اشحالكم خواتي
وانا حادره هالقسم كنت ادور معلومات عن تركيا والصراحه شي عضوات ماقصرو بالمواضيع والاجابات على العضوات الاخريات
لكن عندي استفسار بسيط
اذا الله راد انا وريلي بنسافر يوم الجمعه تاريخ 25-11 وبتكون رحلتنا 4 ايام في بورصه و 3 في اسطنبول
استفساري هو :
– شو بيكون الجو بارد لا زين وكم درجه الحراره تقريبا .. وهل بيكون فيها ثلوج ..؟؟
– وابا اسامي الحدايق والملاهي الموجوده في المنطقتين او المناطق المجاره ..؟؟
– شو الاشياء اللي ممكن اشتريها للعيله واتكون اشياء تتميز فيها تركيا ..؟؟
– وشو الكللمات اللي مهم جدا اني اتعلمها وبستخدمها في السفره ..؟؟
واشكر لكم تعاونكم
بصراحة سافرت تركيا هالصيف و ابدا ما حبيتها شعبها وايد زفت و نصب و احتيال من الخاطر و الجو كان وايد حار و زحمة . .
بالتحديد رحت اسطنبول و بورصة و الاثنين ما حبيتهم !
موفقة 
الجو بيكون بااارد تحتاجين لبس غليظ وصوف وبوت
ما اتوقع في ثلوج بس مرات تكون عندهم موجات برد وينزل الثلج من وقت
اشيا ممكن تشترينها من تركيا
الحلويات معروفه فيها وانتي بعد جربي اكلهم حلو والريوق
والزيتون
القطنيات وايد في تركيا بجامات وجي قطنهم حلوو *
انا من اسبوعين تقريبا راجعة من تركيا وكانت مدة الرحلة 5 ايام تقريبا
الجو بارد جدا في اسطنبول وبورصة
انا سافرت ع اجازة عيد الاضحى فكانت اغلب الاسواق مسكرة
فاشتريت للبعض راحة الحلقوم وقهوة تركية وشال تركي .
بورصة سرناها مع قروب سياحي طلعنا من الصبح ورجعنا 11 ف الليل
الحمدلله محد اتعرض لنا ولا شفنا شي مب زين منهم .
بس كاسري وايد وياهم عند المشتريات .
الكلمة الوحيدة اللي حفظتها هي بيان يعني حرمة
وانصحج تزورين ايا صوفيا وايد حلو المكان ، وعقب كم كيلو مشي تلقين السوق المصري .
اسكني منطقة تقسيم حلوة ، وتحت الفنادق كله محلات ومطاعم وهناك ميدان التحرير وشارع الاستقلال كله محلات على اليمين واليسار .
خذي اسماء المناطق السياحية اللي تبين اتزورينها وكتبيها في ورقة عسب اتراوين التاكسي او الفندق في حالة ما يعرفون عربي او انجليزي .
وشعبها اسلوبهم حلو فعلا لغتهم ،،،وطريقة
كلامهم توحي بانهم ينازعون وبانهم دفشين!!!
بس وااايد دول تحسينهم يوم يتكلمون جيييه
اللي بيقصون عليج غااااالبا مب اتراك اصلين
انتبهي من العرب !!!!!
فكل مكان بيطلعون لج ويعرضون خدماتهم
هذيلا الحراميه
ونفس هالشي فكل مكان ،،،انا وين عرب مهاجرين
مااروح،،،
اما تركيااا فنانه الصراحه رحنالها 7ولا8مرات
بس ماشبعت منها
خاصه يوم تاخذون سيارة بروحكم وتحاوطون فيها
رووووعه الصراحه
لاتنسين السوق المسقف فبورصا ،،،،مرة خذيت منه
فوط مطرزة طرررر
واشغال الكروشيه بعد حلوة عندهم بس انا اشتريت
مفارش الطاولات من عند وحدة رحنالها البيت
فكل الاوقات تركيا حلوة
لفيت الدنيا بس حبي لتركيا غييير
وتمنياتي بالتوفيق
واجازة سعيدة