اشحالكم خواتي عساكم ابخير
عندي موضوع وايد متضايقه منه وان شاء الله ألقى له حل بمساعدتكم أو عالأقل اقتراحات
بالنسبة لنظام الثلاث فصول لطلبة المدارس
سابقاً يوم كان نظام فصلين
كنا في إجازة نصف السنة انسافر وإجازة الصيف انسافر .. واذا إجازة العيد صادف انها أسبوع بعد انسافر
يعني بالعربي ،، من انحصل إجازة أكثر عن 5 أيام لازم انسافر
الحين انا موظفة والحمدلله من أكثر من ثلاث سنين ونص .. وعندي فالبيت اخواني الشباب في الجامعة وصغاريه في المدارس ،، ويوم اتكون اجازتهم على طول انا اقدم اجازة من الدوام وانسافر
لكن الحين صار عندي مشكلة :
الحين والحمدلله هذا أول كورس لي ادرس ماجستير في جامعة الامارات ،، ونظام الجامعة بالنسبة للإجازات ما اتغير .. يعني بين الكورسين اجازة شهر اتكون من نص شهر واحد الى نص شهر اثنين تقريبا .. وفالصيف مع الجميع
الحين بنظام الثلاث فصول للمدارس .. في هالإجازة أسبوعين ،، اخر يوم خلصوا امتحان الصغاريه ،، رحنا العمره 5 ايام والحمدلله وطنشت يوم كلاس في الجامعة ،، ورجعنا .. مع انه اجازة المدارس اسبوعين ولو ما عندي جامعة كنا بنطول فالسفره او مخططين على دولة ثانية تستحق أسبوعين ..
الحين الصغاريه بسبتي فالبيت ما سافروا خخخخخخ لانه عندي جامعة
وبتي إجازة الفصل الثاني للمدارس بتكون من 24/3/2010 اخر يوم امتحان لمدة أسبوع .. يعني إجازة 10 أيام .. بابا يسألني وين تبون اتسافرون .. بس للاسف انا ما اقدر اسافر لأنه عندي جامعة ،، دوامي الوظيفي عادي يعطوني إجازة متى ما ابا والحمدلله ،، بس المشكلة الجامعة اتعرفون صعب التغييب عنها ..
فبسببي ما بيسافرون في إجازتهم في شهر 3
عقب انا بخلص السمستر الأول هذا وبتبدأ إجازتي من 13/1/2010 لمدة شهر .. لكن الصغاريه عيال المدارس اخواني بيكونون مداومين في المدرسة .. يعني انا بقعد فالبيت عسبتهم شهر ولا بسافر
شو هالحاله والله قرف
بتقولون لي إجازة الصيف .. والله إجازة الصيف ضيقه .. يكون عند اهلنا عرس ولازم نحضره ورمضان قاعد يتجدم وما انروم انسافر في رمضان وغير جي في دول مب حلو انسافر لها في الصيف وحلاتها في الشتا اللي هو شهر 1
أخواني الشباب فالجامعة بعد لكن هم عادي لو ما سافروا ويانا .. بس انا وبابا وماما وثلاث صغاريه مربوطين مع بعض .. وانا دراستي للماستر يت في هالفترة وبتم لمدة سنتين باذن الله تعالى ..
الصراحه Not fare
تقريباً كل بيت فيه عيال مدارس وعيال جامعات .. يعني اذا الاجازة مب مع بعض كيف الناس اترتب لإجازاتها ؟؟!!!!!
انا وايد حزينه ومضايقه .. واذا استمر الوضع على هالنظام مع نظام ثلاث فصول للمدارس .. انا بنقهر الصراحه
لمنو ممكن نشتكي ولمنو ممكن انقول هالكلام ؟؟؟؟؟؟؟؟؟؟؟؟؟؟؟
ما نبا نظام ثلاث فصول للمدارس والجامعات نظام فصلين
ياخي وحدوا الإجازات بلا انظمة مالها معنى
الجامعة صعب جداً اتغير نظامها .. المفروض المدارس اترد على نظام فصلين
وبعدين مب كل المدارس مطبق عليها نظام ثلاث فصول اللي سووه .. في مدارس بعدهم عالنظام الجديم .. يعني اللي عندهم عيال في مدارس مختلفة .. بعد يتلعوز ..
شو رايكم في كلامي وهل في حد يواجه هالمشكلة ؟!!
انا الحين خربت على الصغاريه سفرة هالاسبوعين .. وبعد سفرة شهر 3 أسبوع ما بيسافرون والسبه انا ..
والحل يعني ؟!!
وايد ناس متلعوزة بسبت اوقات الاجازات
موفقة في الماستر
خاطري اكمل ماستر
بسألج كيف قبلوج ؟ وكيف سجلتي؟
الوضيحي ،، هيه والله متلعوزين .. والله يسلمج وعقبالج اتكملين دراسه ان شاء الله
قدمت لهم كل الأوراق المطلوبة وقبلوني والحمدلله ،، يعني مثل ما اتعرفين يبون شهادة البكالريوس + IELTS او Tofel + معدل الـGPA يكون 2.5 وأعلى + خبرة في مجال العمرة سنتين كحد أقصى
لكن اذا ما عندج خبرة في العمل ممكن يغضون النظر عن هالشرط ..
وأي استفسار بهالخصوص ياريت اتراسليني عالخاص عشان ما يآخذ هذا الموضوع مجرى ثاني ..
ويعطيكم العافية إن شاء الله
هيه شوفي ترى تقريبا الأغلب يواجه مشكلة .. نعم انا عندي ربيعتي بعد عندها بنتين كل وحدة في مدرسة ووحدة في اجازة ووحدة مداومه .. وعندي بنت عمي مدرسة في مدرسة حكوميه والحين هي اجازة بس عيالها 2 مداومين نظام فصلين .. الام في اجازة والعيال مداومين .. ويوم هي بتداوم هم بيأجزون
يعني ابداً مب عدل الصراحه ،، لازم يكون في تناسق بين اجازات الجميع