وكبرت وصار عمري22 واللي كبروا عرسوا وخلفوا قلت بسعى وبدور وظيفه عشان احسسه اني انتقلت لوضع جديد مثل اللي بعمري وبخليه يحترمني بفضل الله توظفت ولا بين فيه تغير واحين عمري صار23 واختي من الحرمه الثانيه 17 يعاملها على اساس انا الكبيره والعاقله ويثق فيها ويعتمد عليها ويوعدها قدامنا انه بيسوي لها كل شي وبيعلمها كل شي واللي يقهر دايما يردد قدام خواتي الصغار بان اختك فلانه هي الكبيره تخيلوا الاطفال يردوا عليه ويقولون له لا فلانه الكبيره اللي هي انا احس وقتها اني بقتله من الحرقه وسمعوا بعد مره كنا قاعدين نحن الثلاثه انا وابوي واختي ام 17سنه جان يقول لها انتي الكبيره لازم تسوي وتسوي ببراءه ردت قالت له لا فلانه الكبيره يعني انا رد عليها قدامي لا فلانه اخس عن الياهل ماتقدر تسوي شي قصد مثل الياهل بقوة جسمه وتم يضرب لها امثال ويقارنها فيني انا وقتها ما رديت عليه سويت روحي مش مهتمه عشان مايكمل وتركتهم وسرت عنهم , غيرعقل اختي الصغيره مره كنت معاها وبعفويه قالت لي انا ما أحس انج مثل اللي بعرج وسكتت حاولت ارد اناقشها بالموضوع حسيت بإحراجها ماطاعت تكمل هذا من اللي زرعه بعقلها
والله صارت مواقف كثيره من الاب العزيز وكلمات كبيره بس مرات ما أسكت ارد الكلمه بعشر من بين الكلمات مره يت له حاله تم شهر كامل يحط علي مثلاً متى بتموتي نحن بنجهز لج كفن عسى تموتي وترتاحي ويوم آكل غدى ولا عشا يقول فقرتينا الاكل فبطنج خساره كل هذا يقوله كأنه يمزح ومره تبادلنا الجدال فقالي من خاطره وبشماته وقهر بالويه انتي "معاقه" وكررها مرتين من يومها وانا حالفه ارد الكلمه بالدعاء عليه العمر كله فيه اب يشمت ببنته وانا طول عمري اتمنى يفتخر بكل اللي اسويه توظف وعطيته آلاف الدراهم اللي وهو طول عمره يستخصر فيني الفلس ولا تغير شريت سيارة من الوكاله وقلت يمكن تصير لي شوية هيبه عنده ولافاد واخر موقف صار قريب سرت افصل لي عباية ولاني قاعده على كرسي متحرك ماقدرت ادخل المحل بسبب الدرج وقفت جدام باب المحل على الشارع العام والبياع يراويني موديلات عشان انقي فجأه وصل ابوي الغالي وقالي بسخريه بالحرف الواحد واقفه عند الباب جنج كلب انتي مايبين فيج اللبس مفروض عبايه وحده تكفيج العمر كله كالعاده طنشت لكن بداخلي ودي احرقه حراق لا وبعد كل ما نركب السياره ونشوف بالصدفة ريال معاق فالشارع يقولي شو رياج نزوجج إياه , والله المواقف اكثر من ماتتصورون والكلام اللي يعايرني فيه كبيره احس عمري وصلت لمرحله اكبر من الكره ودي يصير فيه اخس عن وضعي جزاء على كل كلامه واستهزائه فيني قبل كنت عطوفه وقلبي رحيم بس الحين لا قلبي مليان حقد حقد واتمنى ربي ياخذ بحقي
والله دايماً اتمنى لو كان عندي اب يقدرني ياما ناس وشباب بصحتهم وقوتهم ماقدروا يسوون اللي انا سويته طبعاً بفضل الله وحده
ان شالله لي العوده بالمزيد من أحداث حياتي ومثل مافيه جانب مظلم بحياتي في ايضاً جانب مشرق وناجح رح اتطرق له في بقيت سردي في مواضيع جديده انتظروني…
لي عودة إذا الله أراد
اوك عسسوله لا تحرقين اعصابج ولا شي ترى الدنيا ما تسوى و عيشي حياتج اشغلي عمرج بأمور ثانيه خلي الثقه تكون مزروعه فييج…
وربي يوفقج إن شاء الله
و ييسر أمورج عسسوله
آلله يعطيج العافيه حبيبتـي ..
الله فوق ويمهل ولايهمـمل ^_^