استفسارات عن النفاس 2024.

السلام عليكم
خواتي انا في النفاس الحين ربيت بعملية قيصرية
ما بصوم رمضان بس متى اعرف اني خلصت الاربعين؟

وبالعادة تكملون 40 يوم ولا عادي نص المدة مثلا؟

وكملت أسبوع من ربيت الدم وايد خفييف عندي لون وردي وشي بسيط عادي هالشي؟
مب يالس ينزل لي شرات الدورة
دكتورتي تقول عادي بس انا احاتي واذا تميت جيه ماعرف متى بتطهر

و بخصوص الأكل والمشروبات شو الأشياء المفيدة اللي اتنظف الرحم واتزيد الحليب؟ بدون ما تأثر على العملية
احس أكلي خرابيط و الحين في رمضان ما بفتكر كأني صايمه وياهم لين قبل الفطور واخاف يقل عنها الحليب

بتطهرين يوم بيوقف الدوم تماما..
وماشي شي اسمه نص المده.. اقل شي 25 يوم.
حاولي تسوين كنترول عاى اكلج

ما شا الله
حمدا لله على سﻻمتج واخيرا ربيتي
مبارك المولود بس ما خبرتينا شو جبتي ؟
ربي يسهل امورج

بالنسبة للطهارة الأفضل تتصلين على خدمة الافتاء في الهيئة العامه للشؤون الاسلامية والاوقفاف في أبوظبي شي عندهم خدمه خاصة للأسئله النسائية وحريم اللي يردن عليج….

والأكل طبعا اشربي زعتر وزنيبيل والحبة الحمرا … وكثري من الحليب القليل الدسم لأنه فيه قيتامين دال مضاعف …. اشربي شوربة الهريس المطبوخ بالدياي الطازج واليريش لأن حب الهريس والجريش يسوون حليب فيج…. لا تاكلين الاكل اللي ينفخ البطن ويسوي غازات عشان ما يتأثر البيبي وتعوره معدته… والله يكون بعونج ويارب تقضين رمضان على خير إن شاءالله…