الي يبي يسافر الكويت حياه الله ….
انا اشوف وايد بنات يكتبون مواضيع انه بيسافرون الكويت ويبون مساعده …
انا هني موجوده من اكويت ومستعده على الرد لأي استفسار
يعني الي عندها اي استفسار عن الكويت حياها الله 
وانا موجوده وتقدرون تسألوني اي شي تبونه
وحياكم الله
ماقصرتي
وين الاماكن او محلات تبيع القطع المميزة
حبيبتي حق القطع المميزه في محلات حق مصممات كويتيات ويكون بس في الكويت والتصميم يكون بس قطعه قطعه بس غالي شوي …. وفي كذا محل بس يكونون داخل المناطق السكنيه ومو معروفه بس حق الكويتيين الي في الديره ، وفي عندج بعضهم يشاركون بمعارض ويعرضون ازيائهم عشان يشتهرون واهم هالمعارض هو معرض افكاري ومعرض بيت ديبا ومعرض العديليه وهو عباره عن سرداب بيت وحده كويتيه تسوي معارض بالمناسبات ، وفي عندج محل بمنطقة الروضة وهو عباره عن محل وحده كويتيه تييب بضاعه من فرنسا وايطاليا وشوي من بيروت وتعرضهم في المحل وطبعا قطع متميزه ومن كل قطعه بس شكل واحد او اثنين …
وفي محلات تجاريه عندهم نفس الشي وهم الأسطوره (من كل موديل قطعه)
عندج مجمع الصالحيه ، عندهم فوق محل مارينا رينالدي اهوا محل للمقاسات الكبيره تابعه لماكس مارا
عندج في الطابق الثالث في مجمع الصالحيه محل اسمه ديزاينر لاونتش هذا محل غالي بس تلقين فيه قمصان وبلايز وبدلات غريبه عجيبه
ومجمع زهره ومجمع سنترال بلازا الي في السالميه ومجمع الرايه همه الي فيهم القطع المميزه والغريبه …
بس انا كتبتلج اماكن القطع المميزه الغاليه والفريده (لان فهمت قصدج جذي) وفي طبعا وايد اسواق للملابس العاديه
وحياج الله
اول شي مشكوره وايد على هالموضوع الحلو شراتج و ايد بتفيدينا يزاج الله كل خير الغاليه
بغيت اسأل عن الطقس ! لآنه اليوم وصلني انه عندكم البردي ! شوه هو البردي البرد ولا الثلج !!
بعد بغيت اعرف هل بيكون في معارض في هالتاريخيين
12 / 3 و 13 / 3
وين بلقى جلابيات راقيه و سعرها معقول واذا في مجال اشتري منهم بالجمله / بجايم نفس الشي / ثياب أطفال / بدل
الحلويات ،، انا سألت و قالوا لي عند الوطن هل هو صدق حلو ! و ينفع للهدايا الصوغه يعني ! و تقريبا شوه الأسعار بالدينار و الدرهم و وين موقعهم بالضبط !
وين بلقى اشياء فريده من نوعها و تنفع للهدايا و اسعارها معقوله شغلات تخص الكويت
و آخر سؤال ،، في القريه العالميه في القريه الكويتيه كان في محل ،، فيه ريال كبير و معاه بنات اخوه ،، كانوا يبيعون شغلات تراثيه بس حجمها جدا ً صغير اصغر من كف الإيد مثل الجدور و المواعين و القراقير اشياء جدا ً جميله بس كانت غاليه شوي لأنها هاند ميد وين بلقى مثلها عندكم ! و تقريبا ً شوه اسعارها !!
في انتظارج الغاليه
و مشكوره مقدما ً =)